Gəlin
Saldı ol qönçə dəhanın məni sevdaya gəlin,Necə ki gül yanağı bülbülü qovğaya gəlin,Gördü göz düşdü canım ah ilə yüz vaya gəlin,Məcnun oldum düşübən vadiyi-səhraya gəlin,Nə gəlin və nə gəlin zinət və zibaya gəlin
Xoş gülüş, xoş danışıqdır, məzəli cümlə sözü,Xubi, xoş xəsləti, xoş mahi-münəvvərdi üzü,Üzülür can, üzülür gər süzülür ala gözü,Məzəli, çox məzəli, qəmzəli qayətdə özü,Ağ üzü gül yanağı lələi-həmraya gəlin
Saç uzun, gərdən uzun, qamətidir sərvi-rəvan,Qaş qara, göz piyalə, dişləridir, pistə dəhan,Şux yanaq, lə'l dodaq, ləhcəsində canlar alan,Sinə meydan, məməsi qübbə, gözəl incə miyan,Dolu büt, canlı topuq, sərbəsər ağ maya gəlin
Qırmızı yaylıq əlində gül dəsmal, ləçəki,Sarı köynək geyinib cümlə (midaxil) ətəki,Nimtənə xalis zibayi-müzəyyən bəzəki,Zərbalaq dizlik ayağında bənövşə çiçəki,Sağrı başmaq, corabı xəmsə geyib paya gəlin
İki pistanı arasında həmail asılıb,Yəni fincan köbəyin üstə qızıl gül asılıb,Düzülüb yaxasına qızıl yaxalıq kəsilib,Qolda qol bağı, ətəkdə ətəklik asılıb,Mərhəbalər bu qədər surət və simaya gəlin
Naqahan gördü gözüm, çıxdı müəllaya gəlim,Dedim: ey qönçədəhan, bircə yavaş get, mən ölüm,Dərdim artıxdı, dayan, bir danışaq, ağrın alım,Yıxılım payinə mən, dərdimi bu cana salım,Durubən sərv kimi başıma sal saya gəlin
Ağı ağ, qırmızısı lalə-i-əhmər kimidir,Əti ağ, əndamı ağ, sinəsi mərmər kimidir,Çəkilib qəddi onun sərvi-sənubər kimidir,Məmələr şəhd-şəkər, qəndi-mükərrər kimidir,Gəldi cənnət pərisi sən kimi o baya gəlin
Mənə bir şahi-cahan, rəhm ilə qurbanın olum,Ölərəm ölməyimi fəhm ilə qurbanın olum,Dutaram damanını zəhm ilə qurbanın olum,Zülmi-qəhhara baxıb səhm ilə qurbanın olum,Vermə gəl Tarı üçün Zakiri rüsvaya gəlin
Kitabxana.az · https://kitabxana.az/ru/works/sekili-molla-qasim-zakir-gelin
Клавиши ← → для перехода, R — случайное стихотворение