Ey gözüm, aləmi-insanlığa məhrəmsən əgər,Sakit ol məclisi-meyxanədə, adəmsən əgər.

Ürəfa əhli üçün məclisi-mey cənnətdir.Qoyma bu bəzmə qədəm, əhli-cəhənnəmsən əgər.

Mey içib, sərxoş olub, özgəni təhqir eləmə,Sən öz ətvarını təhqir elə, sərsəmsən əgər.

Ölçüdən xaricə çıxma, yıxar axır səni mey,Tutalım ki, hamıdan içkidə möhkəmsən əgər.

Məstü mədhuş zamanında bir ayinəyə bax,Özün öz əksini təsvir elə, aləmsən əgər.

Gör səni badə nə halə salıb, ey xanəxərab!Ağla öz halına bir dəm, nola, xürrəmsən əgər!

Heyfdir badəyə sərf etdiyin ol şanlı həyat,Bilik uğrunda onu sərf elə, hatəmsən əgər.

Mübtəladır bu bəlayə, demə Vahid özü də,Onu da elm ilə təşviq elə, adəmsən əgər.

Use ← → keys to move, R for a random poem

Random poem

More by this author

Poems by other poets · Wine and the tavern