İkinci pərdə
Səhifə 1 / 5
İkinci şəkil
Yenə həmin yer. Axşamüstüdür. Səhnənin arxasından gülüş və oxumaq səsləri eşidilir. İşçilər mahnı oxuya-oxuya işdən çıxırlar.
Birinci işçi
Əcəb havadır!
İkinci işçi
Lap yorulmuşam. Gəl, buradan kəsmə yol ilə gedək, evə tez yetişərik.
İşçilər gedirlər. Nəsirov və Bərbərzadə gəlirlər.
Nəsirov
Bərbərzadə!
Bərbərzadə
Bəli, yoldaş Nəsirov!
Nəsirov
Avtobus hazırdırmı?
Bərbərzadə
Hazırdır, yoldaş...
Nəsirov
Yoldaşsız!.. Bəs niyə xəbər verməmisən? Bunlar yenə evlərinə piyada getməyə hazırlaşırlar.
Bərbərzadə
Bu saat... Yoldaşlar, siz zəhmət çəkib...
Nəsirov
Dayan, dayan, sən yenə mətləbi uzadacaqsan, qoy özüm deyim, yoldaş işçilər! (İşçilərin bəziləri dayanır, bəziləri geri dönüb ona qulaq asırlar) Bu parkın aşağısında bizim avtobusumuz dayanıb, siz onunla evinizə gedə bilərsiniz. Səhər də yenə onunla işə gələcəksiniz.
Bərbərzadə
Ay yaxşı oldu ha, yoldaş Nəsirov. Yol gözümü almışdı.
Nəsirov (Bərbərzadəyə)
Gördün? Bu cür müxtəsər danışmağı öyrən.
Hamısı çıxır. Mürşüd, Sadıq içəri girirlər.
Mürşüd
Gəl, görək, gəl, avtobusa minib şəhərin o tərəflərini bir az hərlənək.
Sadıq
Sən get, mənim gəzməli halım yoxdur.
Mürşüd
Elə mənim də kefim yoxdur. Arvaddan küsməyim heç yadımdan çıxmır.
Sadıq
Bu cür işi yaddan çıxarmaq olar?
Mürşüd
Demək, cavan yaşımızda olduq dul kişi. Anketdə yazacaqlar: birini alıb boşayıb.
Sadıq
Nə deyirlər, desinlər, qurtardıq. Araba yolu qurtardı. Həyatımızın dəmir yolu başlayır.
Mürşüd
Tərsinə, ay dəli, həyatımızın əziyyətli, zəhmətli dəmir yolu qurtardı. Hava yolu başlandı. Mənim ruhum bu saat təyyarə kimi uçur.
Sadıq
Düz deyirsən, mənimki də. Ruhumun təyyarəsinə minib, hara istəsəm, gedəcəyəm, nə istəsəm, eləyəcəyəm.
Mürşüd
Gəzərik, oxuyarıq, oynayarıq, dünyanı tərsinə çevirib, başımıza keçirdərik.
Sadıq
Ora bax, ay çıxır, ayın gözəlliyi adama ancaq subay olandan sonra çatırmış.
Mürşüd
Təbiət gözümün qabağında qaytağı vurur.
Sadıq
Eh, kefim qalxdı.
Mürşüd
Nə qiyamətdir amma! Kef çəkirik...
Sadıq
Yaxşı, bu gecə biz harada yatacayıq?
Mürşüd
Təbiətin qucağında. Quşlar bu çiçəklərin, güllərin arasında necə yatırlarsa, biz də elə.
Sadıq
Amma gecəni səhərə kimi quş olmaq məni heç açmır. Quş olmaq mümkündür bir saat, iki saat. Sonra bir yorğan ilə bir döşək tapıb arasına girsəm daha yaxşı olar.
Mürşüd
Ruhdan düşmə. İkimiz bir otaq tapıb yaşarıq.
Sadıq
Otaq tapmaq asandır ki? Arvadı boşamaqda yalnız bir şeyə heyfim gəlir, otağa. Sən mənim evimi görməmişdin. Çox gözəl, rahat ev idi. İki otaq, çarpayı, priyomnik, yazı stolu... heyf!
Mürşüd
Mənim evim üçotaqlı idi. Otağın biri mənə məxsus idi. Eh, boz at da öldü, Murtuzəlibəy də.
Sadıq
Heyf deyil sərbəst həyat, heyf deyil subaylıq! Cəhənnəmə olsun otaq da, priyomnik də, yazı stolu da!
Mürşüd
Arvadı boşayandan sonra fikrim açılıb, iştaham açılıbdır. Bilirsən səsim necə açılıb. Lap bülbül kimi cəh-cəh vurur. Bir qulaq as... (Oxuyur)
Axşam oldu, hey,
Şamlar yandı.
Tez ol, tez ol, ay Sadıq,
Qaranlıqlandı.
Gülüşürlər.
Sadıq
Nə kef çəkirik. Bax, arvadsız həyat buna deyərlər.
Mürşüd
Oxumağına oxuduq, amma, doğrudan da, axşam oldu. (Əsnəyir)
Sadıq
Bəli, axşam oldu, həmişə bu vaxtı mən çörək yeyərdim.
Mürşüd
Həmişə bu vaxtı mən balkonda oturub çay içərdim. Amma bu gün indidən yuxum gəlir. Yuxum da bilir ki, işim dardadır, bu gün tez təşrif gətirir. Bilirsən nə var, Sadıq? Dur gedək Nəsirovdan icazə alaq, istirahət evinin otaqlarının birində gecəni keçirək.
Sadıq
Nəsirov icazə verərmi?
Mürşüd
Sən onun dilini bilirsən. O qayda ilə danışsan, icazə verər.
Sadıq
Bu cür boş oturmaqdan bir şey çıxmaz. Bir təcrübə eləyək.
Mürşüd
Sən get yoldaş Nəsirovu oralarda axtar, mən isə burada olum, bəlkə bu tərəflərə gəlib çıxdı...
Sadıq
Uzaq getmə, sonra tapmaram. Qərib adamıq, ayrı düşməyək, bu skamyanın üstündəcə otur.
Sadıq çıxır. Usta Segah içəri girir. Əlində rəng vedrəsi və fırça var.
Usta Segah
Bərbərzadə, Bərbərzadə. (Oxuyur) Hüzura gəl, a Bərbərzadə, əlində badə, pay-piyadə. (Mürşüdü görüb ona yaxınlaşır) Aha, möhtərəm yoldaş mühəndis! Səni mən xeyli zamandır gəzirəm. Bərbərzadəni tapmıram ki, işıq düzəltdirib işə davam eləyəm.
Mürşüd
Usta, bu qaranlıqda iş olmaz. Get, səhərdən gəlib işləyərsən.
Usta Segah
Xeyr, Bərbərzadəni tapıb işığı düzəldə bilsək, səhərə kimi işləyərəm, bu binanın içini tamam qurtararam. O ki, qaldı xaricinə: xarici xeyli çətindir, bilirəm. Sizin yanınızda lövbər salmaq olar? (Əyləşir) Axşam vaxtı burada tək oturmağınızdan məqsəd nədir?
Mürşüd
Heç, usta, elə-belə oturmuşam, kef üçün.
Usta Segah
Xoşum var, əhsən! Təbiətdən ki, zövq almağı bacarırsan, demək, ruhun var. Bu gözəlliyə, bu rənglərə bax. Hələ sən yarpaqların öpüşməyinə diqqət elə. Buna təbiətin musiqisi deyərlər. Mən hər gecə bu musiqiyə qulaq asmamış evimə getmirəm. Hey... gənclik indi nə qədər xoşbəxtdir. Mən sənin yaşında olanda bütün günü fəhləlik eləyib gedərdim kasıb bir daxmaya. Çörəyimi göz yaşlarımla isladardım. Amma indi sən... Bu saat səni evdə rahat həyatın, gözəl ailə və bunlardan daha gözəl gənc xanımın gözləyir... Hey... ailə... arvad... xoşbəxtliyin əsasıdır. Neçə ildir evlisən?
Mürşüd (dik qalxır)
Usta, məni bağışla, tələsik getməliyəm, vacib işim var.
Usta Segah
Bilirəm, oğul, bilirəm. Gənclik belədir, bir dəqiqə belə, öz ailələrindən ayrı yaşaya bilmirlər.
Mürşüd
Bağışla məni! (Pərt halda çıxır)
Usta Segah
Dayan, ay oğul, mən də səninlə yoldaşam. Bəs bizim Gülər necə oldu. Gülər, ay Gülər.
Xoş ol zaman ki, cavandım, vüsalə məhrəm idim,
Nə mübtəlayi-bəla, nə müqəyyədi-qəm idim. (Çıxır)
Usta Segah çıxır. Uzaqdan oxumaq və gülüş səsləri eşidilir. Ayın işığı yarpaqların arasından səhnəyə düşür. İnci əli qoynunda düşüncə içərisində səhnəyə çıxır. Gülər bu biri tərəfdən gəlir. O yan-bu yana baxır. Getmək istərkən, İncinin orada olduğunu görür, yaxınlaşır.
Gülər
Bağışlayın... İstirahət evində iş çoxdan qurtarıb?
İnci
Bilmirəm, mən özüm də onu bilmək istəyirdim.
Gülər (ona yaxınlaşıb diqqətlə baxır)
İnci!
İnci
Gülər!
Gülüşürlər.
Gülər
Ay qız, bura gəl görüm. Sən burada neyləyirsən?
İnci
Bəs, sən burada neyləyirsən?
Gülər
Mən bir ildir buradayam. Ərimlə gəlmişəm.
İnci
Mən də ərimlə gəlmişəm. Bir ildən artıqdır buradayam.
Gülər
Bu bir ildə bir dəfə də sənə rast gəlməmişəm. Ay qız, teatra, kinoya, parka niyə çıxmırsan? Ər sənin üçün bu qədər şirin olub?
İnci
Məndə o xoşbəxtlik haradandır? O qədər dərdim var ki...
Gülər
Dərdin nədir, ay qız? Mən bugünkü kimi heç bir zaman özümü xoşbəxt hiss eləməmişəm.
İnci
Amma mən bir tərəfdən xoşbəxtəm, o biri tərəfdən bədbəxt!
Gülər
Bədbəxt tərəfi yaddan çıxart, xoşbəxt tərəflə yaşa... Gəl otur. İşləmirsən ki?
Skamyanın üstündə otururlar.
İnci
Yox, səhvim onda oldu ki, işləmədim, oldum ev qadını. Sən necə?
Gülər
Mən işləyirəm. Beş-altı gündür ki, bəxtəvər olub məzuniyyətə çıxmışam.
İnci
Kaş bura gəlməyəydik!
Gülər
Düz deyirsən. Bura mənə heç düşmədi. (İnci ağlamsınır). Yaxşı, daha ağlama. Mən ağlamıram, sən niyə ağlayırsan?
İnci
Mən ağlamayım, bəs kim ağlasın? Bir ölüm, bir ayrılıq, heç biri olmayaydı. Necə olsa, yoldaşlıqdır. Adama təsir eləyir.
Gülər
İstəmirəm o cür yoldaşlığı. Sərbəstlik heyf deyil!
İnci
Demə, Gülər! Yanıram!
Gülər
Ay qız, sən niyə yanırsan? Yoxsa?..
İnci
Necə sən niyə yanırsan? Bəs bu hadisələr mənim başımda deyil?
Gülər
Ay qız, yoxsa sən də?..
İnci
Elə mən də... Ay qız, bəlkə sənin də başına gəlib?..
Gülər
Bəs necə? Mən bayaqdan onu deyirəm də...
İnci
Sən məni kövrəltdin, Gülər. (Gözünü silir) Demək, ikimiz də bir dərddəyik. Ərə çoxdan getmişdin?
Gülər
Bir ildən artıq idi. Ağlama! Möhkəm ol!
İnci
Necə olsa, ay Gülər, ər spiçka qabı deyil ki, boşalan kimi atasan. Ürək öz dərdini çəkir.
Gülər
İnci, sənə rast gəldiyimə o qədər sevinirəm ki! Dur gedək, bir az dərdləşək. Gecəni də bizdə qalarsan.
İnci
Yox, ay Gülər, pəncərələri açıq qoyub gəlmişəm. Külək qalxar, vurub sındırar.
Gülər
İstəyirsən gedək pəncərələri bağla, sonra yenə qayıdarıq.
İnci
Daha bir də sən niyə gedirsən?
Gülər
Eviniz uzaq deyil ki?
İnci
Yox, bu parkın ayağındadır. Bəs səninki necə?
Gülər
Kitabxana.az · https://kitabxana.az/works/sabit-rehman-xosbextler-ikinci-perde
← → düymələri ilə keçid, R — təsadüfi şeir
Müəllifin digər əsərləri
Üçüncü şəkilPərdə qabağı*
Dördüncü pərdəDördüncü şəkilYasəmən pərdə qabağına çıxır.*
Şirin bülbül1**Elə bir zamandan danışıram ki, böyüklərin xatirəsində çox yaxşı qalıb, kiçiklərin isə heç ağlına gəlməz.
Nəfəs puluƏsgər ağa konyak butulkasını boşaltdıqdan sonra qolunun bütün qüvvəti ilə bağın aşağısına doğru fırlatdı və ayağa durub donuq gözləri ilə o yan-bu yana baxmağa başladı.Uzaqdan qulağına incə bir zarıltı gəldi.
Başqa şairlərin şeirləri
Getməz qonaq budur ki aliyi-mədardənTa yetməsə xəbər ona fəsli-bahardən
GöründüXublar küçəsinə güzar eylədim,Muraz1 bağçasının barı göründü.
Qəddü rəftarı ol şuxun ki, könlüm mübtəlasıdırQəddü rəftarı ol şuxun ki, könlüm mübtəlasıdır,Anun hər işvəsi guya bir əhli-dil bəlasıdır.
GözlərinGülzar Xotəndir dövreyi-zülfün,Çərayə durubdur ahu gözlərin,