Ömür günəşim
Məni sevirsənsə özünü qoru,Qoru həyatını bir inci kimi.Könlümün yeganə təsəllisitək,Qəlbimin yeganə sevinci kimi.
İnan ki, varlığım, ömrüm, həyatım,Bu günüm, sabahım bağlıdır sənə.Tək sənə bağlıdır müqəddəratım,Səni görmək istər ürəyim yenə.
Mənimki olsaydın, səni əl üstə,Göz üstə saxlardım, saxlardım, inan.Qəlbimin yeganə sevinci ikən,Dönüb başqasına kədər olmusan.
Ömrümə günəşsən, parlaq bir günəş,Harada olsan da işığın gələr.Soyuyan qəlbimə atəşsən, atəş,Xəyalın ömrümə işıq nur ələr.
Sənin varlığında varlığım yaşar,Duyğutək qəlbimə dolaydın, ey kaş.Xəyalın ömrümə sevinclər qoşar,Dönüb sən olaydım, olaydım ey kaş!
Tənha gecələrdə xatirələrinVəfalı dost kimi yanıma gələr.Sənin təbəssümün-ömür ülkərim,Həmdəmim – danışan, dinən vərəqlər.
Qoru ürəyini, qəlbini qoru,Küləklər səsini çatdırsın mənə.Yaxınlar, uzaqlar qoy bilsin bunu,Səninlə diriyəm, səninlə yenə.
Məni sevirsənsə özünü qoru,Qoru həyatını bir inci kimi.Qəlbimin yeganə təsəllisitək,Könlümün yeganə sevinci kimi.
Kitabxana.az · https://kitabxana.az/works/hekime-billuri-omur-gunesim
← → düymələri ilə keçid, R — təsadüfi şeir
Müəllifin digər əsərləri
Başqa şairlərin şeirləri
Mən bir qranitəm - adım həqiqətQafil, külüngünü hara çalırsan?!
KəramətƏya ey mərdümi-aləm, baxın bu bir rəvayətdir,Bu əsrin xalqına ancaq münasib bir hekayətdir
OlduQəhbə fələk, bu gün bir iş işlədi,Məni yardan ayrı salacaq oldu,
Şuri-eşqin başıma axırı sövda gətirirŞuri-eşqin başıma axırı sövda gətirir,Bu müşəxəssdi ki, eşq aşiqə qovğa gətirir.