Pasibanı oldum dost irahının,Soruşdum, öyrəndim, yar salamatdı.Belə məlum olur, şahlar şahınınBizə mərhəməti var, salamatdı.

Çox obadan, ağır eldən keçibdi,Pələng, əjdahalı koldan keçibdi,Coşqun dərya, daşqın seldən keçibdi,Öldürməyib boran-qar, salamatdı.

Çox əziyyət verib yağmur, bərfü bad,Xətrinə dəyməyib nə düşman, nə yad,Gözün aydın olsun, könlün olsun şad,Çəkməginən intizar, salamatdı.

Təb dəyişib, haldan-hala dönübdü,Cilvələnib, bir marala dönübdü,Ləblərinin şəhdi bala dönübdü,Qoynundakı bir cüt nar salamatdı.

Ələsgərəm, baxtı qara çək məni,Qul adına sat, bazara çək məni,Gülləynən öldürmə, dara çək məni,Dil deyir: güllədən dar salamatdı.

← → düymələri ilə keçid, R — təsadüfi şeir

Təsadüfi şeir

Müəllifin digər əsərləri

Başqa şairlərin şeirləri