Birinci pərdə
Səhifə 4 / 4 · 75%
Sənubər
Yoldaş Nəsirov deyir ki, az danış, çox iş gör. Düşürsən?
Mirzə Qərənfil
Hə, indi düşdüm.
Sənubər
De görüm necə plandır? Tez ol, darıxıram.
Mirzə Qərənfil
Qulaq as. Mən sənin yolunda bu qiymətsiz canımdan gündə on dəfə keçərəm.
Sənubər
Təşəkkür!
Mirzə Qərənfil
İndi bir de görüm, sən mənim yolumda neylərsən?
Sənubər
Eləyərəm.
Mirzə Qərənfil
Yox, daha bu cür ixtisar ilə danışmaq olmaz. Məhəbbətdə ixtisar olmaz. De görüm, mənim yolumda özünü qurban verərsənmi?
Sənubər
Buna bax ha... Mən özümü qurban versəm, sən qalarsan tək, gedib taparsan ayrısını.
Mirzə Qərənfil
Müvəqqəti deyirəm də. Yəni özünü yalandan qurban ver.
Sənubər
Düşmədim.
Mirzə Qərənfil
Bu saat düşərsən. Bir də görüm, Bərbərzadəni tanıyırsan?
Sənubər
Yıram.
Mirzə Qərənfil
İndi ki, “yırsan”, çox gözəl. Haman Bərbərzadəyə bu yaxınlarda dörd otaq veriblər, sağında quxna, solunda vanna.
Sənubər
Hanı? Aldın?
Mirzə Qərənfil
Mənə verməyiblər ey, Bərbərzadəyə.
Sənubər
Ax, zadəyə.
Mirzə Qərənfil
Bəli, zadəyə, zadə də təkdir, subaydır.
Sənubər
Ona kim gedər axı?
Mirzə Qərənfil
Gedər, gedər! O dörd otağa səkkiz qız almaq olar. Mətləb onda deyil... Sənubər, əvvəlcə gözümün içinə de görüm, məni sevirsənmi?
Sənubər
Virəm.
Mirzə Qərənfil
Yox-yox... bütöv de!
Sənubər
Sevirəm.
Mirzə Qərənfil
Hə, əgər həqiqətən məni sevirsənsə, onda Bərbərzadəyə ərə get.
Sənubər
Necə? Səni sevib, Bərbərzadəyə gedim?
Mirzə Qərənfil
Yalandan deyirəm ey...
Sənubər
Mirzə Qərənfil, bir stəkan su hazırla, ürəyim gedəcək.
Mirzə Qərənfil
Yox, getməsin, suyu hələ açmayıblar. Qulaq as, mənim turacım! Gör bir nə plan qurmuşam. Mənə təzədən otaq, kim bilir, nə vaxt verəcəklər. Otaq tapmasaq da evlənmək olmaz.
Sənubər
Mirzə Qərənfil!
Mirzə Qərənfil
Mirzə Qərənfil xəlçə kimi sərilsin ayaqlarına. Qulaq as! Bərbərzadənin dörd otağı var. Sən Bərbərzadəyə yalandan ərə get, bir aydan sonra ayrıl. İşi ver məhkəməyə. Qanunla otağın ikisi sənə düşər, ikisi ona. Sən otaqlara sahib olan kimi ZAQS-dan təvəqqe eləyərik ki, bizi qeyd eləsin.
Sənubər
Mirzə Qərənfil!
Mirzə Qərənfil
Mirzə Qərənfil şəhid olsun sənin yolunda. Heç etiraz eləmə, işimiz düzəlib.
Sənubər
Axı, sən işin o biri tərəfini fikirləşmirsən.
Mirzə Qərənfil
Hansı tərəfini?
Sənubər
Bəlkə Bərbərzadə məni almaq istəmədi?
Mirzə Qərənfil
O məndə.
Sənubər
Bəs, bu biri tərəfi?
Mirzə Qərənfil
O hansıdır?
Sənubər
Bəlkə bir aydan sonra boşamaq istəmədi?
Mirzə Qərənfil
Ondan arxayın ol. İki gün də saxlamaz. Sənin qədrini o haradan biləcək? Razısan?
Sənubər
Yaxşı, onda fikirləşərəm.
Mirzə Qərənfil
Fikirləş, fikirləş, mənim tovuzum!
Sənubər
Yenə quş?
Mirzə Qərənfil
Quş olmayıb nə olacaq ki?
Nəsirov (balkona çıxır)
Sənubər, kağızlar haradadır?
Sənubər
Şkafdadır...
Nəsirov
Gətir, qol çəkim.
Sənubər
Üstə! (Çıxır).
Nəsirov
Mirzə Qərənfil, o yana getmə, bura gəl!
Mirzə Qərənfil balkona çıxır, gözdən itirlər. Mürşüd bir tərəfdən, Sadıqov biri tərəfdən səhnəyə gəlib kefsiz yan-yana oturlar.
Sadıq
Küsdü.
Mürşüd
Mənimki də küsdü.
Sadıq
Getdi.
Mürşüd
Mən güclə yola saldım. Ayağını dirəmişdi ki, getmirəm.
Sadıq
Nə istəyirdi?
Mürşüd
Gəzmək. Deyir ki, səhərdən axşama kimi qol-qola verib düşək bu küçələrin canına. Bəs səninki nə istəyirdi?
Sadıq
Uşaq.
Mürşüd
Necə yəni uşaq?
Sadıq
Uşaq da, balaca tifil. Axı mən övladı neyləyirəm? Ağlayıb işləməyə qoymayacaq.
Mürşüd
Heyf, subaylıq, heyf, subaylıq! Başımızı noxtalayıb vermişik bir zənən xeylağının əlinə... Sadıq!
Sadıq
Sadığın taleyi ucu dolaşıq düşmüş bir kələf sapa çevrildi.
Mürşüd
Sadıq, sən necə bilirsən, bu bəladan qurtarmaq üçün bir çarə yoxdur?
Sadıq
Yoxdur. Dünyanın bütün alimləri yığışıb baş sındırsalar, yenə də bir çarə tapa bilməzlər.
Mürşüd
Alimlər tapa bilməsələr də, bizim köhnə kişilər onun dərmanını yaxşı deyiblər.
Sadıq
Nədir?
Mürşüd
Dişin ağrıyır – çək qurtar, qonşun pisdir – köç qurtar, arvadın pisdir – boşa qurtar. Çarə tapıldı?
Sadıq
Ay Mürşüd, diş nə qədər bərk ağrısa, yenə çəkdirməyə adamın ürəyi gəlmir.
Mürşüd
Bəs neyləyək? Sənətimizi, işimizi atıb gedək düşək parklara, bulvarlara? Yox, Sadıq, mənim arvadımı sən yaxşı tanımırsan, bir məsələ ki, onun beyninə girdi, ərsinlə qazıyıb çıxarmaq olmaz. Ayrılaq, qoy onlara dərs olsun.
Sadıq
Razıyam. Mən getdim ərizəmi verməyə.
Mürşüd
Mənim ərizəm çoxdan hazırdır, gedək.
Sadıq
Bu gözəl bina tikilib qurtarandan sonra özləri səhvlərini başa düşəcəklər.
Mürşüd
Güman eləmirəm. Mənim kimi canlı adam onu başa sala bilməyəndən sonra bu dilsiz bina neyləyə bilər?
Sadıq
Bu dilsiz binanı biz öz sənətimizlə dilləndirəcəyik. Gedək.
Mürşüd
Gedək.
Çıxırlar.
Pərdə
Kitabxana.az · https://kitabxana.az/works/sabit-rehman-xosbextler-birinci-perde
← → düymələri ilə keçid, R — təsadüfi şeir
Müəllifin digər əsərləri
Başqa şairlərin şeirləri
Talada sevmişəm mən bir şahbazı,Sərv boyu tuba boya tən edər.
Dərbəndli AğabəyəEy əzizim, bu qədər raği-həmam olma,Mərdümi-qafil, tənpərvər və əyyam olma.
GözlərinGülzar Xotəndir dövreyi-zülfün,Çərayə durubdur ahu gözlərin,
OlsunBütün zalımların yurdu, İlahi, tarümar olsunFüqərəyə zülm edən şəxsi yaman dərdə düçar olsun