Soyuq mehr
Şamaxının qışı – uzun, sərt, soyuq,Soyuq – burdan bitişibdi adına.Şamaxının qanına qar qarışıb,Əriyəmməz, ha tut, insaf oduna.
Torpağına göydən qarğış tökülüb,Tarlasına çürük buğda əkilib.Mürüvvəti yerdən ərşə çəkilib,Dörd yan meşə, həsrət qalıb oduna.
Burda hər kəs ya xandı, ya yüzbaşı,«Biz, arifik» – söyləyirlər söz başı,Varlıların öz əlidir, öz başı,Allah çatsın fağırların dadına.
Kimi Vətən üçün candan keçibdi,Kimi küsüb doğma yurddan köçübdü.Kimi yalan əkib, qızıl biçibdi,Kimi möhtac qarğıdalı cadına.
Bəxtin gülsə – sənə məəttəl qalarlar,Od tutarsan – baxıb da həzz alarlar,Ucalarsan – başına daş salarlar,Yıxılarsan – tikan batar buduna.
Şeirə, sözə başlarını qatdılar,Həqiqətdə tamam başqa zatdılar,Bir-birinə düşməndilər, yaddılar,Qonşu nədir, qohum düşməz yadına.
Əl çəkmirlər qəsidədən, qəzəldən,Zövq alırlar təbiətdən, gözəldən.Təbəh-təbəh bölünübdür əzəldən,Bilmirlər ki, birləşməyin dadı nə?!
El dərdini ürəyinə salsan da,Əzab çəkib, yaş töküb, saç yolsan da,Başqa kənddə lap peyğəmbər olsan da,Gedəcəksən özününkünün badına.
Müdrik olsan – səndən uzaq gəzərlər,Düz danışsan – sənə dodaq büzərlər,Böhtan atıb, eyham-eyham bəzərlər,Lənət olsun böhtançının zatına!
Çərxi-fələk çarxını tərs hərlədən,Sabirləri, Hadiləri çərlədən,Suçu yoxsa, dəbəribdi Yer nədən,Neçə dəfə batıbdı yer altına?
Bu zülmətdə yenə çıraq yandırır,Xalqa haqqı-ədaləti qandırır.Amma, təbi-zərifləri dondurur,Soyuq mehri-möhür vurub adına.
Oktyabr, 2006
Kitabxana.az · https://kitabxana.az/works/fikret-sadiq-soyuq-mehr
← → düymələri ilə keçid, R — təsadüfi şeir
Müəllifin digər əsərləri
Başqa şairlərin şeirləri · İlahi eşq
Əlhəmdülillah, fikrimdir Allah,Fikrimdir Allah, əlhəmdülillah.
TapşırıqDilə qafil olma zikri-xudadən,Ruzü şəb mədhini etgilən imla,
Gedəsiyəm mənBaşına döndüyüm gül üzlü ana,Butamın dalınca gedəsiyəm mən.
Ey Puri-Xətib, dinlə öyüd gəl hərdənŞadlıqla mey iç badə dolu sağərdən.