Deyiblər
O ocaq da, bu ocaq da eynidir,Saz-söhbət də, səs-soraq da eynidir.Bu dil o dil bir dodaqda eynidir,O tərəfə, bu tərəfə əyiblər.
O dəftərə, bu dəftərə bölündük,Baxa-baxa, görə-görə bölündük.Bir ürəkdik, neçə yerə bölündük,Neçə yerdən dağlayıblar, döyüblər.
Ana torpaq nə oğullar yetirdi,Haqq danışdı, haqq əmrini bitirdi.Ulu Kərkük meh ətrini gətirdi,Çöllər, düzlər əlvan-əlvan geyiblər.
Mən nə deyim bu dünyanın səbrinə,Azmı dözdük əzabına, cəbrinə.Toxunmayın Füzulinin qəbrinə,Ömür köçər, qəbir köçməz deyiblər.
Kitabxana.az · https://kitabxana.az/works/huseyn-arif-deyibler
← → düymələri ilə keçid, R — təsadüfi şeir