I

Sən sallanıb enmisən,
Günəşin bir telindən.
Günəşin zəri qalıb,
Ayağında, əlində.

Niyə gecikdin, bala? –
Gözüm yolda qalmışdı.
Gəldin, nur topu kimi –
Gördüm gözüm qamaşdı.

Sənsiz bu dünyada mən,
Səndən nigaran idim.
Gəldin ağlaya-gülə:
«Baba, gəlmişəm!» dedin.

II

Tınqır-mınqır yellənir,
Çəhrayı nənnin sənin.
Nənninin baş ucunda
Söylənir ninnin sənin.

Sənə ana dilində
Ninnini nənə söylər,
Dayanıb sənə baxar,
Qayıdıb, yenə söylər.

Ninni göylərə çatar,
Ay yatar, ulduz yatar.
Ay-ulduzun altında
Körpəcə bir qız yatar.

III

Allah, eşitdin duamı,
Dağıtdın qatı dumanı.
Bir nəvə göndərdin mənə,
Həqiqət oldu gümanım.

Üzü Ayın bir parçası,
Barmaqları saman çöpu.
Bir yerdə öpsəm, az olar,
Bir-bir aç-yum, bir-bir öpüm.

Allah, biz aciz bəndəyik,
Sən verdin, sən – qoru onu!
Sərt küləkdən, mor günəşdən,
Bəd nəzərdən qoru onu!

IV

Gec də olsa mənim duam,
Haqqın dərgahına çatıb.
Bir qızılgül qönçə açıb,
Bir pöhrə qol-budaq atıb.

Quru budağı göyərdib,
Bir səhraya bulaq verib.
İllərcə intizar qalan
Bir anaya uşaq verib.

Günəş – işıq əlləriylə,
Bələyibdir bu uşağı.
Dümağ buludlar bələyi,
Bələkbağı – göy qurşağı!

V

Bir ümiddən gör nə kövrək
Təsəlli doğulub bu gün.
Nənə – Sevil fərəhindən,
Nəvə – Sevil olub bu gün.

Ata məsud, ana məsud,
Çiçək açıbdı divarlar.
Bir körpə gəlib bu evə,
Bundan böyük sevincmi var?!

Gəldi gül qədəmləriylə
Gülüstan eylədi evi,
Ay bu evin şahzadəsi,
Atalı-analı böyü!

VI

Elə, indidən bil, qızım,
Şirin olur ana südü.
Qıza nə lazımdı, daha,
Bir də ki, ata öyüdü.

Qız ki, ana südü əmdi –
Gündə bir arpa böyüdü,
Hər dərddən-bəladan onu
Qorudu ata öyüdü.

Ata-ana mehri ilə,
Bu dünya onun evidi.
Bu Yer də onun yeridi,
Bu Göy də onun göyüdü.

VII

Bu gün fələk öz çarxını,
İşıqlı yola döndərib.
Yerə bəla göndərməyib,
Bu dəfə bala göndərib.

O vaxtdan yeddi il keçir,
Məndə Əyyub səbri varmış.
Şükürlər olsun ki, axır,
Səsim Allaha çatarmış.

Allah öz adına layiq,
Ağırlayıb yer oğlunu.
Göydən Yerə nazil edib,
Baba-nəvə nağılını.
10.07.2005

← → düymələri ilə keçid, R — təsadüfi şeir

Təsadüfi şeir

Müəllifin digər əsərləri

Başqa şairlərin şeirləri