Şairim! Qələmi götür də dinlə,
Bir yeni dastan yaz öz əllərinlə!
Dünyanın qoca bir şahidiyəm mən,
Örtülü qız kimi qaçıb gizlənən,
Dilsiz əsrləri yarıb keçmişəm,
Günəşdən payımı mən də içmişəm.

      Başım dəfələrlə düşdü qorxuya,
      Gözlərim getmədi şirin yuxuya.
      Döyüşlər səslənir qulaqlarımda...
      Mənim durna gözlü bulaqlarımda,
      Qanli süngüsünü yudu çoxları.
      Başımın üstündə düşmən oxları,
      Fırlana-fırlana sancıldı yerə,
      Xələtlər payladım hər cahangirə.

      Yaşıma dolduqca qanlara doydum,
      Hər daşın altında bir oğul qoydum.
      Ah... o qılıncları, o qalxanları
      Sinəmin üstündən axan qanları
      Nəsildən-nəsilə verdim yadigar
      Üstü zər yazılı bir keçmişim var!
      Üstümə hər gələn bac aldı keçdi.
      Yaşım döyüşlərdə qocaldı keçdi
      Eşitsin nəslimiz məndə nələr var,
      Məndə həqiqətlər, əfsanələr var!

Клавиши ← → для перехода, R — случайное стихотворение

Случайное стихотворение

Другие произведения автора

Стихи других поэтов