Sən həmişə mənimləsən, yaxud "Boy çiçəyi"
Səhifə 12 / 13 · 85%
Nargilə (yaxınlaşıb əlini onun başına çəkir)
Sakit ol, ana!
Nəzakət
Qızım! (Ona qısılır).
Nargilə (mütəəssir halda)
Sakit ol, ana!
Nəzakət
Mən sənin məhəbbətini qaytarandan sonra ayrı cür yaşamaq istəyirəm...
Nargilə (mehribancasına)
Belə ürəyinaziklik nəyə lazımdır...
Nəzakət
Yox, qayıtmalısan... Mən sənin nəfəsini atanın evində, öz yanımda hiss etməyincə rahat ola bilməyəcəyəm.
Nargilə (zarafatyana)
Elə fərz elə ki, ərə getmişəm.
Nəzakət
Ərə getmək başqa, mən səni bir ana kimi bütün qayda-qanun ilə köçürmək istəyirəm. Mən bunun üçün illər uzunu Fərəcdən gizlin, öz maaşımdan qəpik-qəpik kəsib pul yığmışam. Mən səni ləyaqətlə ərə verəcəyəm.
Nargilə (zarafatmı və ya həqiqətmi olduğu bilinməyən bir sevinclə)
Demək, mənim cehizim də olacaq. (Anasını öpür).
Nəzakət (təəccüblü bir ruhi sakitliklə)
Bu neçə ilin ərzində birinci dəfədir ki, sən ananı öpürsən... Mən də sənə analıq xeyir-duası verirəm, qızım... Səni görüm dünyalarca xoşbəxt olasan.
Nargilə (ürəyinin dərinliklərindən qopub gələn bir istək və ehtiramla)
Amin! (Pauza. Nargilə anasına qısılır və indi işıq yalnız onların üzünə düşür. Sanki hər ikisinin gözü nəhayətsiz uzaqlara... eyni məchul nöqtəyə zillənmişdir. Hər ikisinin çöhrəsində eyni sakit ifadə vardır). Yadındadırmı, mən dörd-beş yaşlarımda olduğum zaman qıçımı it tutmuşdu. Fərəc kurorta getmişdi...
Nəzakət (pıçıltı ilə)
Yadımdadır.
Nargilə
Yaram simlədiyi üçün sən neçə gecə yuxusuz qalmışdın. Mən isə hey sənə nağıl dedirdirdim. Yorulub əldən düşmüşdün. Bir gün də mahnı oxumağını tələb elədim... Sən oxudun... Birdən susdun... Baxdım ki, yuxuya getmisən... (Pauza. Anasına daha da qısılaraq). O mahnının yadında qalan yerlərini mənim üçün oxu.
Qısa pauza. Birinci şəkildəki musiqi davam edir. Ananın xəyalı uzaqlara uçur.
Yenə də zaman dayanmışdır.
Nəzakət
Yox, o mahnını yadıma sala bilmirəm.
Nargilə (ürəkdən)
Fikir eləmə, ana... Hər şey yaxşı olacaq...
Nəzakət
Mən ömrümə on ömür calayıb sənin xoşbəxtliyin üçün dişimlə-dırnağımla çalışacağam.
Nargilə
Sağ ol ana. (Onu öpür). Neçə illərdir ki, mən sənin nəfəsini belə yaxından hiss etməmişdim.
Nəzakət (qalxır)
Bu gün yığışıb gələrsən. Sabah gedərik dərziyə.
Nargilə
Nə var ki?
Nəzakət
Sənin üçün də, özüm üçün də kostyumluq almışam.
Nargilə (ürəkdən, lap uşaq kimi sevinir)
Nə danışırsan?.. Yaxşı materialdır?
Nəzakət
Gərək xoşuna gəlsin... Məncə, çox yaxşıdır...
Nargilə (eyni uşaq sevinci ilə)
Axır ki, mənim də əynim bir təzə kostyum üzü görər...
Nəzakət
Anan sənin üçün hələ ayrı şey də alıb.
Nargilə
Nə?
Nəzakət
Gələrsən, görərsən...
Nargilə
Bəlkə... (Məzəli bir əda ilə ayağına işarə edir). Dünən univermağa gələn tuflilərdəndir? (Nəzakət başı ilə təsdiq edir). Sağ ol, ana. Bir gün mən də heylə bahalı tufli ayağıma geyəcəyimi heç ağlıma da gətirməzdim. Ancaq... ana, bir məsələ var...
Nəzakət
Yenə nə məsələdir?
Nargilə
Axı mən o kişinin üzünü bir də görmək istəmirəm.
Nəzakət
Sən onun üzünü görməyəcəksən. Mən aralıq qapını bağlamışam.
Nargilə
Qoy elə mən burda qalım.
Nəzakət
Təzədən başlayırsan?
Nargilə
Yaxşı...
Nəzakət
Hələlik...
Nargilə
Hələlik, ana!
Nəzakət çıxır. Nargilə onun ardınca uzun bir nəzər salır. İşıq tədricən azalır, nəhayət, Nargilənin həyəcanlı, xoşbəxt nəzərləri altında sönür. Həsənzadənin eyvanı. Ətrafda bir tör-töküntülük nəzərə çarpır. Həsənzadə şeylərini çamadanlara yığır. Telefon zəngi. Həsənzadə dəstəyi götürür. İşıq eyni zamanda telefon xəttinin o biri ucunda dəstəyi qulağına tutmuş Nəzakətin üzərinə düşür.
Həsənzadə
Eşidirəm.
Nəzakət
Sizi bir də narahat elədiyim üçün üzr istəyirəm.
Həsənzadə
Eybi yoxdur, buyurun...
Nəzakət (həyəcanını güclə boğaraq)
Bilirsinizmi, biz barışdıq...
Həsənzadə
Təbrik edirəm... Mən bunu gözləyirdim...
Nəzakət
İcazə verin sizə dünyalar qədər təşəkkür edim.
Həsənzadə
Mənə?
Nəzakət
Əlbəttə... Sizin təsiriniz olmasaydı, biz ana-bala arasındakı əhvalat, kim bilir, haralara gedib çıxardı... Bəlkə də heç ölənəcən barışmazdıq. (Qısa pauza). Ancaq sizdən böyük bir xahişim var.
Həsənzadə
Buyurun...
Nəzakət (həyəcan içində)
Deməyə cəsarət eləmirəm.
Həsənzadə
Ürəyinizə nə gəlirsə, deyin.
Nəzakət
Elədiyiniz yaxşılığı axıra qədər aparın.
Həsənzadə
Başa düşmürəm.
Nəzakət
Siz nə qədər yaxşı insan olsanız da, mən onun sizə ərə getməsinə razı deyiləm.
Həsənzadə
Mən bunu bilirəm.
Nəzakət
Siz Allah inciməyin...
Həsənzadə
İncimirəm...
Nəzakət
Özünüz deyin, insafdırmı ki, o cür gənc qız...
Həsənzadə (səbirsiz onun sözünü kəsir)
Aydındır.
Nəzakət
Rica edirəm, məni səhv başa düşməyin... Biz çalışmalıyıq ki, övladlarımızın xoşbəxtliyi bütöv olsun. Elə deyilmi?
Həsənzadə
Elədir... Əlbəttə, elədir...
Nəzakət
Biz xoşbəxt olmadıq, heç olmasa, onlar olsunlar... Yalvarıram, bir vasitə ilə onu özünüzdən uzaqlaşdırın. Elə edin ki, bir də sizin barənizdə düşünməsin... Siz alicənab adamsınız... Siz bunu bacararsınız...
Həsənzadə
Mən o barədə fikirləşərəm. Ancaq siz öz səhvinizi işdə düzəldin... Nargilə sizin bilib-tanıdığınızdan çox-çox yüksək bir qızdır. (Pauza. Dərin böhran içində). Siz onun xoşbəxt olmasına çalışın!.. Bunun üçün, əgər bir çətinliyə rast gəlsəniz, mənə müraciət eləməyi unutmayın!.. (Qısa pauza). Mənim ünvanımı zavoddan soruşsanız, deyərlər...
Nəzakət
Necə bəyəm, siz bir yerə gedirsiniz?
Həsənzadə
Bəli, gedirəm.
Nəzakət
Neçə vaxta?
Həsənzadə
Həmişəlik.
Nəzakət
Nə danışırsınız...
Həsənzadə (artıq danışmaq onun üçün çətindir)
Başqa sözünüz yoxdur ki?
Nəzakət (mütəəssir halda)
Gedin, işiniz həmişə avand olsun. Siz dəyərli insansınız.
Həsənzadə dəstəyi asır və dərhal papiros yandırır. O, heç bir zaman indiki qədər həyəcanlı görünməmişdir. Birinci şəkildəki musiqi yenidən qalxır. Pauza. Həsənzadə papiros çəkdikcə onun həyəcanı sonu görünməyən bir kədərə çevrilir. Yaşlı bir kişi, Fərəcov və keçən dəfə Həsənzadənin kabinetində gördüyümüz üç cavan oğlan daxil olurlar.
Yaşlı kişi
Salam.
Həsənzadə
Əleykəssalam, buyurun, əyləşin...
Gələnlər otururlar.
Yaşlı kişi
Bu nə əhvalatdır, əşi, deyirlər gedirsən?
Həsənzadə (zarafatyana)
Elə deyirlər.
Yaşlı kişi
İyirmi ildir bir yerdə işləyirik, üzümüz-gözümüz öyrəşib...
Fərəcov
Ba...a... balaca bir sexi böyüdüb o cür zavod eləmisiniz... İ... i... indi ən ya... ya... yaxşı vaxtında qoyub gedirsiniz.
Birinci işçi
Harada işləyəcəksiniz?
Həsənzadə
Gəncə tərəfdə təzə zavod tikmək lazımdır.
Yaşlı kişi
Deyir, özün ərizə vermisən?
Həsənzadə (qəsdən kişinin sözünün üstündən keçərək)
Eh, ay Muradxan dayı, sənlə mənə bu dünyada tikməkdən başqa ayrı nə qalıb ki...
Yaşlı kişi
Tikmək yaxşı şeydir. Ancaq sən niyə özünü mənimlə bir tutursan?.. Mən yetmişi vurub keçmişəm. Amma sən.
Birinci işçi
Rəşid bayaq kəndlərindən zəng eləmişdi. Sizin getməyinizi biləndə yaman pərt oldu...
Həsənzadə
Məzuniyyətini nə cür keçirir?
Birinci işçi
Deyir, darıxıram... Sabahda, birigündə qayıdacaq...
İkinci işçi (mənalı təbəssümlə)
Darıxmağının səbəbi var.
Həsənzadə (gülümsəyir)
Nədi eylə?
Birinci işçi
Bilmirsiniz?
Həsənzadə (qəsdən)
Yox, bilmirəm, nə olub bəyəm?
İkinci işçi
Naryadçı qız gələndən bəri nə gecəsi gecədi, nə gündüzü gündüz...
Üçüncü işçi
Lap Məcnun olub.
Həsənzadə
Nargiləni deyirsiniz?
Birinci işçi
Ancaq qızın onunla ulduzu barışmır ki, barışmır... Rəşidi görəndə, elə bil, cini qalxır. İllah da ki, oxuyanda.
İkinci işçi (mənalı təbəssümlə)
Bunlar Rəşidin xeyrinədir.
Birinci işçi
Xeyrinədir?
İkinci işçi (filosofanə bir görkəm alaraq)
Bəs necə...
Üçüncü işçi (hərarətlə)
Sən də ağ eləmə! Nəyi xeyrinədir, az qalmışdı kişini vurub öldürsün...
İkinci işçi
Siz hələ uşaqsınız. Mən belə romanları çox oxumuşam.
Üçüncü işçi
Qız nervinnidi, vəssalam...
İkinci işçi
Xeyr a... nervin bura dəxli yoxdur. (Bilici ədası ilə). Psixoloji!
Pauza. Həsənzadə ikinci işçiyə baxır. Sonra gözlərini ondan çəkərək papiros yandırır. O öz dərin kədərinə qalib gəlməyə çalışır.
Birinci işçi
Biz gərək onu həmkarlar ittifaqına götürək.
İkinci işçi
Götürməyinə götürər, ancaq həmkarlar ittifaqının məhəbbətə nə dəxli var?
Birinci işçi (ötkəm)
Çox dəxli var!.. Əgər o, bir təşkilatın üzvü olsa, kollektivə daha tez isinişər. Adamlara dəvə nalbəndə baxan kimi baxmaz.
Üçüncü işçi
Təzə gələn vaxt söz demək olmurdu. İndi xeyli dəyişib.
Yaşlı kişi
Qızın ağlı olsa, çəm-xəm eləməz. Bu mahalda Rəşid kimi oğlan yoxdur.
İkinci işçi
Kitabxana.az · https://kitabxana.az/works/ilyas-efendiyev-sen-hemise-menimlesen-yaxud-boy-ciceyi
Müəllifin digər əsərləri
Sisyanovun qərargahı. General Sisyanov Şəki hakimi Səlimxan və üç nəfər əyanın müşayiətilə gələn İbrahim xanı təntənə və hörmətlə qarşılayır.*Sisyanov**
İyirmi birinci şəkilSisyanov böyük ipək çadırda tək var-gəl edir. Mayor Lisaneviç daxil olur.*Sisyanov**
İyirmi ikinci şəkilBöyük ipək çadır. İbrahim xan və Ağabəyim ağa.*İbrahim xan**
İyirmi üçüncü şəkilVanyanın evi. Vanya güzgü qabağında özünü keşiş qiyafəsinə salır. Haykanuş gəlir.*Haykanuş**
Başqa şairlərin şeirləri
Edər hər qəmzədən məqtul yüz canı qara gözlər,Salıbdır mərdüm içrə gör nə qovğanı qara gözlər.
BilməyəOl deyil şair ki, şeirin ehtiramın bilməyə,Dəvayi-şeir eyləyə, amma məqamın bilməyə.
ÇayŞiveyi-əhli-zamanə bəzmi-qəndü çaydırKimsədə əndazə yox, hər kimsənə xudraydır
Yar məniBir söz ilə mən duzağa tutuldum,Bu qərib ellərdə yaxdı yar məni,