Bəhramın sarayında Reyhanın otağı, Reyhan və Qaratel çox qəmgindirlər.

Qaratel udda çalır və oxuyur.

Qaratel

Ay bu dağların Reyhanı,
Bəs sənin yarın də hanı?
Gözləri yolda qalan yar,
Yar həsrətilə solan yar.

Mənim sevdiyim yar gələr,
Könlüm onunla dincələr.
Qonaq gələndə bizə yar.
Güllər-çiçəklər açılar.

Mahnı oxunanda mənim könlüm həmişə sınıq bir ney kimi inildəyir. Sən nə üçün belə kədərlisən?

Reyhan

Bax, ay da doğur, amma o hələ də gəlib çıxmadı... Hər gün, hər gecə gözlə dedi... Məni intizar oduna yandırdı. Bax, budur, gözləyirəm... O isə gəlmir...

Qaratel

Hamı yatır, hər tərəf səssizlik içində boğulur.

Reyhan

O nə üçün gəlməsin? O, əhdi-peymanını unuda bilərmi?

Qaratel

Kim bilir, bəlkə də bir fəlakət üz vermişdir.

Reyhan

Yox... Yox, Qaratel, Elçinə bir şey olsa, mən özümü Arazın dalğalarına ataram...

Qaratel

Ah... Reyhan, əzizim, bu fikirləri başından çıxart. Oğlan üçün özünü öldürən qızlara mən heç ağıllı deməram... O olmasın, bir başqası olsun... Nə çoxdur gözəl qamətli oğlanlar. Mən birini sevirdim, xasiyyətini bəyənmədim, dedim bir daha gözümə görünmə. İndi bir başaqasını sevirəm... O da xoşuma gəlməsə, üçüncü bir namizədim var... Oğlan nədir ki, onun üçün özümü öldürüm...

Reyhan

Sən nə danışırsan, əzizim. Mən ona vəfasızlıq edə bilərəmmi? Yox, Qaratel, yox... Vəfalı ürəklər yalnız bir dəfə, yalnız birini sevə bilər...

Qaratel

Yalnız birini? Bu nə sözdür? Sevgi iştahadır. Gündə bir növ xörək istəyir. Mən öz iştahamı küsdürə bilmərəm...

Reyhan

O gəlmədi...

Qaratel

Axı, onlar birdən gəlməsə...

Reyhan

Sən nəyi isə məndən gizlədirsən... Söylə görüm ürəyini belə rahatsız edən nədir?

Qaratel

Heç... heç...

Reyhan

Səni and verirəm ulu göylərə, əgər bir şey bilirsənsə, məndən gizlətmə... Onsuz da mənim taleyim küskündür...

Qaratel

İnan ki, bu xəbəri eşidəndə elə bil ürəyim yerindən qopdu... Mən səhərdən bəri hər şeyi səndən gizlədirdim... Atanla anan mənə tapşırıblar ki, sənə bir kəlmə deməyim...

Reyhan

Aman Allah, yoxsa Elçinin başında bir bəla var...

Qaratel

Yox, mənim ondan xəbərim yoxdur... Sərkərdə Cavanşirin atlıları üstümüzə axışıb gəlir. Bu saat o yanlarda bərk vuruşmadır. Atan bütün əsgərlərini davaya göndərdi. Dedi, ölərəm, bir addım geri çəkilmərəm...

Reyhan

Demək hər şey... Hər şey alt-üst oldu... Nə üçün? Yer üzü insan qanı ilə ləkələnməsəydi nə olardı? Elçin... Elçin, indi sən nə qədər uzaqdasan... Yox, o gələcək... mütləq gələcək. Bax elə bil bu anda mən onun xəfif təbəssümünü, məhəbbətlə titrəyən dodaqlarını görürəm. O gələcək. Qaratel, o mənim bu kimsəsiz könlümü sevindirəcək.

Qaratel

İndi nizələr, qılınclar yer üzünü qara bir bulud kimi sarmışdır. Oralarda insan canavardan belə yırtıcıdır. Onları yarıb keçməyə Elçinin gücü çatarmı? Minlərcə insan üz-üzə gələn yerdən insan nədir, şir də, pələng də sağ-salamat keçə bilməz, Reyhan...

Reyhan

Şir də keçə bilməz, pələng də, amma mənim Elçinim keçər...

Qaratel

Eh... Mənim də ürəyim od tutub yanır... Səni istədiyimdən bu sözləri deyirəm...

Reyhan

Yox... Yox... Gözəllik timsalı olan ayın üzü ləkə götürsə də, Elçin öz qəlbini vəfasızlıq damğası ilə ləkələməz. Onun şirin sözləri, mehriban baxışları bir duman olub havaya uçmaz... O mənə yazmışdı ki, məni səndən yalnız ölüm ayıra bilər... Sən də məndən köməyini əsirgəmə, Qaratel...

Qaratel

Mən nə edə bilərəm? Yollar tutulmuş, şəhərin qapıları hər tərəfdən bağlanmışdır. İndi onu sənin yanına kim buraxar. Hər tərəfə keşikçilər qoyulmuşdur...

Reyhan

Nə üçün? Məgər Elçinin buraya gəlməsini bilirlər?

Qaratel

Yox, bilmirlər... Bu gün axşam Zibeydə xatunu əsir tutub gətirdilər... Keşikçilər də görünür onu qoruyurlar. Deyirlər ki, birdən Cavanşirin adamları basqın edər. Onu əsirlikdən qurtarıb geri aparar.

Reyhan

Kimi dedin, kimi?

Qaratel

Elçinin anası, sərkərdə Cavanşirin istəkli arvadı...

Reyhan

Yox, bu ola bilməz. Atam bu rəzalətə heç vaxt razı ola bilməz... Yəqin bu işdən onun xəbəri yoxdur... Əzizim, sən nəyi isə dolaşıq salırsan.

Qaratel

Atanı o qədər də rəhmdil bilmə... Zibeydə xatunu o özü oğurlatdırmışdır... Keçən gecə bizim adamlar Firuzəabada hücum edib Cavanşirin yay sarayını halqa içərisinə almış, keşikçiləri bir-bir qılıncdan keçirmişlər... Özünü diri tutub gətirmişlər.

Reyhan

İndi o haradadır?

Qaratel

Neçə adamdan xəbər aldımsa, yerini deyən olmadı...

Reyhan

Elçinin anası, köməksiz bir qadın zindanlarda dustaq olsun...

Qaratel

Onun yerini öyrən, Reyhan, sən Elçinin xatirinə ona kömək et...

Reyhan

Ah, ata... Sən necə zalımsan...

Qaratel

O, Cavanşirdən qisas alır. İstəyir ki, Cavanşir qorxub hücum fikrindən daşınsın. Amma o daha da qəzəblənib, qabağına keçən adamları ot kimi biçib tökür... Hələ qorxuram bu gecə Cavanşirin qoşunları şəhərə dolsun...

Reyhan

Gedək, Qaratel, səbr edə bilmirəm...

Qaratel

Hara gedirsən, ehtiyatlı ol. Qaş düzəltdiyin yerdə vurub göz çıxardarsan...

Reyhan

Yox, atam məni tikə-tikə doğrasa da, onu tapıb dustaqdan buraxdıracağam...

Qaratel

Onun yerini sənə deməzlər. Atan Bəhramın qorxusundan göydə quşlar belə qanad salar...

Reyhan

Mən atama yalvaracağam, insafa gəlməsə, mən ondan üz döndərəcəyəm...

Qaratel

O burada deyildir, əzizim. İndi onun nərəsindən yer-göy titrəyir. Get bir az dincəl, axşamın xeyrindən sabahın şəri yaxşıdır...

Reyhan

Ulu Tanrım, nədir mənim günahım, sevən ürəklərin həmdəmi olmaqdan nə üçün düşməni olursan?

Elçin daxil olur. Qaratel yan otağa keçir.

Elçin

Ah... Reyhan, mənim əzizim...

Reyhan

Elçin, sən buraya necə gəldin?

Elçin

Qılıncların, nizələrin ucsuz-bucaqsız dənizlərindən keçərək gəldim...

Reyhan

Səni tutsaydılar öldürə bilərdilər, Elçin...

Elçin

Məni parça-parça doğrasalar da, son nəfəsimdə yenə Reyhan... Reyhan deyə inləməyə qüvvətim çatar...

Reyhan

Of... Elçin, bu fəlakət səni də, məni də məhv edəcək...

Elçin

Ağlama, Reyhan... Ağlama... Məni də, atam Cavanşiri də bu qanlı müharibələrə sövq edən saf bir məhəbbətdir... Odlu qılınclar yer üzünü qan dəryasına qərq etsə də, bu məhəbbət heç bir zaman məhv olmayacaqdır... Odlar yurdunun səadəti sənin, mənim səadətimdir...

Reyhan

Get... Səni and verirəm eşqimizin qüdsiyyətinə, get...

Elçin

Əgər sən bu eşqin ən ağır əzablarına belə qatlaşa bilərsənsə, söylə... Hardadır mənim anam?

Reyhan

Mən özüm də onun yerini bilmirəm... Onu haradasa gizlədib yerini heç kəsə demirlər...

Bəhram gizlindən pərdənin dalında söhbətə qulaq asır.

Elçin

Reyhan, mən onu tapacağam... Anamın namusunu tapdalamaq istəyən o cəlladdan bir intiqam alacağam... Əgər onun üçün həyatımı qurban vermək lazım gəlsə də, bir an belə tərəddüd etmərəm... Söylə, haradadır mənim anam?

Reyhan

Eşidirsənmi, sənin gəlişindən xəbər tutdular.

Elçin

Demək, bilmirsən? Sən ürəyini sıxma, əzizim... Bu qanlı vuruşmalar tezliklə qurtaracaq, insanların əbədi səadəti, bizim taleyimiz güləcək... İntiqam alovu ilə yanan ürəklərimizdə yalnız məhəbbət duyğuları çırpınacaq...

Reyhan

İnan, Elçin, mən onu səbirsizliklə axtaracağam.

Söhrab

Elçin... Elçin, tez ol, gələn var...

Elçin

Gəlirəm, Söhrab, gəlirəm... Reyhan, Zibeydə xatunun oğurlanması bütün Ağvanı ayağa qaldırmışdır. Qoy bilsinlər ki, Zibeydə xatuna toxunan əlləri dibindən kəsib atmaq üçün Ceyran düzündən Qartal kimi atlılarımız üstünə şığıyıb gəlir... Əlvida, əzizim... Gün doğanda məni də, atam Cavanşiri də burada gözlə (Elçin gedir)

Reyhan

Ata... Ata... Sən onu – ipək ürəkli Elçini də qəzəbləndirdin... Nə üçün?

Bəhram daxil olur.

Bəhram

Sənə nə olmuşdur, qızım, niyə çığırdın?

Reyhan

Nə üçün ata, nə üçün?

Bəhram

Səndəki bu həyəcanın səbəbi nədir, qızım? Əgər düşmənin hücumundan qorxursansa, arxayın ol, mən vuruşma meydanından gəlirəm... Cavanşir məğlub olur, geri çəkilir. Kayan ordularının qələbə bayrağı Ağvan dağlarının zirvəsində dalğalanır...

Reyhan

Onun anası, yox... yox bu rəzalətdir ata...

Bəhram

Rəzalət, bu nə sözdür? Söylə görüm səni qəzəbləndirən nədir?

Reyhan

Elçin... Elçin...

Bəhram

O kimdir, qızım?

Reyhan

Atacan, yalvarıram sənə, onu məndən soruşma...

Bəhram

Bu sirmidir, Reyhan? Sən heç bir şeyi öz doğma atandan gizlətmə, qızım. Mən səni kiçik yaşlarından qollarımın üstündə böyütmüşəm. Sənə özüm lay-lay demişəm. Mən sənin səadətin üçün hər bir fədakarlığa hazıram. De, qızım, nə olmuşdur?

Reyhan

Əgər səndə zərrə qədər məhəbbət varsa söylə ata, Zibeydə xatun hanı?

Bəhram

Zibeydə xatun? Sən hara, Zibeydə xatun hara?..

Reyhan

Mən Cavanşirin oğlunu...

Bəhram

Susma, qızım, söylə, nədən qorxursan? De qızım, mən sənə – bir balamın qara gözlərinə and içirəm ki, sənin hər bir arzuna əməl edəcəyəm. De qızım, dərdin, istəyin nədir?

Reyhan

Mən onu... Elçini sevirəm...

Bəhram

Sevirsən?

Reyhan

Dünyalar qədər...

Bəhram

Mənim qızım, mənim qan düşmənimin oğlunu sevir... Bəlkə mən yanlış eşitdim. Bəlkə qulaqlarım məni aldadır...

Reyhan

Yox, atacan, Elçini sevirəm, ölüm belə onun məhəbbətini mənim qəlbimdən çıxarda bilməz. Yalvarıram sənə, ata, Zibeydə xatunun yerini mənə de, Elçin kimi bir oğulun anası bu rəftara layiq deyil...

Bəhram

Yoxsa səni o quduz canavarların balası yoldan çıxarmışdır?

Reyhan

Ona toxunma, ata. Onun qəlbi büllurdan belə safdır. Onun anası Zibeydə xatun...

Bəhram

Mən Zibeydə xatunun qanını içməyə belə hazıram... Mən...

Reyhan

Qadından intiqam almaq? Yox, ata, bu sənin, bütün nəslimizin şəninə ləkə vurar. Yalnız düşmənlərimiz deyil, dostlarımız da, elimiz-obamız da sənə nifrət edər. Hamı sənə lənət oxuyar. Ulu Hürmüzə and olsun ki, Zibeydə xatunun başından bir tük belə əskik olarsa, mən özümü həlak edərəm...

Bəhram

Bəlkə sən düşmənə satılmısan? Mən Zibeydə xatunu odlara atıb külə döndərəcəyəm...

Reyhan

Yox, yox, heç vaxt. Sən yalnız mənim cənazəm üstündən keçib bu cinayətə əl ata bilərsən... Ah... ata...

Bəhram

Suss... Mən şüurumu itirirəm...

Reyhan

Vur... öldür...

Bəhram

Rədd ol qəlbimdən, bala məhəbbəti...

Reyhan

Vur...

Bəhram

Bəsdir, daha mənim səbrim tükəndi...

Reyhan

Nə üçün dayandın, vur...

Bəhram

Rədd ol...

Reyhan

Vur, cəllad ata...

Bəhram

Reyhan...

Pərdə

Use ← → keys to move, R for a random poem

Random poem

More by this author

Poems by other poets