Ləhzə-ləhzə ləbin anıb edicək əfğanlar,

Qətrə-qətrə saçılır didələrimdən qanlar.

Qətrə-qətrə demə qandır ki, çıxar çeşmimdən

Dəmbədəm könlüm odilə əriyən peykanlar.

Qaşların yayinə meyl eyləyə canü könül,

Dünü gün mən bilirəm kim, nə çəkirlər anlar.

Açma kakil girehin, başın üçün, görmə rəva

Ki, pərişan olalar bir neçə sərgərdanlar.

Yel dəyər zülfünə, ya qoymayıb öz hali ilə,

Gəzdirərlər onu əldən-ələ hərdəm canlar.

Eylə üşşaqə cəfalar ki, vəfalar görəsən,

Sanma kim, zaye olur eylədiyin ehsanlar.

Sorma zöhhadə, Füzuli, rəhü rəsmin eşqin,

Nə bilirlər rəvişi-əhli-xirəd nadanlar.

← → düymələri ilə keçid, R — təsadüfi şeir

Təsadüfi şeir

Müəllifin digər əsərləri

Başqa şairlərin şeirləri · Eşq