İkinci pərdə
Səhifə 4 / 5 · 60%
Rəşid Məğrur
Mənə qoçu lazım deyil, qəzetçi lazımdır.
İmamqulu
Onu da bacarar. Əlindən nə köpəkoğluluq desən gəlir. Dayan, bu saat çağırım, özün mala bax.
Çıxır. Mirzə Əlabbası darta-darta gətirir. Onun bir əlində şərab şüşəsi, bir əlində də cücə budu var.
Mirzə Əlabbas
Ay İmamqulu, qoy çörəyimi yeyim, gecənin bu vaxtı nə qoçuluq?
İmamqulu
Yaxın gəl, mala baxmaq istəyirlər.
Mirzə Əlabbas
Tapançanı çıxardım?
İmamqulu
Yox, qabiliyyətli dayan! (Rəşidə) Nə qədər qiymət qoyursan?
Rəşid Məğrur
Mirzə Əlabbasın qiyməti litrlədir. İçinə neçə litr şərab yerləşsə o qədər də qiyməti var.
Mirzə Əlabbas
Bəy əfəndi, təhqirinizi təcili geri götürün. Mənim əlim dinc dayanan deyil.
Tapançasını çıxardır.
Əlibaba
Yaman əzazil qoçudur, dayı.
Rəşid Məğrur
Mirzə Əlabbas, vallah, sözümü geri götürürəm, tapançanı o yana tut, qəfildən açıla bilər.
İmamqulu
Qorxma ey, boşdur, patronu yoxdur.
Mirzə Əlabbas
Boşdur? Tfu, belə qoçuluğa!
İmamqulu (Mirzə Əlabbasın qolundan tutur)
Tüpürmə, dadı qaçar. (Rəşidə) Beş yüz manat qiymət eləyirəm, necədir?
Rəşid Məğrur
Üç yüzdən bir qəpik artıq vermərəm.
Mirzə Əlabbas
Burax məni, canım, inək satmırsan ki?
İmamqulu
Mənim tapançamın patronu var, ha!.. (Rəşidə) Yaxşı, üç yüz olsun, gedək, oynayaq.
İmamqulu Mirzə Əlabbası darta-darta aparır. Rəşid və Əlibaba onların arxasınca gedirlər. Rəcəb səhnəyə çıxır. Pəncərədən küçəyə baxır. Alagöz gəlir.
Alagöz
Rəcəb, Rəcəb!
Rəcəb
Buradayam, xanım!
Alagöz
Fayton görünmür?
Rəcəb
Küçə bomboşdur.
Alagöz
Bəlkə kənarda saxlayıb, buradan görünmür, düş aşağı, tez mənə xəbər gətir.
Rəcəb
Baş üstə! (Casus içəri girir, Alagözə diqqətlə baxır) Xanım, gizlən, yad adam gəldi.
Alagöz (üzünü gizlədir, pıçıltı ilə)
Tanımırsan?
Rəcəb
Xeyr, gördüyüm adam deyil.
Alagöz
Bəlkə faytonçudur?
Rəcəb
Bu saat öyrənim. (Casusa) A kişi, sənin faytonun var, atları qanadlı quş kimi?
Casus
Faytonum yoxdur, ancaq mən özüm gözəllik görəndə qanadlı quş kimi oluram.
Rəcəb (Alagözə)
Baş-ayaq vurur, o deyil, sən get, mən bu iti yola salıb gəlirəm.
Alagöz gedir.
Casus (Rəcəbə)
Bəri gəl, sənə söz deyəcəyəm.
Rəcəb
Sözün var, sən bəri gəl...
Casus
Dövlət sirridir, tək sən bilməlisən...
Rəcəb
Yumala gəlsin.
Casus
Sən bu evin nökəri Rəcəbsən.
Rəcəb
Gözünü dağlayım. Bütün Bakı bilir ki, mən bu evin nökəri Rəcəbəm. Bunun harası sirr oldu?
Casus
Az danış, qulaq as! Jandarma kapitanı sizin evdə qonaqdır.
Rəcəb
Tutaq ki, qonaqdır. Ondan sənə nə?
Casus
Sualı mən verirəm, cavabı müxtəsər elə: hə, yox?
Rəcəb
Hə...
Casus
Onu xəlvət bura çağır.
Rəcəb
Yox.
Casus
Niyə yox?
Rəcəb
Saqqal tərpədib söz danışdın, kapitan boyda adam, bir dılğır Rəcəbin sözüylə yerindən durar?
Casus
Denən on üç nömrəli çağırır?
Rəcəb
Dustaqsan ki, nömrən var?
Casus
Get, əmrimi yerinə yetir. Əgər bu sözü kapitandan başqa bir adama desən, dilini burub boynuna sarıyaram.
Rəcəb
Elə bu cür acıqlı olmusan ki, ad tapa bilməyib sənə nömrə qoyublar da!
Gedir, kapitanla qayıdır.
Kapitan
Kimdir məni çağıran?
Rəcəb
Bax, bu acıqlı kişi.
Kapitan
Mən bu adamı tanımıram.
Rəcəb (Casusa)
Hə, indi sənin öz dilini burub boynuna sarıyacaqlar.
Gedir.
Kapitan (pıçıltı ilə)
Tez ol, sözünü de!
Casus
Oğlanın və qızın izindəyəm, adamlarım onları bir dəqiqə gözdən qoymurlar.
Kapitan
Kimi qarşılayırdılar?
Casus
Məlum olmadı, gəmi yaxınlaşanda bir qarışıqlıq düşdü ki, it yiyəsini tanımadı.
Kapitan
Bəs çanta, qızın əlindəki çanta?..
Casus
Budur, çırpışdırmışam, ancaq içi boşdur.
Kapitan
Yenə səni aldatdılar. (Öz-özünə) Sən bir bunun sirsifətinə bax!
Casus
Xoşunuza gəlmir, dəyişim.
Kapitan
Dəyiş, nömrən də oldu otuz doqquz. Onu da bil ki, nömrən artdıqca maaşın azalır.
Casus
Cənab kapitan, axı insaf deyil.
Kapitan
Sus! Sən bütün dünyadakı casusların ən kütbeyinisən. Qulaq as. Onları bir dəqiqə gözdən qoyma. Qazdan ayıq ol, qarğadan bic. Üzünü şəhərin bu başında sabunlat, o başında qırxdır. Mən hələlik bu evdə olacağam, sonra da... olacağam... qulağını gətir. (Qulağına pıçıldayır, casus gülür) Hırıldama, əmrim yerinə yetirilməlidir.
Casus
Baş üstə.
Casus gedir, kapitan içəri girir. Kəblə Muxtar ilə rastlaşır.
Kəblə Muxtar
Kapitan, burada tək neyləyirsiniz, narahat oldum.
Kapitan
Papiros çəkirdim.
Kəblə Muxtar
Buyur içəri. Papirosu orada çəkə bilərsiniz, buyurun!
Kapitan gedir. Kəblə Muxtar tək qalır. Əlibaba qəhqəhə ilə gülərək yan otaqdan çıxır.
Əlibaba
Dədə, kefdir, qoçu İmamqulu Mirzə Əlabbası dayıma uduzdu.
Kəblə Muxtar
Lənət olsun əbavü-əcdadınıza! Mənim hesabdarımı bu ona uduzur, o buna.
Gedir. İmamqulu, Rəşid Məğrur və Mirzə Əlabbas içəri gəlirlər.
İmamqulu
Mirzə Əlabbas, sən daha qoçu deyilsən, tapançanı bəri ver.
Mirzə Əlabbas
Götür bu zəhrimarı. Elə bil od olmuşdu, böyrümü yandırırdı.
İmamqulu (tapançanı alır, Əlibabaya)
Gedək, xırda-xırda oynayaq.
Əlibaba
Sənin heç nəyin qalmayıb axı. Gül kimi qoçunu da uduzdun.
İmamqulu
Bu tapançanı qiymət eləyərsən, oynayarıq, gəl!..
Çıxırlar. Səhnədə Əlabbas və Rəşid Məğrur qalır.
Rəşid Məğrur
Mirzə Əlabbas bəy!
Mirzə Əlabbas
Buyurun, təzə ağa.
Rəşid Məğrur
Sənin nə pis adın var?
Mirzə Əlabbas
Allah verən addır da!..
Rəşid Məğrur
Qəzetçi adı deyil. Sən indi mühərrirsən, gərək özünə ləqəb tapasan. Mənim adım Rəşid Məğrurdur, sənin də adın olsun Əli Məsrur...
Mirzə Əlabbas
Abbası yedin?
Rəşid Məğrur
Abbas getdi. Əli Məsrur! Denən bəli.
Mirzə Əlabbas
Bəli, bəy əfəndi!
Rəşid Məğrur
Evə gedən kimi alarsan qələmi əlinə, bir səhifə padşahı tərifləyərsən, bir aydan sonra onun baldızının ad günüdür.
Mirzə Əlabbas
Axı, mən ömrümdə haqq-hesabdan başqa heç nə yazmamışam.
Rəşid Məğrur
Şərabı vur, özü gələcək. Şərab pulu məndən.
Mirzə Əlabbas
Şərab içəndən sonra mən yaxşı söyüş söyürəm.
Rəşid Məğrur
Çox gözəl, padşahı özüm tərifləyərəm, sən bir yaxşı söyüş məqaləsi yaz.
Mirzə Əlabbas
Mənim gözlərim üstə. Kimin barəsində?
Rəşid Məğrur
“Molla Nəsrəddin” məcmuəsini çıxardan bir Cəlil Məmmədquluzadə var, onu gərək yer ilə yeksan eləyək! Dişinin dibindən çıxanı yaz.
Mirzə Əlabbas
O cür adamı söyməyə heyfin gəlmir?
Rəşid Məğrur
Kəs səsini, ey qəzetçilərin ən cavanı və ən təcrübəsizi! Sən balaca uşaqlar kimi nə danışdığını özün də bilmirsən. Bizim məsləkimizə müğayir olan bu cümlə bütün Bakını titrədə bilər.
Kəblə Muxtar qaçaraq içəri girir.
Kəblə Muxtar
Tez olun, çıxın qabağa. Bəylər gəlir.
Gedir.
Rəşid Məğrur
Əli Məsrur! Özünü qaydaya sal, papağını yaxşı qoy. Qibləgahımız təşrif gətirir.
Əlibaba ilə İmamqulu çıxırlar.
İmamqulu
Nə olub, adə?!
Rəşid Məğrur
Bəylər gəlir. Əlibaba, kartı gizlət, çıxaq qabaqlarına.
Hamı səhnədən çıxır. Otaq bir anlığa boş qalır. Rəcəb çadraya bürünmüş Alagözlə içəri girir.
Rəcəb
Gəl, xanım, fayton bizi gözləyir. Yaxşı ki, ara qarışdı, bizi görən olmaz.
Gedirlər. Nəsrullah bəylə Əhməd bəyi qollarından tutub təntənə ilə içəri gətirirlər. Hacı ilə Məşədi yan otaqdan çıxıb gəlirlər. Kəblə Muxtar iki kreslo gətirib səhnənin ortasına qoyur. Nəsrullah bəylə Əhməd bəyi bu kreslolarda oturdurlar.
Nəsrullah bəy
Kəblə Muxtar, xeyir işin mübarək. Hanı qızın, kürəkənin, çağır, bizi tanış elə!
Kəblə Muxtar
Bizlərdə adət deyil, bəy dadaş, qızı heç kəsə göstərmək olmaz, oğlanın da ayağı gərək toya qədər bu evə dəyməyə.
Nəsrullah bəy
Ştrissen fayt.
Kəblə Muxtar
Qadan alım, Əhməd bəy, nə deyir?
Əhməd bəy
Deyir ki, vəhşilikdir!
Mirzə Əlabbas
Bizim milləti yalnız bu adam qabağa aparacaq. Fikri çox iti işləyir.
Rəşid Məğrur (Mirzə Əlabbasa)
Götür bir kağız, onun ağzından çıxanı qeyd elə. Qəzetimizdə çap eləyəcəyik.
Nəsrullah bəy
Şair, vəziyyət necədir, altmış işçini tapa bildinmi?
Rəşid Məğrur
Birini tapmışam. Budur, Əli Məsrur, qalıb əlli doqquzu.
Nəsrullah bəy
Tələsmə, diqqətlə seç, sən böyük tarixi iş görürsən. Tarixi iş görəndə tələsməzlər.
Rəşid Məğrur
Haqqınızda yazdığım şerin üçüncü bəndi də hazırdır.
Nəsrullah bəy
Şair, yüz bənd hazır olandan sonra hamısını bir yerdə oxuyarsan. İndi dinləməyə vaxtım yoxdur.
Rəşid Məğrur
Baş üstə. (Mirzə Əlabbasa) Yüz bəndi yüz günə qurtara bilmərəm.
Mirzə Əlabbas
Ölməmişəm. Kömək eləyərəm.
Kəblə Muxtar (işarə ilə Əlibabanı yanına çağırır. Yavaşdan)
Bunları bir bəhanə ilə çək apar, bizim xəlvət söhbətimiz olacaq.
Kitabxana.az · https://kitabxana.az/works/sabit-rehman-diriler-ikinci-perde
← → düymələri ilə keçid, R — təsadüfi şeir
Müəllifin digər əsərləri
Səkkizinci şəkilBakının küçələrindən biri. Əlibaba ilə İmamqulu Kəblə Muxtarı gətirib güclə bir daşın üstündə oturdurlar.*
Əliqulu evlənir4 pərdə, 5 şəkildə*İştirak edənlər
Birinci pərdəBirinci şəkilPərdə qabağı. Sol tərəfdə telefon budkası, sağda ağac və skamya. Bunlar sona qədər bu cür qalır.*
İkinci pərdəİkinci şəkilYasəmən əlində bir dəstə çiçək pərdə qabağına çıxır.*
Başqa şairlərin şeirləri
Zülfün kimi qaraldı könül dudi-ah ilə,Eşqində iddia edərəm bu güvah ilə.
Gəldi bir qaşı kaman yanıma göyçək-göyçəkGəldi bir qaşı kaman yanıma göyçək-göyçək,Atdı müjgan oxunu canıma göyçək-göyçək.
Barilahim qismət etmişBarilahim qismət etmişYaxşı yoldaşlan məni,
Nihani bəslənir ləlin xəyalı can arasındaNihani bəslənir ləlin xəyalı can arasında,Bəli, can riştəsi vardır, deyirlər, qan arasında.