Birinci pərdə
Səhifə 3 / 4 · 50%
Nə yox?
Maral
Yoxlamamışıq.
Nəsirov
Necə yəni yoxlamamışıq? Siz mənim gözümə bir cür dəyirsiniz, başınızı harada itirmisiniz?
Bərbərzadə və Maral utanaraq başlarını aşağı dikirlər
Mirzə Qərənfil! Bəs necə olub ki, sən belə bir şeyə yol vermisən?
Mirzə Qərənfil
Müqavilənamə hər dəqiqə yoxlanır...
Nəsirov
Çox gözəl, ona mən özüm göz olaram. (Çöldən oxumaq səsi eşidilir) Bu nə səs-küydür? Bu “Segah” oxuyan kimdir?
Bu halda Usta Segah oxuya-oxuya içəri girir.
Usta Segah (oxuyur)
Hər kəsin, kim can üçün bir mehriban cananı yox,
Elə bilsin cismi var, amma içində canı yox.
Nəsirov (Usta Segaha qəzəblə)
Sənin nə ixtiyarın var istehsalatda “Segah” oxuyursan.
Usta Segah (oxuya-oxuya)
Bu sualında buraxdın bir səhv.
Nəsirov
Bu nədir, Mirzə Qərənfil?.. Bu kimdir?
Mirzə Qərənfil
Bu mənim sizə dediyim məşhur rəngsazdır.
Nəsirov
Rəngsaz olanda nə olar? Gərək oxuyub istehsalatı başına götürsün? Ay yoldaş rəngsaz, yaxın gəlin.
Usta Segah (oxuyur)
Düzdü, mən rəngsazam, rəng çəkirəm.
Evlərə bir yeni ahəng çəkirəm.
Nəsirov
Qurtardı. De görüm, nə üçün istehsalatda “Segah” oxuyursan?
Usta Segah (oxuya-oxuya)
Yenə də səhv buraxdın, qafil!
Nəsirov
Oxuma! Bu nədir, estrada artisti deyilsən ki? Açıq de görək, nə üçün “Segah” oxuyursan?
Usta Segah (oxuyur)
Mən “Segah” oxumuram, “Çahargah” oxuyuram.
Nəsirov
De görüm, bəs nə üçün oxuyursan? İstehsalatda oxumaq olmaz.
Usta Segah
Olar, çünki:
Musiqi yaxşı qidadır bədənə,
Rəhmət olsun səni qoyub gedənə.
Nəsirov
Saxla şerin qabağını! Bu nədir, canım? Kişi, bu dəqiqə mənə de görüm, sən nə üçün dəmlənib gəlmisən?
Usta Segah
Nə? Xeyr! Səhvin var! Mən həyat aşiqiyəm, şərab içmərəm.
Nəsirov
Bəs nə üçün iş üstə özünü bu cür aparırsan? Müxtəsər cavab ver! Boş söz lazım deyil! Vaxt lazımdır!
Usta Segah
Əhsən, vaxt qızıldır, amma eşq...
Can vermə qəmi-eşqə ki, eşq afəti-candır...
Nəsirov
Saxla!
Usta Segah
Eşq afəti-can olduğu, məşhuri-cahandır.
Nəsirov
Saxla, yoxsa bu saat milis çağırtdıraram.
Usta Segah
Milis? Milis nə üçün? Əvvəla, siz məni əyləmisiniz, mən sizi yox. İkinci, bu gün istirahət günüdür, istəsəm lap “Simayi-şəms” oxuyaram. Onun heç kəsə dəxli yoxdur. Üçüncü, məni bura dəvət ediblər, özbaşıma gəlməmişəm.
Nəsirov
Canım, sən nə uzunçu adamsan? Yaxşı, yaxşı, get işinə.
Usta Segah
Gedirəm! Gedirəm rəng çəkəm dər-divara,
Sənət əhli qala bilməz avara.
(Oxuya-oxuya gedir)
Guşi qıl ey ki, bilirsən özünü vaqifi-kar,
Agah ol gör ki, nədir naleyi-ney, nəğməyi-tar.
Nəsirov (onun arxasınca baxıb gülümsünür)
Məzəli adamdır. Maral... Sən bu gün işçilərin iş şəraitini yoxlamalısan. Bununçün sənə on beş dəqiqə vaxt verirəm.
Maral
On beş dəqiqənin içində, yoldaş Nəsirov...
Nəsirov
Gəl bir yerdə gedək və məsələni yerində həll edək, iş vaxtına yarım saat qalır, sən tək getsən, üç saat onlara nitq danışarsan. (Bərbərzadəyə və Mirzə Qərənfilə). Siz də gedin, öz işinizlə məşğul olun!
Mirzə Qərənfil
Yoldaş Nəsirov!
Nəsirov
Yox, bir kəlmə artıq söhbət olmamalıdır. Gedək, Maral yoldaş!
Maral və Nəsirov gedirlər.
Bərbərzadə
Həmişə bu Nəsirov yoldaşla söhbət eləyəndən sonra mənim iştaham açılır. (Cibindən yemək çıxarır). Mirzə Qərənfil, yemək istəyirsənmi? Buyur, qonaq ol!
Mirzə Qərənfil
Yox, Bərbərzadə, mənə toxunma, mən dərd çəkirəm.
Bərbərzadə
Dərd çəkməkdənsə, istəyirsən verim bir papiros çək.
Mirzə Qərənfil
Yox, Bərbərzadə! Mənim ömrüm düyümlənib, həyat məni dar çəkmə kimi sıxır.
Bərbərzadə
Axı, nə olub, ay Mirzə Qərənfil? Açıq danış. Dərdin ailə dərdidir?
Mirzə Qərənfil
Axmaq deyiləm ki, ailə dərdi çəkim.
Bərbərzadə
Bəs nə dərdin var?
Mirzə Qərənfil
Nə deyim, Bərbərzadə, mənim bu boyda şəhərdə dörd divarım yoxdur ki, içində bu qiymətsiz həyatımı sona çatdırım. Mənim dərdim otaq dərdidir, otaq, otaq!
Bərbərzadə
Bəs sən bu saat harada yaşayırsan?
Mirzə Qərənfil
Heç yerdə! Demək olar ki, mən bu saat heç yaşamıram.
Bərbərzadə
Axı haralarda gecələyirsən?
Mirzə Qərənfil
Heç yerdə. Gecəm qarışıb gündüzə, gündüzüm qarışıb gecəyə, yuxu ilə həqiqəti bir-birindən seçə bilmirəm. Dünən gecə görürəm ki, mənə təzə ev veriblər, durub yüyürmüşəm Baksovetə ki, orderi verin. Deyirlər, nə order, nə zad... Əmi, yuxu görmüsən?..
Bərbərzadə
Ərizə yazmısan?
Mirzə Qərənfil
Soruşma, Bərbərzadə, soruşma. O qədər ərizə yazmışam ki, barmağım mazol olub. Ancaq nə olsun ki... heç bir nəticəsi yoxdur. Ümid nə qədər istəsən verirlər, amma otaq yox...
Bərbərzadə
Mirzə Qərənfil, heç qəm yemə, sənin otağın məndə.
Mirzə Qərənfil
Bərbərzadə, ayağa qalx, yanıma gəl, səni qucaqlayım.
Bərbərzadə
Yox, Mirzə Qərənfil, dayan, qoy mən də sənə dərdimi söyləyim. Əgər mənim dərdimə əlac tapsan, sənin işin öz-özünə düzələcək.
Mirzə Qərənfil
De görüm, o necə dərddir ki, mənim dərdimin dərmanıdır?
Bərbərzadə
Mənim dərdim eşq dərdidir!
Mirzə Qərənfil
Yaxşı, mənlik nə var ki?
Bərbərzadə
Sənlik çox iş var! Qulaq as. Mən onu sevmişəm, o da məni.
Mirzə Qərənfil
Yaxşı, daha sizə mane olan nədir ki? Bir otaq tapsanız işiniz düzələr.
Bərbərzadə
Otaq var. Mirzə Qərənfil, otaq var.
Mirzə Qərənfil
Hanı?
Bərbərzadə
Məndə, mənim bir evim var ki, dörd otağı, vannası, quxnası...
Mirzə Qərənfil
Bərbərzadə icazə ver, səni qucaqlayım. Demək, sənin dörd otağın var?
Bərbərzadə
Var, necə bəyəm?
Mirzə Qərənfil
İkisini ver mənə.
Bərbərzadə
Nə danışırsan, Mirzə Qərənfil? Heç otaqdan da əlborcu olar?
Mirzə Qərənfil
Əlborcu istəmirəm, həmişəlik bağışla.
Bərbərzadə
Ağzımda sənə deyirəm ki, xeyir işim var. Ancaq mən sənin dərdinə dərman eləyərəm. O qızı ki, mən sevirəm, onun da otağı var.
Mirzə Qərənfil
Çox əcəb!
Bərbərzadə
Biz qovuşan kimi o canan köçüb gələr mənim xanəmə. Onun da evini sənə bağışlayarıq.
Mirzə Qərənfil
Yox, Bərbərzadə, bu bir az nisyə söhbətə oxşayır. Yaxşı, bir də görək, mənim vəzifəm nədir?
Bərbərzadə
İndi o canan ilə mənim aramda bir məhəbbət körpüsü lazımdır, gəl, sən bu vəzifəni boynuna götür.
Mirzə Qərənfil
Deyirsən, otağı var?
Bərbərzadə
Var.
Mirzə Qərənfil
Onda razıyam. Bəs, yaxşı, de görüm, o canan kimdir?
Bərbərzadə
Maraldır!
Mirzə Qərənfil
Özü maral kimidir, yoxsa, adı Maraldır?
Bərbərzadə
Adı da Maraldır, özü də maral kimidir.
Mirzə Qərənfil
Adı Maraldır? Hansı Maral? Yoxsa bizim yerli komitə Maral?
Bərbərzadə
Özüdür ki, var!
Mirzə Qərənfil
Ədə, o Maral adama otaq verər? Allah verdiyi canı ondan ala bilmir.
Bərbərzadə
Ey, ey, özünü yığışdır. Məhəbbəti tənqid eləməzlər.
Mirzə Qərənfil
Yaxşı, de görüm, mən necə körpü olum? Vəzifəm nədir?
Bərbərzadə
Sənin qabiliyyətin var, ona bir şeir yaz. Şeir insanlardakı məhəbbəti daha da coşdurur. Şeri oxu, fikrini bil, görüm toyu nə vaxta təyin eləmək istəyir. O zaman sənin otaq məsələn düzələr. Arxayın olummu?
Mirzə Qərənfil
Fikirləşərəm...
Bərbərzadə
Fikirləş! Hələlik sən yavaş-yavaş qafiyələri yığ, şeri yaz, mən də bir bəhanə ilə o cananı sənin yanına göndərim.
Sənubər içəri girir.
Sənubər
Mirzə Qərənfil! Bir dəqiqə və gizli.
Bərbərzadə
Başın ayrı işlərə qarışar, mən yaddan çıxaram ha...
Mirzə Qərənfil
Sən arxayın ol!
Bərbərzadə
Arxayınlıq içində olasan! (Çıxır)
Sənubər
Mirzə Qərənfil!
Mirzə Qərənfil
Mirzə Qərənfil sənə feda olsun dəstəsi ilə.
Sənubər
Bəs hanı verdiyin vəd? Səni səhərdən axtarıram.
Mirzə Qərənfil
Baxəbər olmamışam, mənim kəbutərim!
Sənubər
Kəbutər? Kəbutər nədir?
Mirzə Qərənfil
Quşdur.
Sənubər
Quşdur?
Mirzə Qərənfil
Bəli, quşdur. Dünyada nə qədər quş varsa, hamısına sən oxşayırsan, mənim şahinim!
Sənubər
Şahini başa düşdüm, yəqin yenə quşdur. Mirzə Qərənfil!
Mirzə Qərənfil
Mirzə Qərənfil sancılsın sənin yaxandan! Buyur görək.
Sənubər
Otaq tapa bilmədin?
Mirzə Qərənfil
Darıxma, mənim sığırçınım! Otaq üçün bir plan qurmuşam ki, gəl görəsən.
Sənubər
Plan?
Mirzə Qərənfil
Bəli, plan. İndi bu saat otaq tapmaq müharibə eləmək kimi bir şeydir. Gərək əlində hərbi planın olsun, sağ cinahın, sol cinahın olsun.
Sənubər
Mən düşmürəm.
Mirzə Qərənfil
Necə yəni düşmürsən?
Sənubər
Mən ixtisar eləyib danışıram. Demək istəyirəm ki, başa düşmürəm.
Mirzə Qərənfil
Burada mənim ürəyim səndən incidi. Sən niyə mənimlə ixtisar eləyib danışırsan?
Sənubər
Mən hamı ilə ixtisar eləyirəm.
Mirzə Qərənfil
Özgələri ilə eybi yoxdur, ancaq mənimlə yox.
Kitabxana.az · https://kitabxana.az/works/sabit-rehman-xosbextler-birinci-perde
← → düymələri ilə keçid, R — təsadüfi şeir
Müəllifin digər əsərləri
Başqa şairlərin şeirləri
Talada sevmişəm mən bir şahbazı,Sərv boyu tuba boya tən edər.
Dərbəndli AğabəyəEy əzizim, bu qədər raği-həmam olma,Mərdümi-qafil, tənpərvər və əyyam olma.
GözlərinGülzar Xotəndir dövreyi-zülfün,Çərayə durubdur ahu gözlərin,
OlsunBütün zalımların yurdu, İlahi, tarümar olsunFüqərəyə zülm edən şəxsi yaman dərdə düçar olsun