Üçüncü pərdə
Page 3 of 3 · 67%
Saleh
Səni həyat özü mühakimə edəcəkdir.
Umud, Xumar, Rəfiqə, Kəklik və Zəki əllərində gül dəstələri içəri girirlər.
Şəlalə (Umudun üstünə qaçır)
Umud can! Bunlar mənə böhtan atırlar. Bu güllər nədir, hara gedirsiniz?
Umud
Doğum evinə gedirik. Oğlum olub, onu bu dostlarımla tanış etmək istəyirəm. Daha məni gözləmə, Şəlalə, öz ailəmə qayıdıram.
Şəlalə
Öz ailən hansıdır?
Umud
Sevgi və qayğı ilə dolu olan ev mənim ailəmdir.
Şəlalə
O evin qiymətini uşaq olan kimi bildin?
Umud
Yox, hələ uşaq olmamışdan qabaq, səni yavaş-yavaş tanıyanda onun qiyməti qalxmağa başlamışdı. İndisə, bu uşaq məni ailəyə, həyata elə bağladı ki, min Şəlalə yığılsa, qopara bilməz.
Şəlalə
Qopma, çox lazımdır, onsuz da mənə layiq kişi deyildin.
Umud
Biz gedirik, Şəlalə, sən isə, işə gir, öz əlinin əməyilə yaşa.
Şəlalə
Gedin. O sizin borcunuz deyil, yaşamağın qaydasını mənə öyrətməyin. Mən özüm öz işimi çox yaxşı bilirəm.
Rəfiqə
Gözəlliyinə arxayın olma. Yalan get-gedə öləcək, sən də onunla bərabər.
Şəlalə
Ölməyəcəyəm. Mən ölümün özünü də aldadacağam.
Rəfiqə
Gedək, Umud qardaş, arvadınız gözləyir.
Xumar
Körpənin gözü yoldadır.
Kəklik
Körpənin də, anasının da, Zəki, qabağa düş, yol göstər!
Zəki
Yolumuz aydındır!
Çıxırlar. Şəlalə səhnədə tək qalır.
Şəlalə
Hamı getdi. Hərənin bir işi, bir ailəsi var. Mən isə burada, küçədə tək qaldım. Elə bil bütün dünyada təkəm.
Son dərəcə qocalmış, haldan düşmüş Tərlan xanım gəlir.
Tərlan xanım
Tək deyilsən. Mən də səninlə varam.
Şəlalə
Xala, nə yaxşı gəlib çıxdın. Məni niyə qoyub getmişdin?
Tərlan xanım
Heç yerə getməmişdim, həmişə səninlə idim. Həmişə sənin ürəyində, beynində dolaşırdım. Hərəkətlərinə rəhbərlik eləyirdim, sözlərinə istiqamət verirdim.
Şəlalə
Nə yaman qocalmısan, ayaq üstə dayana bilmirsən.
Tərlan xanım
Məni bu təzə dünya qocaltdı. Ayağımı hara atıramsa, başımdan vurub məhv eləməyə çalışırlar. Uzun zaman bir yerdə qərar tuta bilmirəm, tanıyıb qovurlar. Hayıf deyildi o vaxtlar, atam Muxtar bəyin dövləti...
Şəlalə
Sən yenə yalan danışmağa başladın?
Tərlan xanım
Bizim sənətimiz odur. Yalan dünyada ən güclü silahdır. Əlində bu cür silah olandan sonra niyə tək qalırsan? Həyat sənə zərbə vuranda daha güclü bir zərbə ilə ona cavab ver. Mənim bir ayağım keçmişdədir, bir ayağım qəbirdə. Sən ki, bu zamanın övladısan, özünü niyə itirirsən?
Şəlalə
Düz deyirsən, xala, təslim olmaq yaramaz. Mən yenə vuruşacağam. İnsanlar havasız, susuz yaşaya bilmədikləri kimi yalansız da yaşaya bilmirlər.
Tərlan xanım
Əlini ver mənə. Heç qəm çəkmə. Arxayınam ki, ölsəm də səni öz yerimdə qoyub gedəcəyəm. (Şəlaləni qucaqlayır, sonra qolundan tutub qabağa çəkir. Səhnə fırlanır, tamaşaçıların gözləri qarşısında şəhərin müxtəlif mənzərələri canlanır. Qorxmuş, özünü itirmiş Şəlalə get-gedə canlanmağa, gülümsəməyə, nəhayət, gülməyə başlayır. Səhnə fırlandıqca Şəlaləni, Tərlan xanımı da fırladır)
Saleh və Aslan hərəsi bir tərəfdən gəlib tamaşaçılara müraciət edirlər.
Saleh
Bu cür kişilər də var, ayıq olun.
Aslan
Ehtiyatlı olun! Yalan aramızda gəzir, yaxın qoymayın!
Pərdə
Kitabxana.az · https://kitabxana.az/en/works/sabit-rehman-yalan-ucuncu-perde
Use ← → keys to move, R for a random poem
More by this author
Üçüncü şəkilİdarənin həyəti. Firuzə və Səməndərli kabinetdən çıxırlar.*
Dördüncü pərdəDördüncü şəkilYenə həmin yer. Firuzə və Səməndərli içəri girirlər.*
DirilərMirzə Cəlil, sənə min rəhmət!*Üç pərdəli, on şəkilli komediya*
Birinci pərdəBirinci şəkilBakıda kiçik bir mətbəə. Bir tərəfdə şrift kassaları, o biri tərəfdə stol, stullar. Küncə çoxlu qəzet yığılıb. Xosrov nə isə yığır. Roza içəri girir.*
Poems by other poets
Bütün zalımların yurdu, İlahi, tarümar olsunFüqərəyə zülm edən şəxsi yaman dərdə düçar olsun
MünacatƏlay, cümlətən məzlum olub məhbus olan canlar,Xüsusən aliciahlar, hacılar, bəylər, müsəlmanlar,
SevgilimGecə-gündüz həsrətini çəkməkdənGünümü eylədim qara, sevgilim,
Rəhmə gəl, eyləmə bu könlümü viran, qara gözRəhmə gəl, eyləmə bu könlümü viran, qara göz,Qorx xudadan, bu qədər eyləmə tüğyan, qara göz,