Halını soruram dağlar dalından,Ürəyim alışır bu əhvalından.Mən ilham alardım gül camalından,Sən bu gün sevgilim, cananım, Vətən!

Durnanın qatarı keçəndə bir-birSoruram – yurdumun halı necədir?Fəraqında mənə gündüz gecədir,Yolunda qurbandır bu canım, Vətən!

Mənə bir anamdan xəbər söylə sən,O nələr çəkmədi, nələr, söylə sən!Qan içən düşmənə “Yetər!”, söylə sən,Ürəkdə qalmasın fəğanım, Vətən!

Düşmənlər əlində yamandır halın,Qanlara batsa da şəhrin, mahalınBil ki, ölməyəcək böyük amalın,Tarixə ziynətdir bu şanın, Vətən!

İnan, qüvvət gələr yenə diziməMüqəddəs torpağın dəysə gözümə.Əzəldən sən oldun bəzək sözümə,Sənsən mənim şerim, dastanım, Vətən!

Vüsalın qəlbimə qüvvətdir inan,Ürəyim hicrinlə olar pərişan,Sənsiz yaşamaram dünyada bir an,Dolanmaz damarda bu qanım, Vətən!

Gözəldir vətənim, torpağım, yerim,Hüsnündən doymayıb hələ gözlərim.Adına bağlıdır ürək sözlərim,Dolanım başına, dolanım, Vətən!

Hüsnün aşiqiyəm, bilir hər diyar,Səndədir məhəbbət, sonsuz etibar.Könlüm məndən sənə qalmış yadigar,Gəlmir özgə şeyə gümanım, Vətən!

Use ← → keys to move, R for a random poem

Random poem

More by this author

Poems by other poets · Homeland