Şimşəkquyruq söylənci
Bir gün Daryaş bir at görür Sakdağda,
At igidin yaraşığı, adıdır.
Quyruğundan şimşək qopur çapanda,
At igidin yaraşığı, adıdır.
Yaxınlaşmaq istəyəndə o qaçır,
Quyruğunun tüklərindən od saçır,
Tuta bilmir nə at tutan, nə atçı,
At igidin yaraşığı, adıdır.
Minik vermir Şimşəkquyruq heç kimə,
Baxmır bu at muşquruğa, deyimə,
Şındırpalaz, tunc, toxunma geyimə,
At igidin yaraşığı, adıdır.
İstəyirlər döl tutalar bu atdan,
Tumarlayır onu hərə bir adda,
Gözdən itir o dumanda, buludda,
At igidin yaraşığı, adıdır.
Ağız atır, şıllaq atır çoxuna,
Çoxlarını buraxmayır yaxına,
Yol verməyir kimsə ona toxuna,
At igidin yaraşığı, adıdır.
Ancaq bir gün Daryaş ona təpinir,
Alır onun şıltaqlıqla, kopünü,
Atır, çəkir ağ boynuna ipini,
At igidin yaraşığı, adıdır.
Şimşəkquyruq oynaqlayır, kişnəyir,
Şaha qalxır, saya salmır heç nəyi,
Təkcə hərdən o, Daryaşı dinləyir,
At igidin yaraşığı, adıdır.
Minir Daryaş, olur dağlar çaparı,
Yorğa çapır, çapır başı yuxarı,
Yarır çəni, yala, döşə çıxarır,
At igidin yaraşığı, adıdır.
Ürəklənir, diləklənir kim görür,
Görən ona Şimşəkquyruq ad verir,
Bu at yerdən sıçraq qopur, dəbərir,
At igidin yaraşığı, adıdır.
Daryaş sanki bir də qalxdı,dirildi,
At yiyənin, yiyə atın dirisi.
Görmək üçün Atı gəldi el-oba,
At yiyənin, yiyə atın dirisi.
Daryaş dedi: – Mən basılmaz olmuşam,
Bu atı da mən tanrıdan almışam,
Yeni qana, yeni gücə dolmuşam,
At yiyənin, yiyə atın dirisi.
Gəlsin indi yüzlər, minlər, yüzminlər,
Gəlsin görsün gücümüzü Alp Tunqər,
Qabağımda qatdanacaq o kəhər,
At yiyənin, yiyə atın dirisi.
Mindiyardan Əkbitəni qoparram,
Parsdiyarı çox-çox uzaq aparram,
Şahlığımı Parsdiyarda yaparam,
At yiyənin, yiyə atın dirisi.
Bunu deyib çapdı,getdi uzağa,
O qaldırdı neçə eli ayağa,
Döndü yelə, quraqlığa, sazağa,
At yiyənin, yiyə atın dirisi.
Şimşəkquyruq başraq oldu çoxuna,
Yaraqlılar döndü coşqun axına,
O başladı orda, burda qırğına,
At yiyənin, yiyə atın dirisi.
Darvidelli başraq tutub and içdi,
Nə qoşuldu, nə danışdı, nə köçdü,
Misirelə gizli yüz-yüz qız qaçdı,
At yiyənin, yiyə atın dirisi.
Sanna dedi: – Vuruşaram Daryaşla,
Çəkilərəm Sak dağına Balaşqla,
Aldadaram o sırtığı göz-qaşla,
At yiyənin, yiyə atın dirisi.
Qız toplumu, balasqelli, çuqçu var,
Oturacaq öz yerində Parsdiyar,
Ona kimi güc göndərər Mindiyar,
At yiyənin, yiyə atın dirisi.
Sanna çıxdı qabağına Daryaşın,
Qız toplumu, çuqçu, Balaşq, minbaşı,
Gördü Daryaş Darvidellə barışıb,
At yiyənin, yiyə atın dirisi.
Kitabxana.az · https://kitabxana.az/works/sohrab-tahir-simsekquyruq-soylenci
← → düymələri ilə keçid, R — təsadüfi şeir
Müəllifin digər əsərləri
İki qardaş, iki oğul, iki qoç,Hərə dibdaş olmalıdır ölkəyə,
Tuncay-Yanqu söylənciYanqu durub xısın-xısın ağlayır,Göz yaşı var, el içində uludur.
Manyurd söylənciManaylaşıb Manyurd yeri yarandı,Ana hər gün, ata hərdən öyülür.
Karş söylənciÇox çəkmədi, qaçqın üzə dirəndi,Çox üz vermə çox-çox üzlü qaçqına.
Başqa şairlərin şeirləri
Müshəf cəmalından yay qaşlarındanOxudum bir kəlmə ayə, mən dilbər,
KəramətƏya ey mərdümi-aləm, baxın bu bir rəvayətdir,Bu əsrin xalqına ancaq münasib bir hekayətdir
Ey mənim laləzər çiçəkli bağçamEy mənim laləzər çiçəkli bağçam,Gülüstan qoynunda fəvvarə vuram,
Məhəmməd bəy Arifə cavabMən kimi xəstəyə əlbəttə ki, həmam gərək,Necə kim aşiqə bir yari-güləndam gərək.