Nə baxırsan oğrun-oğrun,Mənə biganələr kimi.Durum dolanım başına,Şama pərvanələr kimi.

Bağbanlar bəslər meyini,Dönsün seyrağıb löyünü,Yıxıbsan könlüm öyünü,Top dəymiş qalalar kimi.

Gəl gedək Çünə, Maçına,Qurbanam zülfün ucuna,Al məni qoynun içinə,İstəkli balalar kimi.

Dost qapısında dustağam,Tellərinə çox müştaqam,Yar əlindən düyün-dağam,Dağdakı lalalar kimi.

Xəstə Qasım Tikmədaşlı,Könlü qəmli, gözü yaşlı,Göldən uçdu yaşılbaşlı,Silkindi sonalar kimi.

Use ← → keys to move, R for a random poem

Random poem

More by this author

Poems by other poets