Beşinci pərdə
Səhifə 1 / 3
Altıncı şəkil
Yeni tikilmiş evin qabağındakı meydan. Bu evin birinci mərtəbəsindən şkaflar daşınır. Uzaqdan alqış, musiqi səsi gəlir. Evin qurtarması münasibətilə tikinti işçiləri arasında çağırılmış mitinq artıq qurtarmışdır. Camaat yavaş-yavaş dağılır, Mirzə Salman səhnəyə gəlir, şkafların daşınmasına baxır. Bənövşə ilə Yusif gəlirlər.
Yusif
Demək, sabahdan bütün qüvvəmizi təzə obyektə verməliyik?
Bənövşə
Elədir. (Mirzə Salmana) Komissiya aktı imzaladı. Tez köçün, orderləri verməyə başlayıblar.
Mirzə Salman
Dərziyə köç dedilər, iynəsini sancdı yaxasına.
Yusif
Mindillinin dalınca yenə adam göndərilib?
Mirzə Salman
Deyir, bərk xəstədir.
Yusif
Dünən futbolda imiş.
Bənövşə
Ona yalandan bülleten verən doktoru məsuliyyətə almaq lazımdır.
Yusif
Bir, o Qasıma bax ha... Bu gün yenə gəlmişdi mənim üstümə, tərcümeyi-hal istəyirdi. Əl çəkmir, aləmi vurub bir-birinə.
Bənövşə
Təqsir o idarə rəhbərlərində, o məhkəmə sədrlərindədir ki, avara, fırıldaqçı bir adamın böhtan ərizələrinə aylarla vaxt sərf eləyirlər.
Mirzə Salman
Bircə balansa qol çəkilsəydi... Bu Camal da...
Yusif (onun sözünü kəsir)
Camaldan xəbər yoxdur ki, Bənövşə? Hara getdi, nə oldu, bilmədiniz?
Bənövşə
Yox, öyrənə bilmədim. Neçə vaxtdır gedib, məsuliyyət hiss eləmir ki... (Çıxır)
Yusif
Yəqin, çox nigarandır. Nə bizim sözümüzə baxdı, nə də nişanlısının. Bilmirəm doktora nə dedisə, o da bizdən üz döndərib getdi.
Mirzə Salman
Doğrudan, Yusif, doktora nə oldu? Neçə vaxtdır, gözümə dəymir.
Yusif
Bakıya, qızını gətirməyə getdiyini eşitdim. Başa düşmürəm, niyə gəlib çıxmır?
Zərifə qoltuğu dolu kitab səhnəyə gəlir.
Zərifə (oxuya-oxuya)
Akademik Pavlovun nəzəriyyəsinə görə bədəndəki prosesləri və mübadiləni nizama salan mərkəz, – beyindir... Kəllənin əsas hissəsində beyin yerləşir. Beyin iki hissədən ibarətdir: böyük beyin, balaca beyin. (Kitabdan ayrılaraq) Of, xalq bu qədər sözü başına necə doldurur, bilmirəm? Bütün günü kitabdan gözümü götürmürəm, ancaq heç nə beynimdə qalmır. Səhifənin ayağını oxuyuram, başı yadımdan çıxır.
Yusif
Nə üçün sizdə birdən-birə bu qədər həvəs əmələ gəlib?
Mirzə Salman
İmtahana hazırlaşır. Təzədən həkimlik eşqinə düşüb.
Zərifə
Ata, o sözü bir də mənə demə. “Həkimlik eşqinə düşüb...” Bu səfər ölsəm də gərək Tibb İnstitutunu qurtaram. İmtahanı su kimi verəcəyəm. Qəmər mənimlə hər gün məşğul olur.
Yusif
Qəmər xanımla harada məşğul olursunuz?
Zərifə
Bizim evdə. O qədər xətrimi istəyir ki, Bakıdan qayıdanda düz bizə gəldi. Doğru demirəm, ata?!
Mirzə Salman
Mənim qızım xəbər yaymaqda radionu da ötür.
Zərifə
Radio nədir? Mənim fikrimi qarışdırma, ata! Dərsimi öyrənirəm, Qəmər soruşacaq.
Yusif
Doktor bu saat sizdədir?
Zərifə
Onu deməzlər. (Kitabı oxuya-oxuya gedir) Kəllənin içində beyin yerləşir... Beyin iki hissədən ibarətdir... (Çıxır)
Mirzə Salman
Yoldaş baş mühəndis, doktor sənə çox lazımdır?
Yusif
Deyəsən, xəstələnmişəm, Mirzə, məsləhətləşmək istəyirəm.
Mirzə Salman
O cür xəstəlikləri mən yaxşı bilirəm. Qorxuludur! Təcili müalicə eləmək lazımdır.
Yusif
Sizin sözlərinizin gizli mənası var, Mirzə! Mənimlə açıq danışın. Söz altında söz deməyi sevmirəm.
Mirzə Salman
Bəs körpü altında dəyirman tikməyi, yarpaq altında quş tutmağı necə, sevirsən?
Yusif
Heç bir şey başa düşmürəm.
Mirzə Salman
Bir az yaxın gəl ki, eşidən olmasın. Doktorun ürəyinə odu vurub, çəkilib durmusan bir tərəfdə. O yazıq da səsini çıxarda bilmir, tüstülənə-tüstülənə qalıb.
Yusif
Yanılırsınız, Mirzə! Əgər elə olsaydı, Qəmər məndən qaçmazdı.
Mirzə Salman
Onu da bil ki, kölgə insanı təqib eləyən kimi qısqanclıq da məhəbbəti təqib eləyir. Qısqanclıq da kölgə kimi qaradır.
Yusif
Qısqanclıq? Nə üçün? Ortada ki, heç bir səbəb olmayıb.
Mirzə Salman
Məhəbbət bəzən o qədər güclü olur ki, adamı elə çaşdırır ki, heç bir səbəb olmadan da qısqanmağa başlayır. Eh... Onu mən yaxşı bilirəm. Eşq əhlinin halını məndən al xəbər. Mən özüm o yolun mərdanəsiyəm. İndi başa düşdün, yarpaq altında quş tutmaq nə deməkdir?
Yusif
Siz mənim ən müqəddəs, ən gizli sirrimi açıb kitab kimi oxudunuz, Mirzə!
Mirzə Salman
Özünü möhkəm saxla, hələ sənə bir xəbər də verəcəyəm.
Yusif
Nə xəbər?
Mirzə Salman
Doktor xəstəxanadan çıxıb order almağa gedəcək. Ona da sənin bu tikdiyin evdə mənzil verirlər. Ordan da bura gələcək.
Yusif (həyəcanla)
Nə vaxt?
Mirzə Salman
Daha saatını, dəqiqəsini deyə bilmirəm. Huşyar ol. Səni qəflət yuxusundan bir dəfə ayıltdım, bəsdir.
Yusif (özünü itirir)
İndi yəqin oradadır... Mən gedim. Deyirsən, bura gələcək? Sonra çıxmış olar, burada gözləsəm yaxşıdır. (Gedir, tez qayıdır) Mirzə, mən buralarda olacağam, heç yerə getməyəcəyəm. (Çıxır)
Mirzə Salman (gülür)
Eh... Gərək mən cavan olaydım.
Mindilli içəri girir.
Mirzə Salman
Gəldin?
Mindilli
Özüm gəlmədim, gətirdilər.
Mirzə Salman
Yaxşı da elədilər. Haradasan?
Mindilli
Xəstəyəm.
Mirzə Salman
Necə xəstəsən ki, küçələri veyil-veyil gəzirsən, futbola gedirsən, pivəxanaya gedirsən, amma idarəyə gələ bilmirsən? Bir aydır işdən çıxmısan, niyə təhvil verməmisən?
Mindilli
Yoldaş, cibimdə bülletenim var. Of, ürəyim sancdı, doktor tapşırıb ki, əsəbiləşmə.
Mirzə Salman
Düz deyir, əsəbiləşmə. Sakit təhvil ver, sonra get nə qədər istəyirsən yat.
Mindilli
Neyləyim? Yatım? Bir onu görməyəcəksiniz. Mənim hələ məhkəmədə danışmalı çox sözüm olacaq.
Mirzə Salman
Mən deyirəm get evdə yat, çarpayının üstündə.
Mindilli
Hə, o ayrı məsələ. Çarpayıda uzanmağa etiraz eləmirəm. Bəs mənim şkafım haradadır? Aləm qarışıb bir-birinə.
Mirzə Salman
Mənim kağızlarımla işin olmasın.
Mirzə Salman öz kağızlarını götürüb gedir. Mindilli cəld hərəkətlə şkafları axtarır. Zərifə gəlir.
Zərifə (əlində kitab)
Kəllənin içində beyin var... Aha, vətəndaş, orada, mənim atamın kağız-kuğuzlarını niyə iyləyirsiniz?
Mindilli
Sənin iyini bu kağızlardan alıram, Zərifə!
Zərifə
O nə idi cibinə qoydun?
Mindilli
Zərifə, nə gir-gir girləmisən məni? Niyə mənim başıma fırlanırsan? Aramızda daha məhəbbət yoxdur?
Zərifə
Məhəbbət yoxdur, nifrət var. Nifrət olanda gərək düşməni gözdən qoymayasan. Sənin pencəyin niyə belə birtəhər durur? (Əli ilə yoxlamaq istəyir)
Mindilli
Əlini vurma, qıdığım tutur.
Zərifə
Əşi, bu kitablar da yalan yazır. Bütün kəllələrdə beyin olmur ki. Boş kəllələr o qədərdir?!
Mindilli
Bəs vaxtilə sən mənə ayrı sözlər deyirdin.
Zərifə
Onda mən bilmirdim ki, sən dörd evi viran qoymusan, dörd dəfə evlənib, dörd dəfə də boşanmısan, səkkiz dəfə də ZAQS-a getmisən.
Mindilli
Böhtandır. Məni sən əsəbiləşdirmə, bülletenim var. Böhtandır.
Qasım içəri girir.
Zərifə
Budur, bax, əziz dostun da təsdiq eləyər, düz demirəm, Qasım?
Qasım
Siz nə desəniz düz deyirsiniz, gözəl deyirsiniz. Ancaq bilmirəm neyləyirsiniz ki, səsiniz bu qədər məlahətli, duzlu-məzəli çıxır?
Zərifə
Prokurorun səsi mənimkindən də məlahətli, duzlu, məzəlidir. Bu gün telefonoqram verib, səni axtarır. (Çıxır)
Qasım
Axır zamanlar hamı bizi prokurorla qorxudur.
Mindilli
Mənim arvadlarımın siyahısını ona sən vermisən?
Qasım
Bu saat arvad məsələsi ilə məşğul olmaq zamanı deyil. Neçə vaxtdır haradasan? Heç mənim halımı soruşmursan. Otuz yeddi yerə ərizə vermişəm. Üç dəfə məhkəmənin qərarını ləğv elətdirmişəm. İşə iki dəfə ali məhkəmədə baxıblar. Yenə də əl çəkən deyiləm. Məni bu idarədən çıxaran hələ anadan olmayıb.
Mindilli
Anadan olub, Qasım, olub, bu saat divarda əmrini oxudum!
Qasım
Bu gün?
Mindilli
Elə indicə.
Qasım
Onda, yəqin, ali məhkəmə bu səfər daha rədd eləyib. Eybi yoxdur. Ərizə verməyə idarə çox... Bura min dənə komissiya tökəcəyəm.
Mindilli
Yenə komissiya? Əşi, xata çıxartma, dayan!
Qasım
Üz vurma.
Qasımla Mindilli gedirlər. Bənövşə və Ceyran xala içəri girirlər.
Bənövşə
Səndən nə əcəb, anacan! Yəqin evə tamaşa eləməyə gəlmisən?
Ceyran xala
Görürəm, çox gözəl tikmisiniz. Ancaq...
Bənövşə
Səndə söz var, anacan!
Ceyran xala
Heç...
Sükut olur.
Bənövşə
Nə var, niyə belə incimiş danışırsan?
Ceyran xala
Mən evdə rahat otura bilmirəm. Camal hara gedib, nə olub?
Bənövşə
Hara getdiyini mən də bilmirəm. Bəlkə Bakıya gedib, məndən şikayətə!..
Ceyran xala
Sən ona neyləmisən ki, şikayət eləyir?
Bənövşə
İşdən çıxarmışam.
Ceyran xala
Qız öz nişanlısını işdən çıxardar?
Bənövşə
Bəs necə eləyəydim? Nişanlımdır deyə, bütün nöqsanlarına göz yumaydım?
Ceyran xala
Bənövşə, bəlkə ayrı fikrə düşmüsən?
Bənövşə
Sən də məni başa düşmürsən, ana? Mənim istədiyim nədir? İşdə də, ailədə də, saf olmaq, təmiz olmaq... Amma o, işi də, ailəni də öz şəxsiyyətinə qurban eləmək istəyirdi. Ətrafına topladığı çirkin adamlardan şübhələnməkdənsə, məndən şübhələnməyə, hətta qısqanmağa başladı. Nahaqdan qısqanmaq qadın üçün ən böyük təhqirdir. Sən isə dərdimə yanmaqdan, məzəmmət eləyirsən... (Ağlamsınır)
Kitabxana.az · https://kitabxana.az/works/sabit-rehman-nisanli-qiz-besinci-perde
← → düymələri ilə keçid, R — təsadüfi şeir
Müəllifin digər əsərləri
Dördüncü şəkilYeni tikilmiş istirahət evinin böyük həyəti. Otaqlar rəngləndiyindən iş stolları həyətə çıxarılmışdır. Qabaq planda Nəsirovun stolu. Arxa tərəfdə də stollar var. Stolların üstündə telefon aparatları qoyulmuşdur. Mürşüd və Sadıq səhnədə kağızlara, proyektlərə baxırlar.*
Dördüncü pərdəBeşinci şəkilİstirahət evi hazırdır. Hər yan bəzənib, ağaclardan rəngli fənərlər asılıb. Pərdə açıldıqda uzaqdan orkestr səsi gəlir. Cavanlar oynaya-oynaya səhnədən keçirlər. Sadıqla Mürşüd oynayaraq gəlirlər. Musiqi kəsilir.*
Yalan3 pərdəli, 14 şəkilli komediya*İştirak edənlər
Birinci pərdəBirinci şəkilKüçə. Aslan gəlib ətrafa diqqətlə baxır, heç kimsənin olmadığını görüb fit çalır, əlində portfel olan Fərman tələsik səhnəyə çıxır.*