-I**
Bu ad şairlərə çoxdan tanışdır,
Bu adla çoxları tutulmuş dərdə…
Bəlkə deyiləcək söz qalmamışdır?
Doğdu Leylasını bizim günlər də…
Füzuli çataraq sıx qaşlarını,
Leylinin eşqinə saldı Məcnunu.
Axıtdı həsrətlə göz yaşlarını,
Bizə xəbər verir tarixlər bunu.
Sevişən iki qəlb, duyan iki qəlb
Döyünüb çırpındı daş qəfəslərdə…
Aşiqin dərdinə "eşq oldu səbəb",
Asıldı ortadan qara bir pərdə.
Məcnunun bəxtiyar və gənc yaşında
Axır qərargahi oldu biyaban.
Quşlar yuva saldı onun başında,
Leylinin gözündə bulandı ümman.
Sanma əfsanədir bu qəmli dastan!
Bunda günəş kimi bir həqiqət var…
Bunda məhəbbətlə ölən bir insan,
Bir könül, bir xəyal, bir də sənət var.

-II**

Kamal soyundurdu Leylanı çılpaq,
Çıxardı sahilə, ay işığına;
Baxdı dönə-dönə, həzzlər alaraq,
Açıq bir bədənin yaraşığına.
Yazıq ki, Leylanı tutan sətəlcəm
Qızcığın qanına işlədi birdən.
Həyatı tərk etdi o taleyi kəm,
Şair "ilham" aldı bu faciədən…
Baharın fəslində soldu bir çiçək,
Gözəl bir insanın boş qaldı yeri.
"Odalar ağladı inildəyərək"…
Matəm qaytarmamış öləni geri!
Nə mən Məcnun kimi çöllərdəyə, bil,
Nə sən Leyli kimi hicran xəstəsi…
Bizim qismətimiz göz yaşı deyil,
Bizimdir yaşamaq, gülmək həvəsi.
Sən göylər yolçusu bir azad quşsan,
Aylı gecələrdə görürəm səni.
Zöhrə ulduzuna məftun olmuşsan, -
Sürürsən üstünə öz təyyarəni!
Bəzən bu səfərdə ağır dumanlar,
Gəlib quldur kimi kəsir yolunu,
Sənin qüdrətinə inanmayanlar
Tutur xəyalında qız olduğunu…
Bəzən də boşluğa rast gəlir yolun,
Narın bir sarılıq çökür rənginə,
Azacıq qüvvədən düşsə də qolun
Cəsarət yaşadır həyatı yenə!
Gəlir xəyalına: "Anam hardadır?"
Deyen bir körpənin dodaq büzməsi…
Anan yerdə deyil, buludlardadır,
Ona yetişməyir insanin səsi.
Sən ağ dumanları yarıb biçəndə
Sevinir elin də gülür oban da;
Sən bizim dağların üstdən keçəndə
Dalır düşüncəyə çöldə çoban da.
Şöhrətin dolaşır meyli, məzəli
Elin xoş dilində, xoş avazında,
Bir gəl tanış olaq, ellər gözəli!
Aşıqlar adını çalır sazında…
Mən demədim sənə: "Ay ağzı püstə!"
Havadır oylağın, yerdir vətənin.
Dumanlar içindən, əli göz üstə
Qoca Şərq boylanır dalınca sənin…

Use ← → keys to move, R for a random poem

Random poem

More by this author

Poems by other poets