İkinci şəkil
Sultan Süleymanın sarayı. Sultanın ətrafında əyanları, vəzir, vəkil var. Şair Füzuli əl ağacına söykənərək içəri girir. O, saray əyanlarına yavaşca təzim edib, sultanla üzbəüz durur.
Sultan
Sənətkar xoş gəlib məclisimizə
Onun bu gəlişi nemətdir bizə.
Sevindim oxuyub “Leyli Məcnunu”
Mən sənət ulduzu sanıram onu.
Düşüb hər nəğməniz dilə, ağıza
Qoca Şərq baş əyib kəlamınıza.
Böyük qüdrətsiniz. Heyiflər ki, siz
Mənim sarayımdan gen gəzirsiniz.
Deyirlər ağırdır güzəranınız
Kasıb bir komadır xanimanınız
Sizin halınıza acıyıram mən.
Füzuli
Təşəkkür edirəm buna ürəkdən
Sultan
Bəs necə?
Sizin qayğınıza mən qalmalıyam.
Xalqın nəzərində ucalmalıyam.
Füzuli
(kinayə ilə)
Ya Sultan, mən bununla tanışam, tanış.
Ədalət sizinlə əkiz yaranmış
Sultan
Mərhaba, mərhaba, böyük sənətkar,
Sizdə həqiqətin sönməz nuru var.
Yaxşı, indi belə, möhtərəm şair,
Mədhiyyələr deyin bizlərə dair
Vəzir
Yerin Allahıdır Sultan Süleyman,
Layiqdir adına min böyük dastan.
Vəkil
Bəli, mərhəməti, əzəməti var,
Önündə baş əyir vüqarlı dağlar,
Məmləkət onunla bəxtiyar olmuş,
O, Şərqə sahibi-ixtiyar olmuş.
Onu mədh etsəniz kəlməbaşı siz,
Məliküşşüəra seçilirsiniz
Sizin qismətiniz Ənam, pay olar.
Sultan
Necədir? Xoşdurmu söylə bu həyat,
Vəzifə, ehtiram, böyük mükafat.
Füzuli
Ellərin qəlbindən qopan səsəm mən
Ləkəsiz günəş tək müqəddəsəm mən.
İlk andım xalqıma məhəbbətimdir.
Yoxsulluq ən böyük səadətimdir.
Sən şəhər alırsan qılınc gücünə
Sözlə təslim olmur ürəklər mənə.
Bəlkə sən tökdüyün qızıl qan qədər
Alnımdan tökülmüş mənim inci tər.
Sən at çapdıraraq məmləkətlərə,
Qoşunla, ləşkərlə çatdığın yerə
Səndən tez yetişir şöhrətim mənim
Budur mükafatım, dövlətim mənim.
Ya Sultan, incimə bu sözlərimdən
Əzəldən həqiqət aşiqiyəm mən.
De görüm, ömürlük qalacaqmısan?
Ömürlük sən sultan olacaqmısan?
Dövrani-fələyin inqilabından
Sən təxti-tacından düşdüyün zaman
Bu möhtəşəm saray payimal olar
Qılıncın kütləşər, hökmün lal olar,
Onda nəiyn qalar?
Soruş özündən.
Sənət sarayının sultanıyam mən.
Püskürsə min vulkan, qopsa min tufan,
Bir daşın yerindən oynamaz, inan.
Bu daş-qaş beş günlük parlayır ancaq,
Hər sözüm min illər parıldayacaq.
Ey Sultan, saraya çəkmə gəl məni
Payimal eləyər bu əməl məni.
Vəzir
Ya sultan, Üsyandır onun dediyi
Vəkil
Ağzından gəlir onun qan iyi.
Bəli, tanıyıram bu məhzəbsizi
Baş ağrısı verib ayıldım sizi,
Dünən bir qiyamçı öldürülərkən
Şairin qəzəli çıxdı cibindən
Fatihə vermədi.
Sultan
Necə. Nə dedi?
Vəkil
Dedi: “Cəhənnəm odunda razıyam yanım
Füzuli şeridir mənim Quranım”.
O lənətə gəlmiş dini unutdu
Qəzəli öpərək kağızı uddu.
Sonra də kəndiri saldı boynuna.
Sultan
Şair nə deyirsən? Cavab ver buna
Füzuli
Siz qüdrət sahibi, yerin Allahı,
“Həqiqət carçısı”, “xalqın pənahı”,
Güc sizdə, zor sizdə, ləşkər sizdədir,
Ölkələr, şəhərlər əlinizdədir.
Size əl qaldırır sizin bəndəniz
Ölüm ayağında mənə çökür diz.
Mən kiməm, uğursuz, kasıb sənətkar,
Bəs nədən o şəxsin sənə nifrəti,
Mənə dindən artıq etimadı var?
Gördünmü, itidir sözüm qılıncdan
Sən böyük sultansan, mən böyük sultan?
Sultan
Heyranam mən sənin cəsarətinə,
Hər sözün batsa da nizə tək mənə
Qəzəbim tutsa da cəza vermirəm.
Qocasan, ölməyə rəva görmürəm.
Bu gün-sabahlıqsan, get öz evinə.
Al, həmin baratı verirəm sənə
Bu sənə ömürlük mükafatımdır.
Şerinə hörmətim, iltifatımdır
Sultan Füzuliyə möhürlü bir kağız uzadır.
Füzuli
(acı kinayə ilə)
Mən şeir mülkünə incilər düzən
Gözlərə nur verən ürəklər gəzən,
Şərqin nəğməkarı qoca Füzuli,
Vüqarı dağlardan uca Füzuli.
Səndən doqquz axça barat alıram,
Zəngin xəzinədir bu böyük ənam
Gələcək nəsillər eşitcək bunu,
Bilər ədalətin nə olduğunu,
Nə böyük səxavət, nə böyük hikmət.
Sizdə həm qayğı, həm də məhəbbət.
Təşəkkür edirəm buna ürəkdən,
Bu zəngin ənamı unutmaram mən.
Kitabxana.az · https://kitabxana.az/en/works/tofiq-bayram-sairin-sikayeti-ikinci-sekil
Use ← → keys to move, R for a random poem
More by this author
Poems by other poets
Yeriməz salik olan rahi-rizadən qeyri,İstəməz arif olan cövrü cəfadən qeyri.
Ey gül, səni bilməm necə ustad çəkibdirEy gül, səni bilməm necə ustad çəkibdir,Nəqqaş-i əzəl sünin edib yad çəkibdir.
NöycavanGəl görüm, gəlişin nerdən, çeşmi siyah, nöycavan,Həsrətəm didarına, çəkirəm ah nöycavan,
Hərc-MərcÇərx cəfapişə gətir gərdişəBürk aldı qaç olubdu Şirvanımız