Hicran düşgünüyəm, gözəl müştağı,Axtarıram bu dünyanı sini-sin.Mürği-ruhum getməz səndən irağa,Qonşun ollam, qəbul etsə sini sin.

Dost bağında bülbül qonmuş a dala,Nazlı dilbər zülfün töküb a dala.Mərd istər ki, çörək verə, ad ala,Namərd gözlər mərd iyidin sinisin.

Ələsgərəm, mən də içdim badə hey,Əbcəd hesabıyla seçdim “ba”də “hey”.Xəstə cismin tab eyləmir bada hey,Heç demirsən: “Gir qoynuma, sin, isin”.

← → düymələri ilə keçid, R — təsadüfi şeir

Təsadüfi şeir

Müəllifin digər əsərləri

Başqa şairlərin şeirləri · Eşq