Yıxdı saqi bir əyağ ilə məni-əfkarı,

Bir təpik eylədi viran, bu kühən divarı.

Gah məmur qılır badə məni, gah xərab,

Görünüz gah yapıb, gah yıxan memarı.

Gün çıxınca saçaram gövhəri-əşk əncüm tək,

Gecələr yadimə gəldikcə məhi-rüxsarı.

Dil yaxar dağ gözün fikri ilə hicr günü,

Bu çirağiləmi saxlar gecə ol bimarı?

Yox özündən xəbəri kim ki, gəlir dünyayə,

Bəzmdən dışra qomaz, piri-müğan hüşyarı.

Bizə çün qədr bulunmaz, çıxalım dünyadən,

Müştəri yox, necə bir bəkliyəlim bazarı.

Qeydi-islam, Füzuli, sənə bir afətdir,

Bir həsar edə gör ondan özünə zünnarı.

← → düymələri ilə keçid, R — təsadüfi şeir

Təsadüfi şeir

Müəllifin digər əsərləri

Başqa şairlərin şeirləri · Mey və meyxana