Ağzı xeyir sözlüm, incimə məndən,Yar yardan ayrılmaz, bülbül çəməndən.Demə ki, düşmüşdür saçlarıma dən,Ürək qocalmayır, ürəyim sənsən.

Mən qul olmamışam şöhrətə, ada,Sənsiz yaşamayım bir gün dünyada.Gözəllər, cananlar min-min olsa da,Mənim bu dünyada mələyim sənsən.

Könül heç doyarmı sən tək gözəldən,Sən oldun qismətim hökmi-əzəldən.Sağ olsun bu xeyir işi düzəldən,Müqəddəs əməyim, diləyim sənsən.

Yusifin, Vaqifin görüm var olsun!Aybəniz hamıdan bəxtiyar olsun!Yüz il də Vurğuna Xavər yar olsun!Ən əziz sirdaşım, köməyim sənsən!

← → düymələri ilə keçid, R — təsadüfi şeir

Təsadüfi şeir

Müəllifin digər əsərləri

Başqa şairlərin şeirləri · Eşq