Mürdə cismim iltifatından bulur hər dəm həyat,

Ölərəm gər qılmasan hər dəm mənə bir iltifat.

Yazə bilməz ləblərin vəsfin təmami-ömrdə,

Abi-heyvan versə Xizrə kilkü zülmətdən dəvat.

Mən fəqirəm, sən ğəni, vergil zəkati-hüsn kim,

Şər içində həm mənədir, həm sənə vacib zəkat.

Görməyincə hüsnünü imanə gəlməz aşiqin,

Yüz peyğəmbər cəm olub, göstərsələr min möcüzat.

Məzhəri-asari-qüdrətdir vücudi-kamilin,

Feyzi-fitrətdən qərəz sənsən, tüfeylin kainat.

Cövhəri-zatindədir məcmui-övsafi-kəmal,

Bu sifat ilə ki, sənsən, qandadır bir pak zat?

Eşqə ta düşdüm Füzuli, çəkmədim dünya qəmin,

Bil ki, qeydi-eşq imiş dami-təəllüqdən nəcat.

Use ← → keys to move, R for a random poem

Random poem

More by this author

Poems by other poets · Love