Müştaqəm
Ey yar vəfadarım,Didarına müştaqəm,Ey səhməli şunqarım,Didarına müştaqəm
Hicrin mənə kar etdi,Min dərdə düçar etdi,Bisəbr ü qərar etdi,Didarına müştaqəm
Ey sərvisər azadım,Ey qolları şümşadım,Ey qəmzəsi cəlladım,Didarına müştaqəm
Ey bağça və bustanım,Ey tazə gülüstanım,Ey sünbül və reyhanım,Didarına müştaqəm
Ey ləl ləbi kövsər,Ey mehr üzi ənvər,Ey mah pəri peykər,Didarına müştaqəm
Ey sərvi-xəramanım,Ey gözləri mastanım,Ey əql ü dil cânım,Didarına müştaqəm
Ey könlümün aramı,Vəsl ilə bu əyyamı,Doldur mey ilə camı,Didarına müştaqəm
Ey dərdimə dərmanım,Ey dil şəhrinə sultanım,Ey Yusifi-Kən'anım,Didarına müştaqəm
Ey Qul Hacının yarı,Yar eyləmə ağyarı,Şad et bu dil əfkarı,Didarına müştaqəm
Kitabxana.az · https://kitabxana.az/ru/works/qul-haci-mustaqem