Page 2 of 4 · 25%

Sadıq

Göstərərsən, niyə göstərmirsən ki?

Gülər

Sadıq, qulağım sənin səsini eşitməsin!

Sadıq

Ay Gülər, yəni o qədər zəhlən gedir?

Gülər

Hələ danışırsan da? Özün bilirsən ki... Bu bir ildə biz hər gün iki dəfə dalaşmışıq.

Sadıq

Maşallah! Bizim dalaşmağımızın haqq-hesabını çəkmək üçün yekə bir dəftərxana lazımdır.

Gülər

Hə... Amma indi daha canım boğazıma yığılıb, bəsdir. Mən ailə qurmaq, oğul-uşaq sahibi olmaq istəyirəm. Amma sənin fikrin ayrı yerlərdə səyahət eləyir. Ona görə də nöqtəni qoymalıyıq.

Sadıq

Nöqtəni qoyaq deyirsən, qoyaq, nə deyirəm ki? Ancaq icazə ver, axırıncı dəfə sənə bir sual verim, sonra nöqtəni də qoyaq, vergülü də.

Gülər

Ver axırıncı sualını.

Sadıq

Sənin davan yalnız uşaq üçündür? De görüm, uşaq sənin nəyinə lazımdır?

Gülər

Uşaq insan nəslini artırmaq üçündür.

Sadıq

Demək, bu boyda dünyada insan nəslini artırmaq səninlə mənə həvalə olunub?

Gülər

Sadıq, kəs mübahisəni!

Sadıq

Kəs deyirsən, kəsərəm, niyə kəsmirəm ki?.. Deməli...

Gülər

Deməlini saxla, sabah ZAQS-da danışarsan. (Gedir)

Sadıq

Gülər, ay Gülər, qadan alım, bir dayan.

Sadıq onun dalınca qaçmaq istəyəndə Maral və Həlimə ilə rastlaşır.

Maral

Yoldaş Sadıq, bir dəqiqəliyə. Yerli komitə tərəfindən sənə bir sual verəcəyəm.

Sadıq

Sual vaxtı deyil, rəhmətliyin qızı, arvad getdi. (Çıxır)

Maral

Yaxşı, yoldaş mühəndis. (Həliməyə) Mən bunlara yerli komitənin zərb-dəstini gör necə göstərəcəyəm.

Həlimə

Onları tanımırsan, ay Maral bacı? Niyə hirslənirsən? Nə olsun ki, mənə də deyirlər ki, yerli komitənin texniki katibisən, ixtiyarın yoxdur özünçün putyovka götürəsən. Mən də deyirəm ki, yerli komitənin sədri Maral bacıdır, özü bilər, bəlkə məni ən yaxşı kurorta göndərəcək...

Maral

Mənim kurort-zad gözümə görünməyir, ay qız.

Həlimə

Yerli komitənin hörməti kurort ilə, putyovka ilə qalxar. Krıma var? Doktorlar mənə Krımı məsləhət görürlər.

Maral (darıxmış halda portfelini ona uzadır)

Al, aç bunu görüm, içində qaynanmış su var, ver başıma çəkim. Ürəyimin başı od tutub yanır.

Həlimə

Neçə gündür bir az bikef kimisən, nə olub?

Maral

Sənə deməli deyil!

Həlimə

Sən mənim canım, Maral bacı! Deməsən, əl çəkən deyiləm.

Maral

Dilini dinc qoyarsan?

Həlimə

Mən heç yerli komitənin sirrini başqalarına deyərəmmi? Birdən müdiriyyət xəbər tutar.

Maral

Yerli komitə nədir, ay qız? Qulaq as, gör nə deyirəm. Ürəyim dönüb olub sərv ağacı. Məhəbbət quşu qonub bu sərvin bir budağına, ürəyimi tut ağacı kimi silkələyir. Başa düşdün? Ah, sən cavansan, belə şeyləri hardan başa düşürsən ki?

Həlimə

Niyə başa düşmürəm, ay Maral bacı? Yəqin aşiq olmusan.

Maral

Haradan bildin, ay qız?

Həlimə

Olmuya müdiriyyətə vurulmusan?

Maral

Amma bax, lal-kar! Bildin?

Həlimə

Əcəb işdir, yerli komitə müdiriyyətə aşiq olub!.. İşçilərin hüququ yaxşı müdafiə olundu.

Maral

Eh, sən də söz danışdın. Bu saat elə halımdır ki, öz hüququm yadımdan çıxıb.

Həlimə

Ancaq mən yaxşı başa düşə bilmədim, hansı müdiriyyətə? Yoldaş Nəsirova?

Maral

Yox-yox! Bir pillə aşağı en!

Həlimə

Mirzə Qərənfilə?

Maral

Bir pillə də en.

Həlimə

Hə... Demək Bərbərzadəyə?

Maral

Ay, ürəyim xarab oldu.

Həlimə (gülür, birdən səhnə arxasına baxıb sevincək)

Bıy, ay Maral bacı, Bərbərzadə gəlir. Özü də səninçün gör necə bəzənib?

Maral

Bura gəlir? Ay aman, ürəyim çırpınır.

Həlimə

Mən gedirəm. Özünü itirmə. Nə olub ki?

Həlimə çıxır. Bərbərzadə ehtiyatla içəri girir.

Bərbərzadə (özünü son dərəcə itirmişdir)

Demək olar ki, gəlib çıxmışam.

Maral (utancaq)

İndi ki, gəlmisən, daha neyləmək olar, xoş gəlmisən.

Bərbərzadə

Hava bu gün sərindir.

Maral

Yox a, yaman istidir.

Bərbərzadə

Elə mən də o cür demək istəyirdim. Mən istiyə sərin deyirəm. Uşaqlıqdan adət eləmişəm.

Maral

Portfelsiz gəlməyinizdən belə məlum olur ki, istirahətə çıxmısınız?

Bərbərzadə

Dedim ki, bu gün istirahət günüdür. Ayaqüstü bura baş çəkib evə qayıdım. Gedəndən sonra görürəm ki, yadımdan çıxıb şapqamı burada qoymuşam. İndi də onu axtarmağa gəlmişəm. (O yan-bu yana baxır)

Maral

Bıy, şapqa başınızdadır ki!

Bərbərzadə

Doğrudan da, başımda imiş. Mən isə, bayaqdan bəri şapqamı axtarıram. (Sükut) Nə dediniz?

Maral

Heç, mən bir söz demədim.

Bərbərzadə

Hə, görünür, qulağım aldanıb, yaxşı, bəs indi biz necə eləyək?

Maral

Nəyi necə eləyək?

Bərbərzadə

Şeyi deyirəm də... Ox, yaman tərləmişəm, deyəsən, yadımdan çıxıb, yaylığımı da evdə qoymuşam.

Maral

Bəs əlinizdəki yaylıq deyil?

Bərbərzadə

Bəli, qəti olaraq demək olar ki, mən özümü itirmişəm. (Üzünü silir)

Maral

Mən də lap istidən boğuluram.

Bərbərzadə (cibindən qəzetə bükülmüş yemək çıxardır)

Bəlkə açlığınız var? Məndə ehtiyatdan həmişə yemək olar.

Maral

Yox, mən yaz-yay həmişə bir şüşə qaynanmış sudan başqa ağzıma heç bir şey almaram.

Bərbərzadə

Mən isə tərsinə. Özümə korluq verən deyiləm. (Sükut) Demək olar ki, əgər zavxoz dili ilə desək, bizim ikimizin də söz inventarımız qurtarıb?

Maral

Sizin beyninizə bir şey gəlmir?

Bərbərzadə

Bir az dayanın, beynimi qurdalayım, hə, hə, gəldi. Mirzə Qərənfili tanıyırsınız?

Maral

Bizim Mirzə Qərənfili? Çox gözəl tanıyıram. Beş aylıq üzvlük haqqını verməyib, ittifaqdan çıxardacağam.

Bərbərzadə

Hələ çıxartmayın, səbir eləyin!

Maral (nazlanaraq, minnət qoyur)

Mənim gözlərim üstə, hələlik çıxartmaram, sizin xatirinizə.

Bərbərzadə

Xatiriniz isti-soyuq görməsin. Bəli, haman Mirzə Qərənfil elə adamdır ki, stəkana sal, su ilə iç, həvəngdəstədə döy, qənd elə, ye!..

Maral

Nə olar ki?

Bərbərzadə

Bəli, haman Mirzə Qərənfil... (Özünü itirmiş halda gözlərini döyərək) Heç mən bilmirəm biz nə üçün Mirzə Qərənfildən söhbət saldıq?

Maral

Siz beyninizi qurdaladınız, içindən Mirzə Qərənfil çıxdı.

Bərbərzadə

Hə, yadıma düşdü. Mən utanıram, danışa bilmirəm, sözümü Mirzə Qərənfilə deyərəm, o sizə yetirər. Siz də ona deyin!

Bayırdan səs-küy gəlir. Nəsirov və Mirzə Qərənfil içəri girirlər. Maral və Bərbərzadə ayağa qalxırlar.

Nəsirov (onları bir yerdə görüb pərt olur)

Hə, bu da bunlar... Biri təsərrüfat müdiri, biri yerli komitənin sədri. Yəqin qeybət eləyirlər.

Bərbərzadə

Yoldaş Nəsirov...

Nəsirov (onun sözünü kəsir)

Bir kəlmə belə danışmağa icazə verməram. Səhərdən işçilər gəlib materialsız qalıblar, mən zavxoz əvəzinə material paylayan olmuşam, bu isə burada boşboğazlıq eləyir. Öyrənmisiniz dünyanı başınıza götürüb, saatlarla danışmağa. Adamın vaxtını almağa həvəsiniz var. Mən bu tikintidə uzunçuluqla, boşboğazlıqla mübarizə eləməkdən yorulmuşam.

Bərbərzadə

Yoldaş Nəsirov...

Nəsirov (yenə onun sözünü kəsir)

Bir kəlmə də. Budur bütün işçilər bu gün öz xahişləri ilə işləyirlər. Amma siz burada yenə də çənənizi bərkidib beyninizi boşaldırsınız. Sizi mən dəqiqə ilə, saniyə ilə danışmağa öyrədəcəyəm. Bir məsələni başa salmaq üçün uzun-uzun cümlələri dəvə karvanı kimi yan-yana düzmək lazım deyil. Bir cümlənin bir kəlməsi, hətta bir kəlmənin bir hecası kifayətdir.

Maral

Yoldaş Nəsirov! Biz burada...

Nəsirov (onun sözünü kəsir)

Dedim bir kəlmə də olmaz. Mirzə Qərənfil!

Mirzə Qərənfil

Mirzə Qərənfil sizi kölgə kimi təqib eləyir.

Nəsirov

Uzatma. Sən mənim müavinimsən, hər şeyi bilməlisən. De görüm, işçilər material ilə təmin edilmişlərmi? Sənə bir dəqiqə vaxt verirəm.

Mirzə Qərənfil

Yoldaş Nəsirov yəqin bilsin ki, müxtəsər danışmış olsaq, demək olar ki, heç bir zaman bizim təsərrüfatımızda, yoldaş Nəsirov...

Nəsirov

Yoldaş deməsən də olar.

Mirzə Qərənfil

Nəsirov! Heç bir zaman bizim təsərrüfatımızda...

Nəsirov

Mənim familiyamın bu söhbətə heç bir dəxli yoxdur.

Mirzə Qərənfil (birnəfəsə deyir)

Heç bir zaman bizim təsərrüfatımızda işçilər materialsız qalmayıblar.

Nəsirov

Bax, bu bir kəlmə sözü demək üçün gör nə qədər vaxtımı aldın! Bərbərzadə! De görüm, rənglər hazırdırmı?

Bərbərzadə

Mən hələ heç, yoldaş Nəsirov...

Nəsirov (sözünü kəsir)

Yoldaşsız!

Bərbərzadə

Mən hələ heç, Nəsirov...

Nəsirov

Nəsirovsuz!..

Bərbərzadə

Mən hələ heç... hələ heç... Özümü itirdim getdi ki...

Nəsirov

Demək, almamısan?

Bərbərzadə

Xeyr, yoldaş... sız... Almışam... hazırdır.

Nəsirov

Yerli komitə sədri, sən de görüm, yarış müqaviləsinin necə yerinə yetirildiyini yoxlamısınız, yoxsa yox?

Maral

Xeyr, yoldaş Nəsirov, hələ mən indicə...

Nəsirov

Yoldaşsız və Nəsirovsuz. Yarım dəqiqə vaxt verirəm, ya hə, ya yox!

Maral

Yox!

Nəsirov

Use ← → keys to move, R for a random poem

Random poem

More by this author

Poems by other poets