Üçüncü pərdə
Səhifə 2 / 4 · 25%
Çıxırlar. Səhnədə yalnız Humay qalır. Dondurmasatan və Xəlil gəlirlər.
Dondurmasatan
Dondurma, dondurmasız ömrünü başa vurma! Dondurmasız bir dəqiqə durma. Başın ağrıyır: dondurma ye! Dişin ağrıyır: dondurma ye! Dərdin çoxdur: dondurma ye! Yuxun yoxdur: dondurma ye! (Gedir)
Xəlil əlində qəzet, skamyanın üstündə oturur, sonra onun nəzər-diqqətini Humay cəlb edir.
Xəlil (Humaya)
Bacı, mən sizi haradasa görmüşəm. Sabunçu vağzalının tinində qutab satmırsınız?
Humay
Bıy, bu nə sözdür danışırsınız?
Xəlil
Dayan, dayan!.. Zaqatalada fındıq tədarükündə işləmirdiniz?
Humay
Başıma xeyir, gör məni hara aparıb çıxartdı!..
Xəlil
Tapdım-tapdım... diş doktorusunuz?
Humay
A... Ay qardaş, fikrin özündə deyil, nədir? Dünən bizim evdə çalıb-oynamırdıq?
Xəlil
Əşi, bunu bayaqdan de də... Humay xanımsınız. Deyirəm, axı, bu suyuşirin arvad kimdir?
Humay
Mən heç diş doktoruna oxşayıram?
Xəlil
Gəncədə elə sizin kimi xanım-xatın bir doktor vardı, hey darıxanda gedərdim yanına, dişimi çəkərdi.
Humay
Darıxanda əcəb ürəkaçan məşğuliyyət tapırdınız?..
Xəlil
Dünən o gül göndərən adamdan xəbər çıxmadı?
Humay
Xeyr, hələ bir səs-səmir yoxdur.
Xəlil
O olmasın, mən olum. Söhbət məndə nə qədər istəsəniz.
Humay
Siz çox siyasətcil kişiyə oxşayırsınız. Dünən bizə o gül gətirənlə nə pıçıldaşırdınız?
Xəlil
Heç, elə-belə. Kefini xəbər alırdım.
Humay
Başa düşdüm. Bacım qızı belə sevir, atası belə razılıq vermir... Bunlar hamısı bəhanə imiş, hə?
Xəlil
Xeyr, canım, həqiqətdir.
Humay
Bir yandan deyirdiniz xəbərim yoxdur, o biri yandan da deyirdiniz gül göndərən kimdirsə, qabiliyyətli adamdır. Siyasət işlədirdiniz, hə?
Xəlil
İşə düşmədik?
Humay
Bəs, arvadınızı niyə özünüzlə bağa gətirməmisiniz?
Xəlil
Olmayan şeyi necə gətirim?
Humay
Necə, ayrılmısınız?
Xəlil
Anadangəlmə olmayıb.
Humay
Bəs o diş doktoru?
Xəlil
Kim bilir, indi hansı rayondadır...
Humay
Deməli, heç evlənməmisiniz?
Xəlil
İşdən macal tapa bilməmişəm ki?
Humay
İndi, bəs, işləmirsiniz?
Xəlil
Yox, təqaüdə çıxmışam.
Humay
Niyə, hələ cavansınız ki?
Xəlil
İcazə verin bu cavan oğlan yanınızda əyləşsin. Salaməleyküm, nə var, nə yox? (Oturur)
Humay (qalxır)
Niyə, pis deyiləm. Görəsən, gələn dəfə məni kimə oxşadacaqsınız?
Xəlil
İndi daha min adamın içində də olsanız, yenə tanıyaram. Hara belə? Hələ təzə-təzə söhbəti qızışdırırıq.
Humay
Gedim bizimkiləri axtarım tapım. Nigaran qalarlar.
Xəlil
Yanınızla bir kişi xeylağı getsə, etiraz eləməzsiniz ki?
Humay
Nə bilim? Hələlik bir söz deyə bilmərəm!
Danışa-danışa çıxırlar. Səfər gəlib darıxmış halda saata baxır.
Səfər (öz-özünə)
Bu Əliqulu kəsmiş harada qaldı? Bu qədər də geyinib-keçinmək olar? Bəzənməkdənsə, ciblərini doldur. Kişi ki, əllini keçdi, qadınlar onun sifətinə yox, cibinə bənd olurlar.
Rövşən tələsik içəri girir, telefon budkasına yaxınlaşır.
Rövşən (öz-özünə)
Yenə arvadı itirdim. Zəng eləyim, bəlkə bacısıgildədir. (Ciblərini axtarır, Səfərə) Yoldaş sizdə ikiqəpiklik olar?
Səfər (öz-özünə)
Tələsik bir toy bütün düyünləri açar...
Rövşən
Mənim sualıma cavab vermədiniz.
Səfər
Mənim bu saat öz suallarım cavabsız qalıb.
Rövşən
Sən də arvadını itirmisən?
Səfər
Hardadır məndə o bəxt? Al bir neçə ikiqəpiklik. Arvad ki, itib, sən hələ çox zəng eləməli olacaqsan...
Pul verir. Rövşən budkaya girir. Əliqulu xarici görkəmini tamamilə dəyişmiş halda səhnəyə gəlir.
Əliqulu
Hələ gəlməyib? (Səfər onu tanımadığı üçün dinmir) Karsan, səninlə deyiləm?
Səfər
Əliqulu Baloğlanoviç? Maşallah, maşallah, mən sizi heç tanımadım.
Əliqulu
Hə, necədir? İndi bəyənərlər məni?
Səfər
Əvvəlcə elə bildim siz bu cavan sportsmenlərdənsiniz. Adam da bir saatın içində bu cür cavanlaşarmış!
Əliqulu
Bəs necə?! Üstümü unlu görüb, adımı dəyirmançı çağırırdın...
Rövşən telefon budkasından çıxır.
Rövşən (öz-özünə)
Evdə də yoxdur. Məni qınayan, sənə nə deyim? Belə olur ki, şübhələnirəm də...
Əliqulu (Səfərə)
Az qalıb. Yəqin vaxtında gələr, eləmi?
Səfər
Bir az gecikər də... Gözəl arvadlar özlərini ağır tutarlar.
Əliqulu
Batdıq getdik ki... Məndə də hövsələ yox... Adı nə idi?
Səfər
Nazlı.
Əliqulu
Naza deyərik də.
Səfər
O sizin ailə işinizdir.
Rövşən (öz-özünə)
Qəribədir, deyəsən bizim arvaddan danışırlar?!
Əliqulu (Rövşənə diqqətlə baxır)
Səfər, bu adamdan mənim gözüm su içmir.
Səfər
Yazığın arvadı itib.
Əliqulu
Nə xoşbəxt insandır!
[Mənbənin skanında burada mətn itib: kitabın 52–53-cü səhifələri yoxdur.]
Kamal
Onu düz deyirsən. İşi düzüb qoşandan sonra deyərik. Birdən buralara gələr ha!..
Qumral
Gəlməz, hələ anamın ayağı bu bağa dəyməyib...
Kamal
Niyə?
Qumral
Tək gəlməyəcək ki? Atam anamla gəzməyə çıxmağı ayıb hesab eləyir.
Kamal
Deməli, anan buraları heç tanımır?
Qumral
Yox. Mənə inanmırsan?
Kamal
Bilmirəm sənə inanım, yoxsa gözlərimə?
Qumral
Necə ki?
Kamal
O tərəfə bax, gör bura gələn kimdir?
Qumral (baxır, həyəcanla)
Anamdır, bura gəlir, bəs neynəyək?
Kamal
Bu oldu proqramdan xaric. Eybi yoxdur, qoy gəlsin, söhbətdə o da iştirak eləyər.
Qumral
Onda atamın yenə tərsliyi tutacaq. Anam nə desə, atam onun tərsini eləyir.
Kamal
Əcəb sakit həyat sürürlər! Bəs necə olsun, heç nə fikirləşə bilmirəm. Hamısı mənim bəxtimdəndir, işim həmişə gərək tərs düşə...
Gövhər gəlir.
Qumral
Anacan, gəzməyə gəlmisən?
Gövhər
Sənin dərdini çəkməkdən heç bilmirəm neyləyim! Səhərə kimi yatmamısan. İndi də tələsik geyinib getdin. Dalınca qaçmışam. Bilsəydim ki, Kamal yanındadır, arxayın olardım.
Qumral
Sən mənim yatmadığımı haradan bildin, anacan?
Gövhər
Ana övladının hər işini bilir.
Kamal
Xoş gördük, ana!
Gövhər
Səndən də xəcalət çəkirəm, oğul! Əliqulunun üzü qara olsun!
Kamal
Eybi yoxdur, ana, axırı xeyir olsun. (Qumrala) Gör saat neçədir?
Qumral (yavaşdan Kamala)
Vaxtdan keçir, onlar burada görüşəcəklər. Anamı ayrı yerə aparaq, mane olmasın. Ana can, sən bu bağa birinci dəfə gəlirsən?
Gövhər
Yox, qabaqlar olmuşam, ancaq o vaxtlar belə deyildi. İndi çox qəşəngləşib.
Kamal
O tərəfləri daha da gözəl eləyiblər. Gül-gülü çağırır.
Gövhər
Elə bura da yaxşıdır.
Qumral
İstəyirsən, mən gedək o tərəfləri gəzək.
Gövhər
Bu paltarda adam içinə çıxa bilmərəm, eyib deyil?
Kamal
Bizim aramızda gedərsiniz, sizi görən olmaz.
Gövhər
Yox, yox, eyibdir.
Qumral (onun qoluna girir)
Gedək, ana can, gedək!
Kamal
Yaxşı mənzərələr var... Tamaşa eləyək.
Gövhər
Ay balam, məni hara aparırsınız?
Gövhəri aparırlar. Bu yandan Nazlı, Yasəmən Humayı səhnəyə gətirirlər.
Nazlı
Hə, de görək nə oldu?
Yasəmən
Ətraflı danış!
Humay
Dünən bizə bir kişi gəlmişdi ha...
Yasəmən
Hansı, gül gətirən?
Humay
Yox, o biri...
Nazlı
Xəlil dayı...
Humay
Hə, bütün bu işlər onun qurmaları imiş.
Yasəmən
Sən gör nə incə tor toxuyurmuş!
Nazlı
Nə dedi, axı?
Humay
Oradan, buradan, diş doktorundan söhbət salıb, gəldi mətləb üstünə. Mən cavab vermədim, dedim, qoy sizinlə məsləhətləşim, sonra.
Nazlı
Məsləhətdir, bacım, məsləhətdir.
Əliqulu ilə Səfər gəlirlər.
Yasəmən
Danışmayın, gəlirlər.
Nazlı
Yasəmən, sən Rövşənə göz-qulaq ol, qorxuram gəlib aləmi qarışdıra.
Yasəmən
Arxayın ol.
Əliqulu (Səfərə)
Hansıdır?
Səfər
O qəşəngi.
Əliqulu
Doşab almışıq, bal çıxıb ki!..
Nazlı
Siz gedin, mən söhbəti başlayım.
Səfər
Nazlı xanım, Əliqulu Baloğlanoviçlə tanış olun!
Nazlı
Böyük məmnuniyyətlə.
Əliqulu və Nazlı görüşürlər.
Əliqulu (Səfərə)
Sən əkil, amma uzaq getmə.
Səfər
İcazə verin, gözəl hüzurunuzu tərk eləyim.
Humay
Bizi də bağışlayın, Yasəmənlə balaca işimiz var. Qabaqcadan deyirəm: Allah xeyir versin!
Yasəmən
Xeyirli olsun!
Humay və Yasəmən gedirlər. Əliqulu ilə Nazlı səhnədə qalırlar.
Əliqulu
Bacı nə gözəl söz dedi?!
Nazlı
Mənim heç təcrübəm yoxdur. Bilmirəm belə vaxtlarda nə deyərlər, söhbəti nə ilə başlayarlar?
Əliqulu
Belə vaxtlarda əvvəlcə sükut eləmək lazımdır. Yanyana, göz-gözə... Mənim gözlərimdən siz ürəyimdəki sözləri başa düşərsiniz.
Nazlı
Təkcə gözdən nə çıxar ki? Gərək söz deyib, söz eşidək. Qayda belədir.
Əliqulu
Gözəl qaydadır.
Nazlı
Düzü, deməyə bir az utanıram.
Əliqulu
Utanmaq köhnə adətdir, nədən utanırsınız? Həyatın qanunudur.
Nazlı
Düz deyirsiniz, həyatın qanunudur: bir qız bir oğlanındır.
Əliqulu
Əşi, vallah, bu cür sözlərə ürək davam gətirməz.
Nazlı
Ürəyiniz zəifdir?
Əliqulu
Xeyr, canım, cavan adamam, niyə zəif olur ki? Mənim ürəyim barıt çəlləyi kimidir. Kiçik bir oda bənddir, o saat partlayır, alışıb-yanır.
Nazlı
Ürək gərək həmişə alışıb yansın.
Əliqulu
Bax, mən o cür adamam, görəcəksiniz.
Kitabxana.az · https://kitabxana.az/works/sabit-rehman-eliqulu-evlenir-ucuncu-perde
← → düymələri ilə keçid, R — təsadüfi şeir
Müəllifin digər əsərləri
Beşinci şəkilKolxoz klubunun həyəti. Hər tərəf ağaclıq, otluqdur. Salmanov və Mirzə Hüseyn tribuna düzəltmək üçün stol, skamya gətirirlər, dallarınca Kərəmov çıxır.*
Dördüncü pərdəYeddinci şəkilSəhər ertə. Dəmirçi Musanın dükanının qabağı. Dükan bağlıdır. Surxay və bir neçə kolxozçu səhnəyə çıxırlar. Mehralı, Şirəli və sairə kolxozçular onları qarşılayırlar.*
Beşinci pərdəSəkkizinci şəkilXalçalar döşənmiş böyük çəmənlik. Bir tərəfində çay dəsgahı, o biri tərəfdə kabab bişir. Uzaqdan gülmək, oxumaq, tar, kamança səsi gəlir. Kolxozun məhsul bayramıdır. Təzə paltar geyinmiş kolxozçular çəmənlikdə gəzişirlər. Musa və Zalxa səhnədədirlər.*
Xoşbəxtlər4 pərdə, 5 şəkildə*İştirak edənlər