Cavanşirin sarayı

Söhrab

Girdman tacirləri həmişə günorta üstü yola düşürlər, bu gün nədənsə zınqırov səsləri çox tez eşidildi. Görəsən bu karvanlar hara gedir?

Saran

Onlar getmir, gəlir... Yəqin böyük hökmdarımız Cavanşirə hədiyyə gətirirlər.

Söhrab

Cavanşir özgələrinin hədiyyəsinə möhtac deyil.

Saran

Boş xəzinəmiz belə hədiyyələrə möhtacdır, vəzir, aha, mən deyəndir... hədiyyə gətirirlər.

Söhrab

Sən bunu nədən bilirsən?

Saran

Karvanın önündə bir atlı da var...

Söhrab

Girdman taciri Qənimət də karvanın qabağında gedəndə həmişə atlanır...

Saran

Bu atlı tacirə bənzəmir. Bizim tacirlər uzun əba, dikburun çəkmə geyirlər. Amma bu gələn atlının əynində parıltısı göz qamaşdıran qısa cəng libası var. Çəkmələri isə mirvari ilə bəzənmişdir. Bax, qızıl bazubəndi buradan da görünür... Yəqin böyüklərdəndir. Kim bilir, bəlkə bir ölkənin hökmdarıdır.

Söhrab

Bu axşam xəzinədar olsa da, düz deyirmiş...

Saran

Vəzifənin böyüklüyü ağlın dərəcəsini artırsaydı, sən yenə də həmişəki qədər mənasız danışmazdın.

Söhrab

Aha, karvan dayandı... Ey, açın sarayın darvazalarını, əziz qonaqları ehtiramla qarşılayın...

Saran

Xəzinə bomboşdur, gecələr gözümə yuxu getmir.

Söhrab

Suss...

Saran

Mən səni nəzərdə tuturam... Çoxdan bəri boş xəzinəyə vəzirlik edirsən...

Söhrab

Suss dedim...

Saran

Bu sirri hamıdan gizlətsəm də, Cavanşirdən gizlətməyəcəyəm. (Gedir)

Söhrab

O mənim cinayətimi açıb söyləyənə kimi, mən onun qəbrini qazmalıyam.

Bəhram və qasid daxil olurlar.

Qasid

Ağvan hökmdarı Cavanşirin sarayı budurmu?

Söhrab

Siz kimsiniz?

Bəhram

Mən Sasani qoşunlarının sərkərdəsi Bəhramam.

Söhrab

Doğrudanmı? Cavanşirin sarayına gələrkən qorxmadığınıza təəccüb edirəm. Siz çox cəsur adamsınız...

Bəhram

Biz böyük hökmdarınız Cavanşirlə görüşməyə gəldik. Onun xəzərilər üzərindəki qələbəsi hamımızı sevindirmişdi. Təbrik üçün gələn elçiyə toxunmazlar...

Söhrab

Elçiyə toxunmasalar da, sizə toxunarlar. Unutmayın ki, Cavanşirin babalarından yadigar qalmış Muğan torpağını qəsb edən sizsiniz...

Polad

Görünür, biz bura nahaq gəlmişik...

Bəhram

Demək mən geri qayıtmalıyam...

Söhrab

Yox... yox, mən belə demədim... Hökmdarımızı gözləyin, sizdən başqa Bizansdan, Suriyadan, Gürcüstandan, elçilər gəlmişdir.

Saran

Hədiyyələrə baxdım, qızıla vurulsa beş yüz min dinar qiyməti var...

Bəhram

Bu qoca kimdir?

Saran

Bu vaxtacan xəzinədardım, indi isə vəzirimizə təlxəklik edirəm...

Bəhram

Gülməli qocadır...

Saran

Cibi boşalmış xəzinədara qoca olmasa da gülərlər.

Bəhram

Təlxək hökmdarı əyləndirər, sən nə üçün vəziri əyləndirirsən?

Saran

Məsələ uzundur. Bir zamanlar vəzirimiz Söhrab pulları oynadırdı, son vaxtlar nədənsə məni oynadır...

Söhrab

Qoca, hər sözün yeri var, çəkil get...

Saran

Hara gedim? Dar ağacına, yoxsa qoyun otarmağa.

Bəhram

Bu sözünü də anlaya bilmədim...

Saran

Bütün sözlər anlaşılmaq üçün söylənilsə idi, vəzirimiz Söhrab ömründə bir kəlmə də olsun dinib danışmazdı. Dar ağacı yaxşıdır... Qoyunların sayını artırsam vəzirimiz onlara da sahib çıxacaq. (Gedir)

Söhrab

Onu dəli zənn etməyin, Cavanşirin ən yaxın müşaviridir...

Bəhram

Onu tez susdur, eşidirsənmi?

Söhrab

Eşidirəm, əziz qonaqlara ehtiram göstərmək borcumuzdur, buyurun...

Gedirlər.

Saran

Mən Bəhramdan çox razıyam, onun hədiyyələri bizə bir il kifayətdir. Amma doğrusu, bir şeydən qorxuram...

Söhrab

Nədən, qoca?

Saran

Qızılların səsindən...

Söhrab

Sən yenə də sayıqlayırsan?

Saran

Göylərə and olsun ki, yox... Mən yalnız qulaqlarımla eşitdiklərimi, gözlərimlə gördüyümü danışıram. Qızılların səsi doğrudan da qorxuludur... Özü də bilirsən nə vaxt?

Söhrab

Nə vaxt?

Saran

Gethagetdi başlayanda, sən ki, bunu yaxşı bilirsən...

Söhrab

Qoca, sən bu boş danışıqlarından əl çək...

Saran

Xəzinəmiz dolsun ki, mən bir kəlmə danışmaram...

Söhrab

Xəzinəni boşaldan sənsən, alçaq... Mən səni bu gün zindana saldıraram, alçaq...

Saran

Məni öldürsən də öz günahlarını azalda bilməzsən. Vicdan ləkəsini qanla da yumaq olmaz...

Söhrab

Get fərmanımı gözlə...

Saran

Gözlərəm həm sənin fərmanını, həm də Cavanşirin.

Söhrab

Bu saat zindana...

Pərdə

Клавиши ← → для перехода, R — случайное стихотворение

Случайное стихотворение

Другие произведения автора

Стихи других поэтов