Laçınm, Laçınım- kəsilən əlim,Düşmən caynağında yetim gözəlim.Yolmu var, yanına hayandan gəlim?!Laçınım, Laçınım, yaralı quşum,Kimin var, halını kimdən soruşum?!

Dərdindən oxuyan...”Ay Laçın” deyir.Qalıb o yerlərdə əlacım deyir.Bəs indi mən kimə əl açım, deyim:Laçınım, Laçınım, yolu yoxuşum,Kimin var, halını kimdən soruşum?!

Laçınım, Laçınım,”Kəsmə şikəstə”m,Gah zilə ucalır, gah ötür pəsdən.Həvəsi, nəfəsi, səsi qəfəsdə...Laçınım, Laçınım,yaralı quşum,Kimin var, halını kimdən soruşum?!

Ömrümüz çürüyən ömr oldu niyə,Tanrıdan bu sayaq əmr oldu niyə?Yolların bu sayaq yomruldu niyə?Yolu yomrulmuşum,yaralı quşum,Kimin var, halını kimdən soruşum?!

← → düymələri ilə keçid, R — təsadüfi şeir

Təsadüfi şeir

Müəllifin digər əsərləri

Başqa şairlərin şeirləri