Birinci pərdə
Page 2 of 5 · 20%
Salmanov
Ağzınızdan çıxan qeyd olunur, yoldaş Kərəmov.
Surxay içəri girir.
Surxay
Qüvvət olsun.
Kərəmov (öz-özünə)
Xeyr, a... Bundan yaxa qurtarmaq çətin olacaq.
Surxay
Yoldaş müəllimə xüsusi salamlar! Sən də yəqin Ziynətin nigarançılığını çəkirsən, hə?
Şeyda
Gərək səhər gələ idi. Bilmirəm niyə gecikdi.
Kərəmov
Balam, canım, gözüm, kolxoz idarəsi sizinçün vağzalzad deyil ki, yığılmısınız? Mirzə Hüseyn, mən sənə əmr eləməmişəm ki, buraya yaz yapışdır, işsiz daxil olmaq qadağandır?
Mirzə Hüseyn
Yazıb yapışdırmışdım, yoldaş Kərəmov, bax, bu Surxay yoldaş cırıb atdı.
Kərəmov
Niyə? Surxayın nə ixtiyarı var heyətin qərarı olmamış kolxoz idarəsində elan cırıb ata?
Surxay
Bilirsiniz niyə cırdım, yoldaş Kərəmov? Əgər yazsanız ki, işsiz daxil olmaq qadağandır, onda gərək hamıdan qabaq sədr özü buraya girməyə, çünki məncə, bu kolxozda bir işsiz var, o da kolxoz sədridir.
Kərəmov
Surxay, sənə əmr eləyirəm, bu dəqiqə kəs!
Surxay
Düz deyirəm, müəllim?
Şeyda
Tamamilə düzdür. Özü işləmədiyi bəs deyil, hələ başqalarına da mane olur.
Kərəmov
Kəsin deyirəm sizə... Mənə, mənim öz kabinetimdə hücum çəkirsiniz? Baş-başa verib qruppa düzəltmisiniz? Salmanov! Qeyd eləyirsən, eləmirsən?
Salmanov
Deyəsən, kağız çatışmayacaq...
Kərəmov
Kağız çatışmır, köhnə protokolların künc-bucağına yaz. Mənim əleyhimə deyilən hər bir kəlmənin sorğu-sualı olacaq. Özbaşınalıq deyil ki!
Şeyda
Gedək, Surxay. Ziynəti tarlada, açıq havada qarşılasaq daha yaxşıdır.
Surxay
Gedək. Vaxt olar, Kərəmov yoldaş ilə bundan da səmimi söhbət eləyərik...
Çıxırlar.
Mirzə Hüseyn
Müşərrəf oldular? Yaxşı ki, bu səfər tez qurtardı.
Kərəmov
Nə hədləri var? Qabaqlarındakı aslandır, axı. Bəs, necə? Görürlər ki, camaat burada iş görür, semiçka çırtlamır. Bu, sədrlikdir, masqara deyil. Hə, indi daha sakitlikdir, qoy dərindən fikirləşim. Elə bir təliqə yazmaq istəyirəm ki, mərkəzdə əldən-ələ gəzsin.
Mirzə Hüseyn
İcazə verin, gedim görüm, əməkgünlərini qeyd ediblərmi?
Kərəmov
Get, mane olma.
Mirzə Hüseyn (gedir. Sonra pəncərədən başını çıxarıb, tələsik xəbər verir)
Camaat bu tərəfə gəlir, qabaqlarında da Ziynət. (Pəncərədən çəkilir)
Kərəmov
Yox, bu olmadı. Mənim idarəmi karvansaraya döndərdilər. Canım, dərindən fikirləşməyə şərait yoxdur ki!
Ziynət, Mehralı və bir neçə kolxozçu içəri girirlər.
Mehralı
Uçan bülbülümüzü tutub gətirdik. (Çamadanı yerə qoyur)
Ziynət
Xoş gördük, yoldaşlar, ha yalvardım ki, a Mehralı dayı, sən zəhmət çəkmə, qoca kişisən...
Mehralı (onun sözünü kəsir)
Hə, onda çaşdın. Ortada qoca sözü olmayacaq.
Gülüşürlər.
Ziynət
Siz necəsiniz, yoldaş Kərəmov?
Kərəmov
Sazam. İndi get, bir az istirahət elə, sonra gəlib mənə Bakıda olub-keçənlər haqqında ətraflı məruzə elərsən.
Ziynət
O məsələləri gərək ümumi kolxoz iclasında müzakirə eləyək.
Kərəmov
O sonrakı işdir. Əvvəlcə mənə danış. Mənimlə razılaşdır, sonra kolxozçularla söhbət apar.
İbrahim kişi tələsik gəlir.
İbrahim kişi (Ziynətlə görüşür)
Xoş gəlmisən, qızım, səni səhərdən gözləyirdik, niyə belə ləngidin?
Ziynət
Maşın iki dəfə sındı. Yollarımız o qədər xarabdır ki, adam xəcalət çəkir.
Kərəmov
Eybi yoxdur, qoy başım açılsın, o yolları elə düzəldirəcəm ki, o başında yumurta qoysan, bu başında görünəcək. Bəs, necə?
İbrahim kişi
Siz əvvəlcə kolxozdakı biabırçılıqların qabağını alın, sonra.
Ziynət
Nə olubdur ki? Nə biabırçılıqdır?
Mehralı
Nə biabırçılıq olacaq? Taxıllar yığılıb dağ kimi, daşıyan yoxdur. Maşınlar xarab, arabalar sınıq...
Kərəmov
Yenə keçdilər tənqidə, göz açmağa qoymurlar ki... A kişi, a Mehralı, bu saat bu söhbətlərin işə heç dəxli yoxdur. İclas çağıraram, bir deyərsiniz, beş də cavabını alarsınız.
Mehralı
Düzdür, bu cür nəticəsiz söhbətlərdənsə, qoy Ziynət bacı bizə yığıncaqdan danışsın.
Təmraz
Sənin danışığını, qızım, qəzetdə oxuduq, ürəyimiz fərəhlə doldu.
Kərəmov
Çox gözəl çıxış eləyib, hələ bir fərəhlənirsiniz də? Mənim öyrətdiyim sözlərin heç birini deməyib. Burada kolxozun rəhbəri mənəm, gərək heç kəs mənim sözümdən bir addım qırağa çıxmaya. (Ziynətə) Mən burada sənə nə öyrətmişəm, sən gedib gör nə danışmısan? Tənqid yaxşı şeydir, amma gərək əvvəlcə rəhbərliklə razılaşdırasan, sonra.
Mehralı
Demək, sən tənqidi döndərib ev toyuğu eləmək istəyirsən?
Hamı gülür.
Kərəmov (Mehralıya)
Bəri bax, yoldaş sıravi kolxozçu, böyük-kiçik yanında danışmağın qaydasını bil. (Ziynətə) Danış görək, Bakıda neyləmisən?
Ziynət
Konfransdan sonra bizim kolxozun bəzi məsələlərini həll etmək üçün müəyyən idarələrə getdim. Əvvəlcə, dalda qaldığımız üçün danladılar, sonra da uzaq kənd olduğumuzu nəzərə alıb, bizim kolxoza əlavə iki maşın bağışladılar.
Kərəmov
İmadin?
Ziynət
Yox.
Kərəmov
Zis?
Ziynət
Yox, yük maşını.
Kərəmov
Onda apar, qaytar dala. Mən yük maşınında gəzə bilmərəm.
Ziynət
Onları sizin gəzməyiniz üçün yox, yük daşımaq üçün veriblər. Sonra da sizə mən bir şad xəbər vermək istəyirəm. Neçə ildir, Kərəmov əlləşirdi, ancaq bizim bu körpü məsələsini düzəldə bilmirdi. Körpü olmadığından rayon mərkəzi ilə əlaqəmiz çətinləşirdi, yolumuz bir günlük uzaq düşürdü.
İbrahim kişi
Bəs, necə oldu, düzəldi?
Ziynət
Düzəldi. Smetaya baxdılar, təsdiq elədilər.
Mehralı
Sağ ol, Ziynət, çox sağ ol, bilirsən bu körpü bizim əlimizdən necə tutacaq?
Kərəmov
Düzdür, mən neçə ildir körpü düzəltmək üçün əlləşirdim, bir şey çıxmırdı, amma daha sənin kimi gözəl-göyçək qız hara, mən hara? Əlbəttə, səninçün körpü də salarlar, hələ dəmir yolu da çəkərlər.
Mehralı
Canım, yekə kişisən, nə əttökən sözlər danışırsan?
Təmraz
Sədrimiz belə danışanda daha başqalarından nə gözləyək?
İbrahim kişi
Bu cür sözlər eşidəndə adam bilmir, neyləsin?
Kərəmov
Dayanın, dayanın, qarğa-quzğun kimi tökülməyin üstümə. Mən o mənada demirdim, sözümü fındıq kimi sındırıb, içindən ləpə çıxartmayın. Mən bu körpü məsələsinə çox sevindim. Sağ ol, Kərəmov ki, kolxozda bu cür Ziynətlər yetişdirmisən. Yaxşı, bəs, necə məsləhət görürsünüz, körpüyə kimin adını qoyaq?
Mehralı
Körpüyə ad qoymazlar.
Kərəmov
Qoyarlar. Sən mənə öyrətmə. Salmanov!
Salmanov
Bəli, yoldaş Kərəmov.
Kərəmov
Bu saat mənim əmrimi heyət üzvlərinə yetir. İclas çağırıram. İclasda gərək bu saat həll eləyəm, körpüyə kimin adı qoyulsun.
İbrahim kişi
Körpü hələ tikilməyə başlanmayıb, adını fikirləşirsən.
Ziynət
Heç elə iş olar, yoldaş Kərəmov? Heyət üzvləri bu saat çöldə, biçində, onları işdən ayırıb, iclas çağırmaq olar?
Kərəmov
Bəli də, demək, kolxoz sədrinin kefi istədikdə iclas çağırmağa da ixtiyarı yoxdur? Bilirəm, niyə istəmirsiniz, qorxursunuz kolxozçular körpüyə Kərəmovun adını qoyalar? Heç nigaran qalmayın. Onlar qoysalar da, mən razı olmaram. Kərəmovun adı bir kənd körpüsünə sığışmaz. Yaxşı, daha qəbul saatım qurtardı. İndi icazə verin, dövlət işləri ilə məşğul olum. Salmanov, təkərlər barəsində rayon mərkəzinə yazdığımız kağız hazırdırmı?
Salmanov
Kağız hazırdır, amma sözləri yazılmayıb.
Kərəmov (hirsli halda)
Ah, Salmanov, Salmanov...
Ziynət
Ayıbdır, yoldaş Kərəmov, rayona təkərlər barədə yazmaq yaxşı deyil. Çağırın dəmirçi Musanı, təkərləri düzəltsin.
Kərəmov
O mənim işimdir. Onların borcudur bizim hər bir dərdimizə qulaq assınlar. Əgər, qulaq asmayacaqlarsa, daha niyə adlarını məsul işçi qoyub, hökumətdən məvacib alırlar?
Ziynət
Taxıllar çöldə qalıb, yağış altında çürüsün ki, kolxoz rayon mərkəzindən araba təkəri gözləyir? Bu, ziyançılıqdan başqa heç bir şey deyil.
Kərəmov
Necə? Sən mən Kərəmova ziyançı deyirsən? Salmanov, bu sözləri yaz, altından qol çəksin. Adə, mən, kolxoz sədri, ziyançı! Yaz, altından qol çəksin. Kişisənsə, qol çək, nə durmusan?
Mehralı
Yazarıq da, qol da çəkərik, hələ bir az səbr elə.
Kərəmov
Sən bağla, səndən soruşan yoxdur.
Ziynət
Kərəmov, mən bu saat yol yorğunuyam, bu sözlərimi ümumi yığıncaqda bir də təkrar eləyərəm.
Kərəmov
Hə, məni hodələyirsən? Qoymurlar da, qoymurlar sakit oturub iş görək. Ziyançı da özünüzsünüz, işi pozan da. Bəri bax, məni acıqlandırarsınız, səhərdən əmr verərəm ki, bütün “Şəfəq” kolxozu böyüklü-kiçikli işdən azad edilsin. Salmanov, yığışdır dəftərxananı, gedək ayrı yerə, bu şəraitdə mərkəzə kağız yazmaq olar? (Çıxırlar)
Mehralı
Get, eybi yoxdur. Sənin də mənəm-mənəm deməyinin ömrünə az qalıb.
İbrahim kişi
Ziynət, qızım, sən bu saat yoldan gəlmisən, istirahət elə, sonra doyunca söhbət eləyərik.
Ziynət
Danışmalı söz çoxdur. Biz işlərimizdə elə yeniliklər yaratmalı, elə əmək fədakarlığı göstərməliyik ki, kolxozumuz bu gözəl, bu şən həyata layiq bir kolxoz ola bilsin.
Təmraz
Kərəmov qoysa...
İbrahim kişi
Biz mübarizəni onun özündən başlamalıyıq.
Çöldən səs gəlir.
Mehralı
Bizi çağırırlar, gedək. Sağ ol, qızım, yığışıb bir yaxşı məsləhətləşərik.
Kitabxana.az · https://kitabxana.az/en/works/sabit-rehman-toy-birinci-perde
Use ← → keys to move, R for a random poem
More by this author
Dördüncü şəkilYasəmən pərdə qabağına çıxır.*
Şirin bülbül1**Elə bir zamandan danışıram ki, böyüklərin xatirəsində çox yaxşı qalıb, kiçiklərin isə heç ağlına gəlməz.
Nəfəs puluƏsgər ağa konyak butulkasını boşaltdıqdan sonra qolunun bütün qüvvəti ilə bağın aşağısına doğru fırlatdı və ayağa durub donuq gözləri ilə o yan-bu yana baxmağa başladı.Uzaqdan qulağına incə bir zarıltı gəldi.
Çiy ətTədarük anbarının müdiri Məmməd Qəribov səhər tezdən yerindən qalxıb tələsik geyinməyə başladı.Arvadı təəccüb qaldı:
Poems by other poets
Tutu quşu, gəl, Allahı sevirsən,Mənim sirrim xalqa bəyan eyləmə,
Gəraylı: Ağalar, biwəfa yardanAğalar, biwəfa yardanMən dönərəm, könül dönməz
MəşkatVə nə xurşid sifət bəzmsəradır Məşkat,Sərbəsər məhfil-ara bəzli-ziyadır Məşkat
Deyibsiz yəni gəlləm gəldi bir belə xəbər, Vaqif!Deyibsiz yə’ni gəlləm gəldi bir belə xəbər, Vaqif,Xilaf idi bu sözlər bəs, peşimanmı məgər Vaqif?