Dördüncü pərdə
Səhifə 3 / 4 · 50%
Mindilli
Öz gözünlə görsən, inanarsan ki... Dayan getmə. Bəs mənə bir söz demədin?
Qəmər
Axır sözüm budur: mən bütün dünyalar qədər sənə nifrət eləyirəm. (Gedir)
Camal, Qasım, Zərifə içəri girirlər.
Camal
Deyir, təhvil ver, buyur, bu da təhvil. Mən baş mühəndisəm. Mənə kağız-kuğuz lazım deyil. Zərifə, götür Mindilliylə bir yerdə bunları saf-çürük elə.
Zərifə
Yoldaş Camal, kiminlə deyirsiniz hazıram, ancaq o adını çəkdiyiniz adamla yox.
Qasım
Mənimlə necə, Zərifə xanım?
Zərifə
Nə olar ki? Heç olmasa, sənin min dilin yoxdur.
Onlar kağızlara baxırlar.
Qasım
İcazə verin, aparıb arxayın yerdə məşğul olaq. Elə deyilmi, Zərifə xanım?
Zərifə
Nə olar ki? Heç olmazsa sənin yalan danışmağın yoxdur.
Çıxırlar.
Camal (Mindilliyə)
Bənövşə haradadır?
Mindilli
Təzə rəisi soruşursunuz?
Camal
Mən Bənövşəni soruşuram.
Mindilli
Onda daha Bənövşəlik qalmayıb ki, o indi dönüb olub tikanlı gül.
Camal
Deyəsən, tikanları sənə bərk batır!
Mindilli
Təkcə mənə batmır. O gülü yetişdirən bağbanın da əlləri qan içindədir.
Camal
İndi daha sən mənimlə ayrı cür danışırsan, Mindilli?
Mindilli
Əstəğfürullah! (Durub ona yaxınlaşır) Mən Mindilovam. Dostluqda vəfalı olmaq mənim əsas ixtisasımdır. Siz bu hadisələrə bir dırnaq qədər də fikir verməyin. Böyük adamların həyatında titrəyiş olar. Yəni insan həmişə qabağa gedə bilməz ki? Bir yerdə də dayana bilər, bir-iki addım geri də çəkilə bilər.
Camal
Bəs sən mənə cavab vermədin? Bənövşə haradadır?
Mindilli
Harada olacaq? Yusifin yanında.
Camal
Bu nə sözdür? Mən səndən soruşmuram kimin yanındadır.
Mindilli
Siz soruşmasanız da demək mənim borcumdur. Dostumun qeyrəti mənim qeyrətimdir.
Camal
Saxla... De görək, nə var?
Mindilli
Səhər bir yerdə, günorta bir yerdə, axşam bir yerdə. Yusif də subay oğlan... Siz də belə, stul tərpətməkdən yoruldunuz. Adamın ürəyinə min cür ilan-qurbağa dolur.
Camal
Bu saat yenə bir yerdədirlər?
Mindilli
Budur, bax. (Pəncərədən göstərir) Orada dayanıb özləri mənim sözümün altından möhür vururlar.
Camal
Qan vurdu başıma, əşi, bu mədəniyyət bizi yıxmadı?
Getmək istədikdə, Aslan onun qabağına çıxır.
Aslan
Yoldaş baş mühəndis, dedilər, bizi soruşmusunuz. Mən Aslanam.
Camal (hirsli halda)
İstər lap pələng ol. (Gedir)
Aslan (Mindilliyə)
Bu nə hirsli adamdır?
Mindilli (hirsli halda)
Mən qarışan iş deyil. (Gedir)
Bənövşə və Mirzə Salman gəlirlər.
Bənövşə
Hə, Aslan, nə oldu? Briqadan yığıldı?
Aslan
Yığılırlar, yoldaş rəis! Hamı hazır olanda sizə xəbər verəcəyəm. Ancaq hələ tapşırıq almamışıq, işi bizə tanıtsınlar ki, vaxtı çatan kimi başlayaq.
Aslanın briqadasından üç-dörd nəfər gəlir.
Bənövşə
Qalxın dördüncü mərtəbəyə, Yusif də bu saat ora gələr.
Bir fəhlə
Mən oranı gəzdim, usta, bir səliqəsizlik var ki, necə işləyiblər, bilmirəm.
Aslan
Eybi yoxdur. Biz orada səliqə düzəldərik. Sənət məktəbini qurtarmış cavan ustaların məharətini göstərərik. İcazə verin, obyektimizə çıxıb, qabaqcadan iş yeri ilə tanış olaq, yoldaş rəis.
Bənövşə
Yaxşı yol! Müvəffəqiyyətlər arzu eləyirəm!
Aslan
Sizin arzunuz yerinə yetiriləcəkdir!
Aslan və fəhlələr çıxırlar, onların oxumaq səsi eşidilir. Camal ilə Mindilli qayıdırlar.
Camal
Bütün kağız-kuğuzları tökdüm Qasım ilə Zərifənin qabağına. Nizama salıb təhvil verəcəklər.
Mirzə Salman
Hansı kağızları Qasıma tapşırmısınız?
Bənövşə
Quzuları qatıb qurdun qabağına ki, apar otar. Onlar haradadırlar?
Camal
Əşi, siz də həddindən artıq sayıqlıq göstərməyin! Köhnə kağızları Qasım yeməyəcək ki. Yanında Zərifə də var.
Mindilli
Qasımda bir iştaha var ki, kağızları da yeyər, hələ, üstəlik, Zərifəni də.
Bənövşə
O kağızlara bir baxım. (Çıxır)
Camal
Qəribə işdir, özüm onları nizama salmayacağam ki? Bu, mühəndis işidir?
Bənövşənin arxasınca gedir.
Mirzə Salman
Bu boş qazanı bura kim qoyub? (Mindilli cavab vermir) Mən bu qazanı soruşuram, kim qoyub?
Mindilli
Bilmirəm. Mən burada deyildim, indicə gəlmişəm.
Mirzə Salman
Qəribə işdir, bizim qazana oxşayır. Bəs niyə boş?
Mindilli
Ay Mirzə, sən də bu qazan məsələsini lap prinsipial yüksəkliyə qaldırdın. Bəlkə səhv olub.
Mirzə Salman
Mətləb xörəyin yeyilməyində deyil. Bu gün mənim stolumun üstündən icazəsiz yemək götürüb yeyən, sabah icazəsiz pul sənədi də götürər.
Mindilli
İşə düşmədik... Mirzə! Hər şeydən ötrü əsəbiləşmə, yenə ürəyin xarab olar.
Mirzə Salman
Yox... Daha o vaxtlar keçdi... İdarəni qaydasına salıb, mənim xəstəliyimi sağaltdılar.
Bənövşə, Camal, Qasım və Zərifə gəlirlər.
Bənövşə
Hamısını verin Mirzə Salmana. Mirzə, siz də öz vəzifənizi layiqincə yerinə yetirməyəndən sonra daha mən başqalarına nə deyim?
Mirzə Salman
Qoyurlar ki... Orada neçə aydan qol çəkilməyən kağızlar var.
Bənövşə (Zərifəyə)
Qoy bura Mirzə Salmanın stolunun üstünə!
Zərifə
Atamda heç bir təqsir yoxdur... (Kağızları qoyur) Min dil ilə danışanların hesabını çəkmək lazımdır.
Bənövşə (Qasıma)
Bəs siz diplomunuzu gətirmədiniz?
Qasım
Bir də ondan ötrü iş-gücümü atıb Bakıya gedim?
Bənövşə
Bakıdadır? Bəs, deyirdiniz, burada evdədir.
Qasım
Mənim evim Bakıdadır. Eybi yoxdur. Yazaram, göndərərlər. Məni diş ilə sındırmaq çətindir. O qədər də asan qırılan qoz deyiləm. (Çıxır)
Mirzə Salman
Bunların hamısını mən Camala vermişəm. O da mənimlə birlikdə məsuliyyət daşıyır, ya yox? Bundan sonra heç onun qolu mənə lazım deyil.
Camal
Sənə nə var, ay Mirzə? Dünən mənim qolumla olan kağızları götürürdün, ayrılarına məhəl qoymurdun, amma bu gün mənim qolumla olan kağızları qatlayıb qoyursan bir tərəfə, ayrı imzanın qabağında baş əyirsən.
Mirzə Salman
Çox sağ ol, mənim əməyimə bu cür yüksək qiymət verdiyin üçün acizanə təşəkkür eləyirəm. (Hirsli və kəskin halda) Əgər imzaların, rəqəmlərin dövlət pulu, xalq pulu demək olduğunu başa düşmürsənsə, heç olmasa mənim saçlarımın ağlığına hörmət elə.
Mindilli
Mirzə Salman, biz, yəni köhnə rəhbərlik, Camal yoldaşla mən, bir ildırım zərbəsi ilə yıxılmış qocaman ağaclarıq. Baltanı götürüb üstümüzə cummaq sənə layiq deyil.
Camal
Mindilli, yum.
Mindilli
Siz daha əmr verməyin, yoldaş Camal! Sizə daha başqaları əmr verəcək.
Bənövşə
Camal, mənim Yusiflə söhbətim var, istəyirəm o söhbətdə sən də iştirak edəsən.
Camal
Nə söhbət? Səhərdən axşama kimi danışdığınız bəs deyil?
Bənövşə
Mən ona bir vəzifə təklif eləyəcəyəm. Yusif çox gözəl oğlandır, güman eləyirəm ki, boyun qaçırmaz.
Mindilli
Əlbəttə... Mən bunu hər vaxt təsdiq eləyə bilmərəm.
Bənövşə
Siz yoldaş Mindilli!..
Mindilli
Mindilli yox, Mindilov.
Bənövşə
Burada hamı sizə Mindilli deyir. Yaxşı, olsun Mindilov, siz də sənədləri bu gün-sabah təhvil verib qurtarın, işlərimiz qalır.
Mindilli
Bu qərarınız qətidir?
Bənövşə
Qətidir!
Mirzə Salman
Lap qətidir!
Zərifə sevinir.
Bənövşə (Zərifəyə)
Zəhmət çəkin, Yusifi tapın.
Zərifə
Bu saat. (Çıxır)
Mindilli (Camala)
Bir dəqiqə onsuz dayana bilmədi. (Bənövşəyə yumşaq səslə) Mən sizə mane olmayım, gedim, başqa yerdə məşğul olum. Yusif yoldaşı da bu saat tapıb sizin yanınıza göndərərəm. (Çıxır)
Bənövşə
Bu adam heç mənim xoşuma gəlmir, sən isə özünü ona yaxın dost kimi aparırsan.
Camal
Nə olsun ki? Mənim də xoşuma gəlməyən adamlar var, sən də onlarla dostluq eləyirsən.
Bənövşə
Özün bil. (Yusif içəri girir) Yusif, yadıma düşmüşkən sizdən bir xahiş eləyim. Tapşırıq verin prorabdan, bir də Mindillidir, Mindilovdur, kimdir, ondan göz-qulaq olsunlar, tikinti sahəsindən bir çöp də çıxarmağa qoymasınlar.
Yusif
Onsuz da bizim işçilər duyuq düşüblər, onları gözdən qoymurlar. Ancaq yenə tapşıraram. İndi isə gedək, təzə maşınlara baxaq.
Bənövşə
Ondan qabaq bir sözüm var. Sizi bizim idarənin baş mühəndisi təyin eləmək istəyirik, etiraz eləmirsiniz ki?
Camal
Necə, necə? Bu idarənin baş mühəndisi mənəm.
Bənövşə
Yusifin olmağı daha məsləhətdir. Biz bu saat tikinti sahəsini tikinti-montaj sahəsinə çeviririk. Bütün işlərimiz mexanikləşir. Baş mühəndis texnikanı qiymətləndirməyi bacaran adam olmalıdır.
Camal
Mən bu saat trestə gedirəm. Baş mühəndisi onlardan başqa heç kəs yerindən tərpədə bilməz.
Bənövşə
Trestdəki yoldaşların da fikri belədir. Bu, hamının arzusudur.
Camal
Demək, qabaqcadan hazırlıq görmüsünüz?
Bənövşə
Hə, mən hazırlıqlı iş görməyi sevirəm. Yusif, razısınızmı?
Yusif
Bilmirəm, bacararammı?
Bənövşə
Bacararsınız, bir yerdə işləyərik.
Yusif
Əgər trestdəki yoldaşlar, siz məni bu vəzifəyə layiq görürsünüzsə, etiraz eləməyə haqqım yoxdur.
Kitabxana.az · https://kitabxana.az/works/sabit-rehman-nisanli-qiz-dorduncu-perde
← → düymələri ilə keçid, R — təsadüfi şeir
Müəllifin digər əsərləri
Beşinci şəkilİstirahət evi hazırdır. Hər yan bəzənib, ağaclardan rəngli fənərlər asılıb. Pərdə açıldıqda uzaqdan orkestr səsi gəlir. Cavanlar oynaya-oynaya səhnədən keçirlər. Sadıqla Mürşüd oynayaraq gəlirlər. Musiqi kəsilir.*
Yalan3 pərdəli, 14 şəkilli komediya*İştirak edənlər
Birinci pərdəBirinci şəkilKüçə. Aslan gəlib ətrafa diqqətlə baxır, heç kimsənin olmadığını görüb fit çalır, əlində portfel olan Fərman tələsik səhnəyə çıxır.*
İkinci pərdəDoqquzuncu şəkilFabrikin qabağındakı bağça. Saleh səhnədən keçib fabrikə tərəf gedir. O gedən kimi Aslan ağacın dalından çıxır, fit çalır. O biri ağacın dalından Fərmanın başı görünür.*
Başqa şairlərin şeirləri
Hicran xəstəsiyəm dərdə giriftar,Mənim bu dərdimin nə loğmanı var.
TəcnisDedim: gəl, dost, ikimiz həmdəm olalı,Ağı mən oxuyum, qarasan, qara,
Hicran ilə kim, daməni-qəm dəstrəsimdirHicran ilə kim, daməni-qəm dəstrəsimdir,Şadəm ki, xəyalın, gözəlim, həmnəfəsimdir.
NeylimBahar oldu, qurı çaylar daşalı,Sökuldu könlümün bəndi, neylim.