I

İşli günlərimin dostları boldu,
Hətta yadların da yadında idim…
Hərə də özünə bir pay umurdu,
Şöhrətin vəzifə atında idim…

Hamı stolumu gəlib sayardı,
Yaltaqlar görürdüm gündə bir qoşun.
Amma ki, özümü qərib sayardım,
İçində bu qədər cəfəngin, boşun…

Telefon gecə də ötərdi dil-dil,
Evdə də, işdə də qapardı məni…
Eləsi vardı ki, öləydim qəfil,
Gəlib qəbirdə də tapardı məni…

Cumardı gündə bir məddah üstümə,
Daim ətəyimdə idi əlləri…
Elə şığıyardı yadlar üstümə,

Deyərdim çoxdakı can-ciyərlərik…

İşli günlərimin zəhimi vardı,
Möhürü, maşını, hökümü, hikkəsi.
Xalqımız rütbəyə əyilən xalqdı,
Hamı vəzifəyə kölə, qul, əsir…

Kənardan baxardım bəzən özümə,
Mən özüm-özümdən şəkə düşərdim.
Hər gün ürəyimə, hər gün sözümə,
İşli günlərimdən ləkə düşərdi…

Nə qədər qohumum varmış sən allah,
Bəlkə pünhan-pünhan nəslimiz artıb?
Gələnlər əlindən qapımı vallah,
Az qala gecə də açıq qoyardım…

II

İşsiz günlərimin dostları tək-tük,
Amma ki, heyrəti, sehiri bol-bol…
İşsiz günlərimin mənası böyük,
Qiyməti, dəyəri,xeyiri bol-bol…

İşsiz günlərimin qohumu az-az,
Sayını barmaqla sanamaq olar…
Gedənim, gələnim, qəyyumum az-az,
İndi doğmaları tanımaq olur…

Yadlar nə gəlirlər, nə də gedirlər,
Ta qalıb gözləri özgələrində.
İşsiz günlərimdə mənimlədilər
İşsiz günlərimdə az gbrünənlər…

Daha qapımızı tez-tez açan yox,
Füzuli demişkən küləkdən özgə…
Salamda vermirlər mənə haçandır,
Bir vaxtlar kandarımı dağıdan kəslər…

İşsiz günlərimin telefonu laldır,
İtib ünvanımız, itib nömrəmiz…
İşsiz günlərimin suyu halaldır,
Çörəyi tər-təmiz, duzu tər-təmiz…

İşsiz günlərimin işdir hər günü,
Açılıb sözlərimin bağlı dilləri…
İşli günlərimin yuyur çirkini,
Gecəli-gündüzlü işsiz günlərim…

İşsiz günlərimin həmdəmi yanmaq,
Məşələ dönübdür qələm əlimdə…
İşli günlərimə sahibdim, amma,
İşsiz günlərimin qulam əlində…

Onlar qurtardılar ruhumu dardan,
Elə bir açdılar bağlı gözümü…
Özümə baxıram durub kənardan,
Daha tanıyıram özüm-özümü…

Bərk-bərk yapışmışam daha qələmdən,
Gecə də, gündüz də işdədir əlim.
İşsiz günlərimdə işsiz idim mən,
İşli günlərimdir işsiz günlərim…

1993.

Use ← → keys to move, R for a random poem

Random poem

More by this author

Poems by other poets