Çimnaz xanım yuxudadır
Страница 2 из 3 · 33%
Nabat
Bütün dünyanın qoşunlarını üstümə töksən də çəkilməyəcəyəm.
Qafar
Yox, bunun başı xarab olub. Nabat, yoxsa döyülməyin çatıb?
Nabat
Yox, hələ çatmayıb.
Qafar
Çəkil.
Nabat
Olmaz, olmaz, olmaz!
Qafar
Yaxşı, niyə axı?!.
Nabat
Niyəsi odur ki, Çimnaz xanımın başı bərk ağrıyırdı. Getdi yatmağa... İndi o şirin yuxudadır. (Qapıya tərəf) Qafar əmi, sən allah gəl bir qulaq as. Xor-xoru eşidirsən?
Qafar
Xor-xoru?
Nabat
Hə, hə...
Qafar
Doğrudan deyəsən eşidirəm. Qoy gedim bir halını soruşum.
Nabat
Dedim ki, olmaz.
Qafar
Rəhmətliyin qızı, arvada mənimlə şəriksən məgər?
Nabat
Qafar əmi, Çimnaz xanım doğrudan da xəstə kimiydi. Gedib yuxudan oyatsanız, vallah, inanın ki, üzünüzə baxan kimi bağrı çatlar.
Qafar
Ayı-zadam ki, mənə baxanda bağrı çatlasın?!
Nabat
Qafar əmi, oturun, sizə yemək gətirim.
Qafar
Yox, Çimnazsız boğazımdan heç nə getməz.
Nabat
Qafar əmi, bayaqdan sizə baxıb fikirləşirəm. Deyirəm bu axır vaxtlarda cavanlaşmısınız.
Qafar
Qoy görək, gözə gətirərsən... Deyirsən Çimnazın başı bərk ağrıyırdı?
Nabat
Bərkdən bərk.
Qafar
Daha keçib. Bu dəfə tək oturaram. (Oturur, kənara) Qərəz bu gün mənimki ikibaşlı gətirmədi.
Nabat (kənara)
Uf... ürəyim bir az sakit oldu.
Qafar
Get mənim qəlyanımı gətir.
Nabat
Qafar əmi, elə burda oturacaqsınız?
Qafar
Yox, çıxıb dam üstə oturacağam. Bu nə axmaq sözdür.
Nabat
Qorxuram. Var-gəl elərsiniz, sonra Çimnaz xanım diksinib ayılar.
Qafar
Get, tərpənmərəm, Nabat xanım. (Nabat gedir.) Görəsən, Çimnazın dərdi nədir?! Görünür, mənim ayrılığıma dözə bilmir. Mən bir yerə gedəndə xiffət eləyir, darıxır, hirslənir, özündən çıxır. Bunlar dərd deyil, bəs nədir? Məhəbbət, ayrılıq zarafat deyil, canım.
Əli (kağız torbalarda meyvə ilə gəlir)
Can gözəl, can gözəl.
Mən sənə qurban, Gözəl.
Qafar
Adə, sən kimsən?
Əli
Bə, bə, bə, bə...
Qafar
Adə, lal deyilsən ki... Sən kimsən, hə?!
Əli
Mə, mə, mə, mə...
Qafar
Sən də mələyirsən, hə?
Əli
Mə-ə mə, mə... mən mənəm.
Qafar
Mənimlə iş düzəlmir, axı de görüm kimsən, kim?!
Əli
He, he, heh, heç kim.
Qafar
Yox bu olmadı. Heç kimlə yaxa qurtara bilməzsən. A kişilər, mənim evim dönüb olub teatrxana. Cavab ver, yoxsa bu saat öldürərəm səni.
Əli
Çi, çi, çi, Çimnaz xanım özü bilir.
Qafar
Nəyi bilir, adə?!
Əli
Eşqimizi, bayaq söz verdim ki, meyvə alım gətirim, söhbət eliyək, biz bir-birimizə söz vermişik.
Qafar
Adə nadürüstün biri, nadürüst... Necə yəni söz vermişik... Mən sağ ola-ola, sən mənim arvadımı, sənin əcəlin tamamdır.
Əli
Mə, mə, mə, mə, mən...
Qafar
Çərənləmə. Mən ölmüşəm ki, sən mənim arvadıma məhəbbət elan eləyirsən?!
Əli
Yo, yo-yox... Na-Na-Na-Nabat yaxşı bilir, soruş ondan... mə, mə, mə.
Qafar
Hamı mənim düşmənimmiş ki... Tfu, zatına lənət, ay belə arvad... Siz allah bir ona baxın. Bir görün məni kimə satırlar. Yox, bu ev deyil, teatrxanadır, teatrxana. Əvvəl bu haramzadəni, sonra da o xain arvadı öldürəcəyəm... Aha... titrəyirsən. (Əlini boğazlayır.)
Əli
Vay... öldüm... vay... bo-boğuldum.
Qafar
Öl, köpək oğlu, xalqın arvadına eşqnamə oxuyanda yaxşıdır, öləndə pis. Əvvəl səni, sonra da onu.
Əli
Bo-bo, boğuldum.
Nabat (yüyürərək gəlir. Əlini onun əlindən almağa çalışır)
Qafar əmi, Qafar əmi, burax onu, o bizim Əlidir.
Qafar
Dəlidir getsin dəlixanaya, mənim evimə niyə gəlib?!
Nabat
Dəli yox, Əlidir, Əli... Xeyir işdən ötəri gəlib ey...
Qafar
Necə, xeyir iş?.. Xalqın arvadına sataşmaq havaxtdan xeyir iş olub? (Əliyə) De kəlmeyi-şəhadətini, əclaf!
Nabat
Buraxın, deyirəm sizə... Başınıza hava gəlməyib ki?..
Qafar
Kişi olsaydın bilərdin ki, adamın arvadına sataşmaq nə deməkdir, çəkil.
Nabat
Qafar əmi, buraxın onu, yoxsa haray çəkib şəhərin bütün milisionerlərini tökərəm bura. Bu mənimdir, Çimnaz xanımın buna dəxli yoxdur. Bu Əlidir, Əlidir. Xeyir işdən ötəri gəlib... Mənim nişanlımdır.
Qafar (Əlini buraxır)
Necə, xeyir iş, nişanlı?
Əli
Bəli, Qafar əmi... xeyir iş, nişanlı... bayaq dedim məni başa düşmədiniz. Çimnaz xanım bu işin içindədir. O sizə bu barədə deyəcəkdir. Görünür, hələ deməyib... Nə eybi. Amma öz aramızdır, az qalmışdı, məni o dünyalıq eliyəsən ha...
Qafar
Bu nə işdir, bu gecə mənim başıma gəlir. Yox, doğrudan da bu gecə bizim ev olub teatrxana.
Nabat
Əli bu küçənin başındakı klubda işləyir.
Qafar
Artist?
Nabat
Xeyir a...
Qafar
Ay lotu, gündüz klubda, gecə də mənim evimdə işləyirsən. Doğrudan az qalmışdı, səni öldürəm. İkimiz də yaxşı qurtarmışıq... Yaxşı di get, bəlkə bir az hirsim soyusun.
Nabat
Əli, Qafar əmi düz deyir, get hirsi soyuyandan sonra gələrsən. (Ona göz vurur.)
Əli
Nə deyirəm ki... (Gedir.)
Nabat
Mən də mətbəxə baş çəkim. (Gedir.)
Qafar
Adə, mən nə pis adammışam... Bir dəqiqənin içində öz gül kimi arvadımdan şübhələndim. Amma yazıq Çimnazın heç nədən xəbəri yox. Bu saat şirin yuxudadır... Kim bilir bəlkə elə bu dəqiqə yuxusunda mənciyəzi görür. Özüm ölüm elədir ki, var, ürəyimə damıb...
Nabat (gəlir)
Buyurun qəlyanınızı!
Qafar
Ver görək... (Qəlyan çəkir.) Ay qız, Çimnaz xanım yatanda nə olar ki... Birinci dəfədir məgər. Onu o qədər yuxudan oyatmışam ki... Yox, mən ona baş çəkməsəm bağrım çatlar. Vallah üzümə baxan kimi başağrısı çəkilib gedəcək... Düz tapmışam, Çimnazın dərdinin əlacı mənim üzümü görməkdir. (Qapıya tərəf gedir.)
Nabat (qabağını kəsir)
Hara?
Qafar
Bu da sözdür, arvadımın yanına.
Nabat
Bayaq dedim ki, olmaz, olmaz. Xanımın başı bərk ağrıyır, özü də bu saat şirin yuxudadır.
Qafar
Çəkil qapıdan deyirəm sənə. Mənimlə mala şəriksən məgər. Arvad alanda mənimlə maya qoymusan məgər. İtil gözümdən...
Nabat
Qafar əmi... deyirəm ki, hə, deyirəm ki, olar ha, amma olmaz.
Qafar
Dilin topuq çalır. Rəngin də ağappaqdır. Aha, yəqin burda bir iş var.
Nabat (kənara)
İşlər lap alt-üst oldu... Mən nə tədbir töküm axı... Qafar əmi, düz tapmısan. Burda bir iş var. Amma dilim gəlmir.
Qafar
İşin içində iş olanda, əlbəttə, dilin gəlməz. Yaxşı tapmışam.
Nabat
Yox, tapmamısan Qafar əmi... Bilirsən nə var? (Nazla)
Qafar
Nə var, axı?!
Nabat
Qısqanclıq.
Qafar
Bu nə sözdür?
Nabat
Deyirəm də... Mən, mən, mən...
Qafar
Sonra.
Nabat
Səni, səni, səni, səni.
Qafar
Məni, məni, məni, sonra?
Nabat
Hə, səni, səni, səni.
Qafar
Uzatma, dalını de...
Nabat
Sə, sə, sə...
Qafar
Mənə əlifba dərsi vermə. Müxtəsər sözünü de.
Nabat
Mən səni sevirəm.
Qafar
Nə dedin, necə?!
Nabat (nazla)
Qafar əmi, mən səni doğrudan da sevirəm.
Qafar
Qələt eləyirsən, sevirsən... Danışdığına bax... Səni sevirəm! Bəs bayaqkı o dələduz nəçiydi?
Nabat
O mənim doğma xalaoğlumdur. Doğrudur, o məni sevir... Amma mənim ondan zəhləm gedir. Əgər mən bayaq nişanlımdır deməsəydim, indi bəlkə o çoxdan ölmüşdü. Bayaq bir yalandı dedim... İndi isə doğru deyirəm, mən səni sevirəm. (Kənara) Görəsən kələyim baş tutacaqmı?
Qafar
Doğrudan da mənim evim teatrxanadır, teatrxana. Çəkil, gedim arvadımın yanına.
Nabat
Olmaz. Mən qısqanıram. Oyan-buyan eləsən belə bağıraram ki, dünya tökülər bura. Soruşarlar nə olub, deyərəm, Qafar əmi mənə eşq elan eləyirdi.
Qafar
Pah atannan...
Nabat
Odur ki, mənim ürəyimdən gələn məhəbbəti yerə salma! Dedim ki, mən səni Çimnaz xanımla bir yerdə görəndə qısqanıram, od tutub yanıram. Cızdağım çıxır, istəyirəm xörək içində zəhər verib ikinizi də birdən öldürəm.
Qafar
Bu nə deyir, adə?! Bizim əcəlimiz qıldan asılıymış ki...
Nabat
Qafar əmi... sözdür deyirəm də... Bunlar hamısı məhəbbətdəndir, məhəbbətdən.
Qafar (düşünür, kənara)
Görünür, bu şeytan doğrudan da mənə vurulub. Mənim kimi kişiyə vurulmayıb kimə vurulacaq. Bu vaxtacan buna heç əməlli-başlı diqqət yetirməmişəm. Ölməmiş sifətdən də, bədəndən də pis deyil. (Nabata) Ay şeytan, əgər məni sevirdinsə, niyə bu vaxta qədər dinməmisən, hə?..
Nabat
Qorxmuşam... Bağışla, Qafar əmi, bir sözdür ağzımdan çıxdı... Bağışla məni... Mən özüm də bilmirəm, indi sizə nə demişəm.
Kitabxana.az · https://kitabxana.az/ru/works/suleyman-rustem-cimnaz-xanim-yuxudadir
Другие произведения автора
Стихи других поэтов
Şurə gəlib şad olun, iranlılar!Qüssədən azad olun, iranlılar!
Ay nənə, bir qırmızı saqqal kişi!Ой, мама, с красной бородой старик -Яхши лабазник, не простой старик.
Təcnisİki mələk xəttat xəttin yazanda,Adın müshəfdə yazmış Yasinə,
YamandırBadi-səba, xəbər apar yarımaSöylə ona bir-bir halım yamandır