Bəlkə də bu sirri bilmirsən özün,Sən bütün göllərin başısan, Göy göl.Vüqarlı Qoşqarın, qarlı KəpəzinNişan üzüyünün qaşısan, Göy göl.

Gözəllər yuyunur sahillərində,Ürəklər döyünür sahillərində,Şairlər öyünür sahillərində,Gözümdə yaxşıdan yaxşısan, Göy göl.

Yamyaşıl şamlardır kamanın, sazın,Ağlardı bir zaman baharın, yazın.Bir qərib dumanın, bir qızıl qazınBəlkə də gözünün yaşısan, Göy göl...

Arxan uca, şiş dağlara bağlıdır,Göy suların bulaqlara bağlıdır.Baxtın qızıl bayraqlara bağlıdır,Xəzərə ən kiçik bacısan, Göy göl.

Çökəndə üstünə həzin axşamlar,Göylərdə göz qırpıb yananda şamlarDost kimi baş-başa verəndə şamlarSanıram firuzə qaşısan, Göy göl.

Hüsnündür ellərdə dillər əzbəri,Xəyala dalmısan səhərdən bəri.Dillənər tarixin səhifələri –Yuyub qayaları qaşısan, Göy göl.

Sən gərək biləsən səxavətimi,Adına yazaram söz dövlətimi –Bu solmaz hüsnünə məhəbbətimiQəlbində əbədi daşısan, Göy göl.

Sən elə bilmə ki, qocalıram mənEllərin gücündən güc alıram mən.Hüsnünü seyr edib ucalıram mən,Gecənin başının tacısan, Göy göl.

← → düymələri ilə keçid, R — təsadüfi şeir

Təsadüfi şeir

Müəllifin digər əsərləri

Başqa şairlərin şeirləri