İkinci pərdə
Страница 1 из 2
Kərim kişinin evi. Pəncərələrdən bağça görünür. Durna otağı səliqəyə salır, gülləri güldanlara qoyur.
Durna
Sevgisiz bir ömrün nə mənası var,
Könlümün könlündən təmənnası var,
Aç mənə qəlbini, aç varaq-varaq,
Səninlə əl-ələ bir dünya quraq,
Ömrümün ən gözəl dəqiqələri
Sənindir, sənindir, ey vəfalı yar!
Qəmər gəlir.
Qəmər
Salam Durna, evdə kim var?
Durna
Təkəm, kimdən çəkinirsən ki.
Qəmər
Dedim bəlkə...
Durna
Bəlkə nə?
Qəmər
Heç... bəxtəvərsən, Durna!
Durna
Sənə baxıb öz-özümə deyirəm ki, kaş mənim gözəl-göyçək bir qardaşım olaydı, Qəməri alaydım ona. Sənə heyfim gəlir. Bilmirəm, kimə qismət olacaqsan, kimə.
Qəmər
Mənimçin qorxma... Pisinə qismət olmaram. (Kitabları yoxlayır.) Aha, Durna, görürəm qiyabi instituta yaman hazırlaşırsan ha...
Durna
Sənə zarafat gəlməsin. İşdə qabaqcıl olan gərək imtahanda da qabaqcıl ola. Bir ay sonra Moskvaya yola düşməliyəm.
Qəmər
Məndə huşa bax ey. Moskva dedin yadıma düşdü. Təzə xəbərdən xəbərin var? Muştuluğumu verməsən demiyəcəyəm.
Durna
Bilirəm, bilirəm, o, sabah Moskvaya gedir.
Qəmər
Elədir. Həm kənd təsərrüfatı sərgisinə, həm də olimpiadada çıxışa. Bəs sən? Göz dəyməsin, boy-buxun, gözəllik deyirsən səndə, könülləri dindirən məlahətli səs deyirsən səndə...
Durna
Əvvəla hələ imtahana hazır deyiləm, ikinci də atama görə. Bilirsənmi, atamın könlünü qırmaq istəmirəm. Amma heç bilmirəm, bu ayrılığa necə dözəcəyəm. (Qəzeti göstərir.) Budur, bax... Muraddan yazırlar. Bu onun şəkli, bu da qoşmaları, heç bilirsən nə qəşəng mahnılardır. (Oxuyur.)
Ellər yaradıb nə gözəl səni,
Şümşaddır sənin əllərin, Durna!
Buludtək tutub ay camalını
Sənin o qara tellərin, Durna!
Sevdim səni gözəl Durnam,
Sevdim səni can Durnam,
Sevdim səni maralım.
Gəlməz sənsiz bir an qərarım, Durna!
Sevdim səni gözəl Durnam,
Sevdim səni can Durnam!
Qəmər
Doğrudan nə gözəl sözlərdir. Elə hey səndən deyir. Durna sən çox xoşbəxtsən, özünə layiq bir oğlan tapmısan. Özü qəşəng, sözü qəşəng, səsi qəşəng... Kolxozda da birincilərin birincisi. Yaxşı, bir de görək atanla barışdılar, ya yox.
Durna
Yox, atam onun əlindən yaman acıqlıdır. Deyir ki, sən də onunla birgə, mənim kökümə balta çalırsan.
Qəmər
Balta niyə? Bu yarışdır. Kim qabaqdadırsa hörmət də, şöhrət də onundur, onun.
Durna
Əlbəttə, atam əyri yollarla özünə əmək-günü yazdıranlara – əvvəl başdan öz qohumlarına güzəştə getməsəydi, bu kökə düşməzdi. Təqsir özündədir. Mən də, Murad da vaxtında ona xəbərdarlıq elədik. Sözümüzü qulaq ardına vurdu. İndi ayılıb, ancaq gecdir.
Lalə təngnəfəs gəlir.
Lalə
Hanı o Kərim dayı?
Durna
Salam harda qaldı, ay qız?!
Lalə (hirsli)
Evimizdə. De görüm, hanı Kərim dayı?
Durna
Neyləyirsən onu?
Lalə
Onunla davam var, davam.
Durna
Aləm sülhdən danışır, sən dava-dava deyirsən. Yenə nə olub ki?
Lalə
Nə olacaq? Dursun məndən qaçır. Gecə-gündüz dilindən Durna düşmür.
Durna
Mənim günahım nədir?
Lalə
Sən ona meyl göstərməsən, o bu qələti eləməz. Deyir sənin eşqinlə meşədə qırqovulların, turacların nəslini kəsib.
Qəmər
O getsin öz nəslinin hayına qalsın.
Durna
Yalandır, böhtandır.
Lalə
Bəs onda niyə məndən qaçır? Düşüb qalıb barınızın qabağında. Məni bədbəxt eləmə, Durna! (Ağlamsınır.)
Durna
Bədbəxt niyə olursan, ay qız?! Ağlama, özünü ələ al. Sən niyə onun hər sözünə inanırsan, axı?
Qəmər
Gör bir özünü nə günə salmısan ki, Dursun da səndən qaçır.
Durna
Əslinə baxsan onu ərköyün böyüdüb bu hala salan ata, anasıdır. Eh Lalə, Lalə!
Qəmər
Lalə, sən əvvəllər yaman qoçaq qızdın. Ona qoşulanı tamam dəyişmisən.
Lalə
Neyləyim, özümlə deyil, sevirəm axı...
Durna
Sənə sevmə deyən kimdir. Sevirsənsə özünü elə apar ki, ayağa düşməyəsən. Sən niyə, qoy o səni kölgə kimi izləsin. Qoy o sevinsin ki, sən onu sevirsən.
Lalə
Əvvəllər elə idi. Amma indi.
Qəmər
Sən onun ayağını çayxanalardan, meyxanalardan yığışdıra bilsən, onda sənə deyərik, afərin Lalə, afərin!
Durna
Onda sevməyinin də bir mənası olar!
Lalə
Yəni deyirsən ki, doğrudan da, Dursunu sevmirsən?
Durna
Mən öz sözümü bayaq dedim.
Lalə (sevincək)
Durna, vallah hər yerdə, həmişə, demişəm, yenə də deyəcəyəm. Bu mahalda gözəllikdə məndən sonra ikinci yeri sən tutursan. Gəl bir öpüm səni. Toyumuza hələəlbət ikinizi də çağıracağam.
Qəmər
Biz də hələəlbət gələrik.
Lalə
Onda mən gedim. (Oxuyur və oynayır.)
O mənim öz yarımdır, öz Dursunumdur,
Dövlətimdir, varımdır, öz Dursunum.
Mən onunam, o mənim öz Dursunum,
Siz də gəlin, qol qoyun, birinci eşqimizə,
Tuf, tuf, tuf, yaman göz dəyər bizə.
Bayırdan Dursunun səsi gəlir. Lalə diksinir.
Dursun
Sən haralısan, haralı, Durna!
Dursun əlindən yaralı Durna!
Uca dağların maralı, Durna!
Maralı, maralı, maralı Durna!
Dursun başını pəncərədən içəri soxanda Laləni görüb qaçır. Lalə onun dalınca cumur.
Lalə
Hara qaçırsan?.. Dayan ay birminci dələduz!
Durna və Qəmər gülüşürlər.
Durna
Qəmər, kim nə deyir desin. Mənim Laləyə yazığım gəlir. Onu bu bataqlıqdan çəkib qurtarmaq lazımdır.
Qəmər
O çox bacarıqlı qızdır. Heyf ki, pis adama rast gəlib. Onu Dursunun təsirindən ancaq sən qurtara bilərsən.
Durna
Mən bu barədə çox düşünmüşəm. Qəmər, onu öz briqadamıza keçirsək necə olar?
Qəmər
Çox yaxşı olar... yaxşı fikirdir.
Durna
Elə də eləyəcəyəm.
Qəmər
Onu analığından ayıra bilsək, bəxti açılar.
Durna
Bunu lap düz deyirsən. Onu eliyərəm.
Qəmər
Mən mane olmayım, gedim Durna!
Durna
Hara belə tələsirsən?
Qəmər
Olimpiadaya gedənlərin baxışına. Heyf, heyf ki, sən getmirsən.
Durna
Qəm yemə!.. Qocalmamışıq ki... Qəmər, tez-tez gəl! Sensiz yaman darıxıram.
Qəmər
Gələrəm, Durna, gələrəm. (Gedir.)
Kərim və Nisə gəlir.
Kərim
Qızım... bir az əvvəl bizim həyətdən vaz atıb qaçan Laləydi?
Durna
Bəli, ata, o idi!
Kərim
O, bura niyə gəlmişdi ki?
Durna
Heç... Elə belə gəlmişdi də.
Kərim
Bilmək olmaz niyə gəlmişdi?
Durna
Ata, istəyirəm, laləni öz briqadamıza keçirəm. Dursundan uzaqlaşar, onda görərsən necə ağıllı qız olar.
Kərim
Olmaz ki, elə Dursunu da götürəsiniz öz briqadanıza.
Durna
Onsuz sizin briqadanın işi keçməz ki.
Kərim (hirsli)
Sən nə cürət eləyib mənimlə bu dildə danışırsan. Yox, yox, sən əvvəllər belə deyildin. Görünür, dil verənin var. (İstehza ilə) Ay Nisə, (qəzeti göstərir) kim deyir ki, saz pis şeydir. Elə deyil?
Nisə
Əlbəttə, a kişi, doğrudan a... Bu aşıq Muradı çağırsana, bizə bir qədər saz çalıb oxusun.
Kərim
Əcəb qandın! Buyurun, bu da mənim ömür yoldaşım.
Durna
Mən qandım, ata... Amma bir də belə tikanlı sözlər eşitmək istəmirəm. (Acıqlı otaqdan çıxır.)
Kərim
Əlbəttə istəməzsən. Sərf eləmir, axı! Neştər yaraya dəydi? Barakallah qız böyüdən!
Nisə
Əlbəttə, barakallah... Əyər, əskiyi varsa, vur başımı yar! Mənciyəz qızımız barədə deyilənlərin bir kəlməsinə də inanmıram.
Kərim
Ay ilana zəhər verən kərtənkələ!
Nisə
Qızım səninçün körpə uşaq deyil. Bir başına vur ki, o gecə-gündüz qiyabi instituta imtahana hazırlaşır. Əlindən dəftər, kitab düşmür. (Miz üstdəki kitabları göstərir).
Kərim (bir kitabı götürüb Nisəyə göstərir)
Qiyabi institutda, Leyli Məcnun?!
Nisə
Nə Leyli Məcnun?!
Kərim
Görünür, qızımızın birinci imtahanı Leyli Məcnun əhvalatından olacaq.
Nisə
Leyli Məcnundan olanda nə olar ki?! Onu bilmək də böyük işdir.
Kərim
Bəli uzun işdir. Mən indi başa düşürəm ki, ayağımın altını qazıyan düşmənim öz evimin içindəymiş.
Nisə
Səhvin var. Düşmənin öz ürəyinin içindədir. Bir yaxşı fikirləş!
Kərim (hirsli)
Nə istəyirsiniz məndən? Ağzından süd qoxusu gələn aşığın biri adımı-sanımı çırpdı yerə.
Nisə
Eh... qohumbazlıq eləməyəydin. Nəcəfçin keçərsənmiş. Dursunçun keçərsənmiş... Bax, axırda belə olarsan. Təqsirlərin hamısı özündədir, özündə...
Kərim
Heç eybi yoxdur. Mən hələ sağam. Bu günün sabahı da var. (Yadına nəyi isə salır.) Yaxşı, bəs sən buna nə deyirsən ki, bütün mahalda biabır olmuşuq.
Nisə
Yenə nə olub ki?
Kərim
Nə olacaq, heç nə, qulağıma çatıb ki, qızımız o aşıq Muradla küncdə-bucaqda, bağda, bağatda, dərədə, təpədə xəlvət-xəlvət görüşürlər.
Nisə
Görüşsünlər də... Kişi, bəlkə doğrudan da Murad qızımızı istəyir.
Kərim
Qızımızı istəyən qapımıza adam göndərər.
Nisə
Kişi, deyirəm bəlkə qızımızın xasiyyətinə yaxından bələd olmaq istəyir.
Kitabxana.az · https://kitabxana.az/ru/works/suleyman-rustem-durna-ikinci-perde
Клавиши ← → для перехода, R — случайное стихотворение
Другие произведения автора
Hər kəsdə belə şirin dil olmaz,Hər kəlməsi bir qızılgül olmaz.
SönməyibSənə öz könlümü verdim, səni candan sevdim,Sevgimə olmaq əngəl dəli hicran, sevdim.
MəktubBir zaman qəlbimə yazdım adınıOnda bildim acı dərdin dadını.
DönsəmArzum gül açır mən sola dönsəm, sağa dönsəm,Eşqim dil açır mən sola dönsəm, sağa dönsəm.