Bayram, hamıyla görüşdüm,səni sonraya saxladım.Dedim gəlləm qış gələndə,qış keçdi, yaya saxladım.

Gəlib çatdı umu-küsün,İçindəydim odun-közün.Dedim uşaqlar böyüsün,sünnətə, toya saxladım.

Dünya dəyişdi, nə bilim,mən də itdim ilim-ilim.Nə evdə bir gəvə-kilim,nə əldə maya saxladım.

Molla keşişə qarışdı,işdə iş işə qarışdı.Başım yetmişə qarışdı,zornan bir həya saxladım.

Ağstafa, Qarayazı,təzə balıq soyutması.Xəngələ qaldım tamarzı,vağzal Poyluya saxladım.

Mən bir nəslin əvəziyəm,“Dəli” Həsən nəvəsiyəm.Kəsəmənə gələsiyəm,Kürdə çimməyə saxladım.

iyun, 2002

← → düymələri ilə keçid, R — təsadüfi şeir

Təsadüfi şeir

Müəllifin digər əsərləri

Başqa şairlərin şeirləri