Doğmaların nəfəsinə qurbanam,Bir görüşü min bir dərdin əlacı.Köhnə dünya təzələndi gözümdə,Naxışlandı min ərişi, arğacı.

Daha bəsdir uzaqlardan baxdığım,Göz yaşına qarışdığım, axdığım.İllər boyu yandırdığım, yaxdığım,Təşnə könlüm bu vüsalın möhtacı.

Bürünmüşəm yaşıllara, göylərə,Qarışmışam kamanlara, neylərə,İndi bildim ucalanda göylərə,Nə deməkdi Məhəmmədin meracı!

Vətən cənnət, şükür olsun Allaha,Körpü saldım dünənimdən sabaha.Ölsəm belə “uf” demərəm mən daha,Bu ziyarət, bu yer Məkkə, mən Hacı!

Use ← → keys to move, R for a random poem

Random poem

More by this author

Poems by other poets