Üzündə busədən, ey gül, iki nişan yeri var;Birində qırmızılıqdır, birində qan yeri var.

Gözündə vardır ox atmaq, müjəndə qan tökmək,Qaşında səhv deyildir, desəm, kaman yeri var.

Saçın tutanda üzarə belə xəyal edirəm;Çəməndə bərgi-gül üstə qara duman yeri var.

Bəlayə salma məni, dərdü möhnətim çoxdur,Nə dildə tab qalıbdır, nə də tovan yeri var.

Vəfası olmasa da, yardan əl üzmə, könül!Gələr tərəhhümə bir gün, yenə güman yeri var.

Rəqibə həmdəm olub, dilbərim küsüb məndən,Belə güman edirəm, bəlkə bir uman yeri var?

Vəfalı söylədiyin çıxdı bivəfa axır,Sənin sözündə də, Vahid, bir az yalan yeri var!

← → düymələri ilə keçid, R — təsadüfi şeir

Təsadüfi şeir

Müəllifin digər əsərləri

Başqa şairlərin şeirləri · Eşq