Ana məsləhəti
– Ana, gündə neçə dəfə çay qoyursan?
– Heç sayı-hesabı var ki, səhər durandan gecəyarısmacan. Maşallah, hey çayniklər dolur-boşalır.
– Dörd-beş kərə çay içilir, bu evdə, ya yox?
– Sözsüz!
– Stəkanlar da, şükür, dözür.
– Niyə dözməsin!
– İçki necə, bizim evdə hər gün olur?
– Hər gün niyə, həftədə bir!
– Yaxşı, həftədə bir. Bəs niyə badə dözmür? Həftə olmur ki, mən təzə bakala pul verməyim. Bunlar niyə tez-tez sınır? Badələrin şüşəsi xarabdır, nədir?
– Şüşədə deyil.
– Bəs nədədir?
– Özün bilmirsən nədədir?
– Bilsəm soruşmaram ki, bəlkə badələri suya çəkəndə çatdadırsan?
– Yox, evdə həmişə isti su var.
– Bəs bunlar niyə tez çatlayır?
– Çatlamasm, neyləsin. Badələri yalan çatladır.
– N ə ?
– Yalan!
– Ay ana, sən nə danışırsan? Yalan ürək sındırar, amma badə sındırmağını eşitməmişəm.
– Ay oğul, badələri çatladan, sındıran yalandır. Yoxsa şüşənin, fabrikin nə günahı.
– Hansı yalan?
– O yalan ki hər oturanda badələrə deyilir, ona polad da dözməz, bala!
– Biz nə yalan deyirik?
– Kərim Gəldiyevin tərifinə badə qaldırırsınız, bəs bu yalan deyil, nədir? Lotunun birini peyğəmbər yerinə qoyanda, badə dözər? Əlbəttə ki, çatlayacaq! Tərifləməyə adam tapmırsınız. Gəldiyevə qəsidə oxuyursunuz!
– Ay ana, neyləyim, işim ondan aşır.
– İşin aşır, ona şüşə neyləsin. Şüşə axı zərif şeydir. Adama baxma, qulağı dolur, alışır, nə deyirsən keçir gedir. Şüşənin qabırğasına o qədər bərk yalan döşəyirsiniz, sınmasın neyləsin, çatlamasın necə dözsün.
– Ay ana, bilmirəm necə eləyim.
– Necə eləyəcəksən, sənin ki, belə yalanların var, daha şüşə badə niyə alırsan, badəni taxtadan sifariş elə!
– Qorxuram taxta da dözməyə.
– Lap yaxşı olar ki, dəmirdən sifariş eləyəsən. O qəsidə-mədhiyyəni ki, süfrə başında deyirsiniz, ona ancaq dəmir dözə bilər. Vallah, düzünü deyirəm, dəmir!
Kitabxana.az · https://kitabxana.az/en/works/mir-celal-ana-mesleheti
Use ← → keys to move, R for a random poem
More by this author
I– Qız, Səadət, bu sənsən?
Xahiş, tələb, məsləhətAdam, xüsusən indi cəmiyyət adamı bunlarsız keçinə bilmir.Mən özüm müəlliməm, xalqın uşaqlarını oxuduram. Çalışıram ki, cavanlar müasir elmin, mədəniyyətin əsaslarını yaxşı öyrənsinlər. Gənclərə diplom verib həyata, xalq təsərrüfatında işə göndərəndə getdiyi idarənin işi sahmanda olsun, həm gəncin alnıaçıq, üzüağ, sənəti sayalı olsun, həm də müəllimin zəhməti hədər getməsin, sevincinə əsas olsun.
Anamın sevinciBurada hansı sevincdən söhbət gedir? Bizim anaya gətirdiyimiz sevincdən, yoxsa ananın bizə gətirdiyindən?Doğrudur, biz anamızı çox istəyirik, mən də, bacım da. Onun, az qala, başına dolanırıq. Həmişə istəyirik ki, onu sevindirək, güldürək, ürəyini açaq, xoş xəbərlə salamlayaq.
Məhəbbətə zor yoxdur– Nisa, ay Nisa!Nisa qayıdıb səs gələn tərəfə baxdı, dinmədi.