Dəniz
Günəş qızıl balıq tək
Dənizdə batdı getdi.
Gümüş səyyarələri
Göydə oyatdı getdi.
Göy-göyərçin ləpələr
Qatar-qatar düzüldü,
Günəşin baxışları
Üfüqlərdən süzüldü.
Aypara oraq kimi
Buludlardan asıldı.
Dəniz şehi sırğa tək,
Göy otlardan asıldı.
Ləpələrin dodağı
Dodağıma dəyincə,
Bir xoş nəğmə eşitdim
Bu vaxt incədən-incə.
– Avarı çək ey, aybəniz,
Qağayıdır yelkənimiz.
Qorxuram ki, bir gün mənsiz,
Bu göy gözlü ləpə, ay qız,
Gül üzündən öpə, ay qız.
Kitabxana.az · https://kitabxana.az/ru/works/islam-seferli-deniz
Клавиши ← → для перехода, R — случайное стихотворение