Kimsədə rüxsarına taqəti-nəzzarə yox,

Aşiqi öldürdü şövq, bir nəzərə çarə yox.

Bağrı bütünlər mənə tənə edərlər müdam,

Halımı şərh etməyə bir ciyəri parə yox.

Yığdı mənim başıma dəhr qəmin, neyləsin,

Badieyi-eşqdə mən kimi avarə yox.

Dəhrdə həmta sənə var, yeri yox, gər desəm -

Var gözəl çox, vəli, sən kimi xunxarə yox.

Gözdə gəzib cizginir qətreyi-əşkim müdam,

Qətreyi-əşkim kimi çərxdə səyyarə yox.

Çak görüb köksümü qılma ilacım, təbib,

Zaye olur mərhəmin, məndə bitər yarə yox.

Zarlığım eşqdən var, Füzuli, vəli,

Ol məhi-bimehrdən rəhm məni-zarə yox.

← → düymələri ilə keçid, R — təsadüfi şeir

Təsadüfi şeir

Müəllifin digər əsərləri

Başqa şairlərin şeirləri · Eşq