Durdu,Əl-üzünü yudu o, şehlə,Geydi göy çəməni ayaqlarına.Saçını daradı qövsi-qüzehlə,Bir cüt ulduz taxdı qulaqlarına.

Hardasa qalmışdı bir parça gecə –Götürüb sürmətək çəkdi gözünə.Qızıl dan yerini dərib gizlicəSürtdü yanağına,Sürtdü üzünə.

Günəşin telini tutdu qayçıtək,Laləli yamaca, çölə tələsdi,Seçdi ürəyincə əlvan bir şülək,Özünə bir donluq zərxara kəsdi.

Geyindi-keçindi, bəzəndi, durduBüllur bir stəkan götürdü mələk.Səhər şəfəqiylə onu doldurdu,İçdi axıracan,Son damcıyadək.

Söyüdlü sahillə işə yollandıKürün aynasında baxdı özünə.Onun camalından sular allandı,Bir fərəh yayıldı Muğan düzünə.

Ucaboy qovaqlar, yaşıl söyüdlərBaş əydi obanın gözəl qızına.Hər qızda bir eyib tapan igidlərTənqidçi gözüylə baxdı özünə.

* * *

Ay eloğlu, biz toyuna gəlmişik,Məclisimiz məclislərə calansın.Oyatmaqçın bütün eli, obanıƏvvəl başdan qara zurna çalınsın.

Göy ürgənin ipək kimi yalı var.Onda gəlin aparmağın halı var.Bəy evində neçə xalça-xalı var,Deyin, onlar toyxanaya salınsın.

El bəzənsin yaşıllara, allara,Xələt salın boyunlara, qollara,Nur səpməkçün gəlin gələn yollara,Qoy məşəllər qoşa-qoşa qalansın.

Quzu kimi qoy mələsin balaban,Məclis onsuz keçməz başdan, binadan,Üfüqlərdə ağarınca qızıl danAşıq qardaş ortalıqda dolansın.

Toy ağası, qonaqları başa çək,Bıçaq kütdür, əti kəsməz, daşa çək,Basdırmanı qanlı-qanlı şişə çəkQoy köz üstə cızıldasın, sulansın.

Cəngiylə bir gumbuldasın nağara,Ara vercək qulaq asaq biz tara,Kim xor baxsa bu adətə – mağaraÖmrü boyu duru suyu bulansın.

← → düymələri ilə keçid, R — təsadüfi şeir

Təsadüfi şeir

Müəllifin digər əsərləri

Başqa şairlərin şeirləri