Sən həmişə mənimləsən, yaxud "Boy çiçəyi"
Səhifə 11 / 13 · 77%
Həsənzadə (stuldan qalxaraq)
Yaxşı, uşaqlar, ümid edirik ki, o hadisə bir də təkrar olmayacaq. İndi isə, gəlin bununla qurtaraq. Mən özüm Rəşidlə danışaram. (Zarafatyana). Hələ desəniz üzr də istərəm.
Nargilə (həyəcanla)
Necə? Üzr istərsiniz? Heç vaxt!
Həsənzadə (eyni zarafatyana ifadə ilə)
Madam ki, sizi işə mən götürmüşəm, demək, hərəkətlərinizə mən də cavabdehəm. Elə deyilmi?
Qısa, gərgin pauza.
Nargilə (yavaş səslə)
Mən özüm üzr istərəm...
Birinci işçi
Vaxta ki, öz günahınızı hiss etməyə başlayırsınız, üzr istəmək lazım deyil...
İkinci işçi (Nargiləyə)
Siz gələcəkdə görəcəksiniz ki, Rəşid də, onun dostları da necə oğlanlardır...
Üçüncü işçi (zarafatyana)
Onda siz Rəşidə bıçaq yox, gül atarsınız.
İşçilər çıxmaq istəyərkən birinci işçi ayaq saxlayır və Nargiləyə sarı dönür.
Birinci işçi
Ancaq onu bilin ki, Rəşid ömründə heç bir kəsi sizin qədər istəməyib!
Nargilə kəskin hərəkətlə başını döndərib, oğlana nə isə acıqlı bir şey demək istəyir, lakin cavan işçilər çıxırlar. Gərgin pauza.
Nargilə (yavaş və təqsirkar ifadə ilə)
Bağışlayın. (Çevrilib tələsik çıxır).
Həsənzadə (qızın ardınca uzun bir nəzər salaraq)
Nə üçün həmişə o gedəndən sonra mən özümü bu qədər yalqız, bu qədər qəmgin hiss edirəm? Elə bil ki, o, bir də qayıtmayacaq... (Qısa pauza). Əgər bütün bunlar belədirsə, nə üçün mən qəti qərara gələ bilmirəm? Yoxsa qarşımda açılan bu yeni bahar səhərinin qeyri-adi gözəlliyi məni qorxudur? Yoxsa mən böyük insan məhəbbətinin qüdrətinə inanmağı yadırğamışam? Bəlkə, mən işıqdan qorxub qaranlığa çəkilirəm?
İşıq yavaş-yavaş azalır və nəhayət, sönür. İşıq yananda Nargilənin otağı görünür. Nargilə nə isə tikir və radioda oxunan mahnıya qulaq asır. Qapının zəngi çalınır.
Nargilə (işindən ayrılmayaraq)
Gəl.
Sarısaç qız daxil olur.
Sarısaç qız
Salam, Nana... (Onu öpür). Vicdansız... Görürsənmi, ürəyim durmadı, yenə də mən səni axtarıb tapdım. (Ətrafa göz gəzdirərək). Nə qəşəng mənzilin var!
Nargilə
Xoş gəlmisən, əyləş...
Sarısaç qız
Bu nədi, yoxsa özünə cehiz düzəldirsən?
Nargilə (gülümsəyərək)
Aha...
Sarısaç qız
Nana, sən, doğrudan, Həsənzadəyə gedirsən?
Nargilə
Sən bu sualı bir dəfə də mənə vermisən. Bəli, mən onu istəyirəm!
Sarısaç qız
Görünür ki, sizin aranızda mənim bilmədiyim, başa düşmədiyim nə isə var...
Nargilə
Ola bilər...
Sarısaç qız
Yaşlı da olsa, çox yaraşıqlıdır. Yerişi, duruşu... sifəti...
Nargilə
Məsələ yalnız yaraşıqda deyil...
Sarısaç qız
Yaraşıqda deyil, yaşda deyil, pulda, varda deyil, bəs nədədir?
Nargilə
Bilmirəm.
Sarısaç qız (mənalı bir təbəssümlə)
Çox yaxşı bilirsən. Dünən zavoddan çıxıb evinə gedirdi... Kişi məni nə cür cəlb etmişdisə, Dodik bayağıdı özündən çıxdı. (Bərkdən gülərək). Sən qısqanmırsan ki?
Nargilə
Əksinə... Mən istəyirəm ki, bütün qızlar, qadınlar onu görəndə yerlərində quruyub qalsınlar... Çünki o buna layiqdir.
Sarısaç qız
Doğru sözündür?
Nargilə
Mən indiyə qədər onsuz necə yaşadığıma təəccüb edirəm. Çünki o mənim üçün havadır, sudur, bütün bir həyatdır. (Sarısaç qızın üzü birdən-birə qüssəli bir ifadə alır.) Səninlə Dodikin əhvalatı nə yerdədir?
Sarısaç qız
Eh...
Nargilə
Necə «eh?»...
Sarısaç qız (yavaş səslə)
Mən ondan büsbütün təngə gəlmişəm... Hər gün eyni anekdotlar, eyni şit zarafatlar...
Nargilə
Bəs evlənmirsiniz?
Sarısaç qız
Əvvəllər o, gündə qulağımı dəng elədi ki, «evlənək», indi isə susur. Mənə nə düşüb, yoxsa ki, ondan ötrü gözüm uçurdu... (Pauza. Nargilə tikir. Sarısaç qız pəncərədən bayıra baxır). Nana...
Nargilə
Eşidirəm.
Sarısaç qız
Həsənzadəyə de, zavodda mənim üçün də bir iş düzəltsin.
Nargilə
Doğru sözündür?
Sarısaç qız (başı ilə təsdiq edir)
Düzəldər?
Nargilə (həyəcanla)
Əlbəttə. Ancaq... bilirsənmi, ordakılar çox ciddi adamlardır...
Sarısaç qız (gülümsəyərək)
Qorxma... Özün bilirsən ki, istəyəndə mən də ciddi olmağı bacarıram.
Nargilə (zarafatyana)
Gərək işə gecikməyəsən...
Sarısaç qız
Bilirəm... Onsuz da hər gün saat on ikiyəcən yatmaqdan bezaram.
Nargilə (tikişi bir kənara qoyaraq, aludəliklə)
Həsənzadə mütləq düzəldər. Bir yerdə işləyərik... Elə maraqlıdır ki, adam heç bilmir gün necə gəlib-keçir.
Qısa pauza.
Sarısaç qız
Nar, mən çox bədbəxtəm.
Nargilə
Nə üçün? Sənə nə olub ki?
Sarısaç qız
Bilmirəm, gecələr gəzmək... tans... şərab... Elə bil ki, yaşamaqda heç bir fərəh, heç bir məna yoxdur... Ata-ana işdə... Ev bomboş... qalıram avara, bilmirəm neyləyim. Bir donu neçə dəfə söküb təzə modaya salarsan?! (Ağlamsınır). Çapıq Dodiklə nə qədər öpüşmək olar?.. Birdən az qalıram onun da baş-gözünü vuram əzəm, özümü də atam dənizə.
Nargilə
Bir az yavaş...
Sarısaç qız
Sən zarafata salma, Nar... (Pauza). Ah... Məktəb nə gözəl idi. Nar... Heç olmasa, sabah nə iş görəcəyini, nə edəcəyini bilirdin... Qarşında onilliyi qurtarmaq kimi bir məqsəd var idi... İndisə...
Nargilə
Məktəb ona görə gözəl idi ki, bizi bir-birimizə hələ pozulmamış, təhrif olunmamış duyğular bağlayırdı... Evdə günümüz nə qədər qara olsa da, məktəbdə hər şeyi unudurduq...
Sarısaç qız
Bizi kəsib ali məktəbə girməyə qoymayan o qızın qanını içərdim.
Nargilə
Bir gün gələcəkdi, ali məktəbi də qurtaracaqdıq, məsələ onda deyil.
Sarısaç qız
Bəs nədədir?
Nargilə
Həsənzadə deyir ki, bizim quruluşumuzda insan cəmiyyətdən, onun mübarizəsindən kənarda qalarsa, heç bir zaman xoşbəxt ola bilməz.
Sarısaç qız (qulaqlarını tutur)
Oh, yenə də təbliğat...
Nargilə
Yox, mən indi hiss edirəm ki, bu, doğrudan da, belədir... Axı hamı, bütün xalq böyük bir məqsədə doğru irəliləməkdə ikən sən bu axından necə kənarda qala bilərsən?
Sarısaç qız (dalğın)
Mən heç nə istəmirəm. Heç nəyi sevə bilmirəm, Nar... Atom əsri hara, sevgi hara... Əgər bir düyməni basmaqla yüz milyonlarla insanı bir anda külə döndərə bilərlərsə, onda nə sevgi?
Nargilə
Boşla bu bədbin fikirləri. Səni inandırıram ki, hər şey yaxşı olacaq. Bir yerdə işləyərik, məktəbdəkki kimi, yenə də hər gün görüşərik... Zavodun yaxşı klubu da var... Hər gecə film göstərirlər. Lap qiyabi instituta da girərik. Həsənzadə kömək eləyər. (Qürurla). İndi biz daha əvvəlki kimi köməksiz deyilik!
Sarısaç qız
Heç kəsə ürəyim qızmır, Nar... Mənə elə gəlir ki, adamlardan milyon verst uzağa düşmüşəm. Atam işdən sonra bütün günü aşnasının yanında olur. Anamı da qısqanclıq əldən salıb, gündə qanqaralığı, gündə dava, eh...
Nargilə
Darıxma, biz onlar kimi yaşamarıq... Biz özümüz üçün tamam yeni bir həyat qurarıq. İstəyirsən Həsənzadəyə deyək, zavodda Dodik üçün də bir iş düzəltsin.
Sarısaç qız
Qoy cəhənnəm olsun. Bəyəm o, işləyəndir?
Nargilə
Nə vaxtacan atasının əlinə baxacaq?
Sarısaç qız
Narahat olma. O, darmayedliyə öyrənib. (Qalxır). Mən getdim, Nar...
Nargilə
Nə tələsirsən?
Sarısaç qız
Partnixaya gedəcəyəm.
Nargilə
Təzə paltar tikdirirsən?
Sarısaç qız
Sən də, təzə paltar üçün pul hardadır... Qırmızi donumu sökdürüb ayrı formada tikdirirəm... Demək, mənim məsələmi çuvakınla danışarsan...
Nargilə
Surik!
Sarısaç qız
Bağışla... Zəhrimar dilim öyrənib... (Güzgüdə özünü səliqəyə salaraq). Nar, üçüncü dəfədir ki, qiyamət bir oğlanla qabaq-qabağa çıxıram. Üzünə baxıram, az qalır yerişini itirsin. Məni gülmək tutur, o isə qulaqlarının dibinə qədər qızarır. Görünür, çox üzüsulu uşaqdır... (Qəhqəhə ilə gülür. Nəzakət gəlir. Sarısaç qıza soyuq bir nəzər salır. Sarısaç qızın gülüşü arvadın bu soyuq nəzərləri altında donur).
Sarısaç qız
Yaxşı, Nar. Mən getdim. Sağ olun.
Nargilə
Xoş gəldin. (Sarısaç qız çıxır). Sən nə üçün onunla salamlaşmadın?
Nəzakət
Sən bunlarla əlaqəni kəs, o günü də dedim... (Gərgin pauza). Özün də qayıt evinə.
Nargilə
Mən bir də Fərəcin yanına qayıdım?
Nəzakət
Dedim ki, öz evinə!
Nargilə
Belə söhbətlər daha nəyə lazımdır? Hər şey olub-keçib.
Nəzakət
Mən onun stol-kürsüsünü sənin otağından çıxarmışam.
Nargilə
Soruşmaq ayıb olmasın, bu gün hardan doğub?
Nəzakət
Sən mənə cəhənnəm əzabı verirsən! Heç yerdə qərar tuta bilmirəm... Mən Fərəcə də, özümə də nifrət edirəm. Mən bunu ona demişəm... Daha neyləməliyəm?!. (Göz yaşları içində). On iki ildən artıq idi ki, mən sənin atanı yuxuda görmürdüm. Amma indi hər gecə görürəm. Mənimlə bir kəlmə danışmır. Siz məndən nə istəyirsiniz? Bir canım var, əgər onu verməklə bu əzabdan qurtara bilərəmsə, alın, vallah, sizə minnətdar olaram. Heç olmasa, qəbirdə rahat yataram. Mən pisəm... ancaq mən, heç bir şeyi bilə-bilə, öz iradəmlə eləməmişəm. Heç olmazsa, sən bunu başa düş.
Kitabxana.az · https://kitabxana.az/works/ilyas-efendiyev-sen-hemise-menimlesen-yaxud-boy-ciceyi
Müəllifin digər əsərləri
Sisyanovun qərargahı. General Sisyanov Şəki hakimi Səlimxan və üç nəfər əyanın müşayiətilə gələn İbrahim xanı təntənə və hörmətlə qarşılayır.*Sisyanov**
İyirmi birinci şəkilSisyanov böyük ipək çadırda tək var-gəl edir. Mayor Lisaneviç daxil olur.*Sisyanov**
İyirmi ikinci şəkilBöyük ipək çadır. İbrahim xan və Ağabəyim ağa.*İbrahim xan**
İyirmi üçüncü şəkilVanyanın evi. Vanya güzgü qabağında özünü keşiş qiyafəsinə salır. Haykanuş gəlir.*Haykanuş**
Başqa şairlərin şeirləri
Edər hər qəmzədən məqtul yüz canı qara gözlər,Salıbdır mərdüm içrə gör nə qovğanı qara gözlər.
BilməyəOl deyil şair ki, şeirin ehtiramın bilməyə,Dəvayi-şeir eyləyə, amma məqamın bilməyə.
ÇayŞiveyi-əhli-zamanə bəzmi-qəndü çaydırKimsədə əndazə yox, hər kimsənə xudraydır
Yar məniBir söz ilə mən duzağa tutuldum,Bu qərib ellərdə yaxdı yar məni,