Həyat bağçasının bağbanı bizik,Yarpağı söz açan güllər bizdədir.Bizdən ilham alır şeyda bülbüllər,Nəğməyə can verən dillər bizdədir!

Şairim! İncə söz ustadı bizik,Böyük Vaqiflərin övladı bizik.Sənət dünyasının Fərhadı bizik,Dağlara səs salan ellər bizdədir!

Dərələrdən axan gümüş bulaqlar,Göylərə baş çəkən dumanlı dağlar.Sünbüllü tarlalar, çiçəkli bağlar,Al-əlvan geyinmiş çöllər bizdədir!

Ətirli bağların sarmaşığıyıq,Elin bəzəyiyik, yaraşığıyıq.Eldən törənmişik, el aşığıyıq,Uca boylar, nazik bellər bizdədir!

İnsan sevərmi heç ruhsuz gözəli,Şairin olmasa şeiri, qəzəli.Aşığın olarmı sözü məzəli?Sazı dilləndirən tellər bizdədir!

Dünyamız nəşəylə, keflə doludur:Biz gedən doğru yol – Lenin yoludur.Qolumuz rəhbərin polad qoludur,Qüvvətdən düşməyən əllər bizdədir!

Vahidəm, qüssədən, qəmdən azadam,Xalqımın dostuyam, yadlara yadam.Bəzəkli ölkəmə baxdıqca şadam,Yaşılbaş sonalı göllər bizdədir!

Use ← → keys to move, R for a random poem

Random poem

More by this author

Poems by other poets · Nature and spring