İkinci pərdə
Səhifə 3 / 5 · 40%
Üçüncü şəkil
Axşam. Ay işığı. Yenə həmin yer. Radioda gözəl mahnı oxunur. Qəmər verandanı səliqəyə saldıqca mahnının sözlərini təkrar edir. Ceyran xala həyətdə göyərti yuyur.
Qəmər
Ceyran xala, içərini bəzədim, oldu gəlin otağı.
Ceyran xala
Əlin-qolun var olsun.
Qəmər
Qonaqlar hansı otaqda oturacaqlar?
Ceyran xala
O biri otaqda, ora daha genişdir.
Qəmər
Otaqlarınızın hamısı genişdir, işıqlıdır. Bənövşənin atası gözəl ev tikən imiş.
Ceyran xala
Eh, qızım, hələ bu nədir, sən onun yaratdığı məktəbləri, klubları görməmisən. Vaxtımız olsa, hamısını sənə göstərərəm.
Qəmər
Vaxtımız çox olacaq. Mən burada həmişəlik doktor işləyəcəyəm.
Ceyran xala
Lap əcəb eləyəcəksən. Yanımızda təzə bina tikilir. Oradakı mənzillərdən birinə köçərsən. O evlərin hamısı üçotaqlı, dördotaqlıdır.
Qəmər
O qədərini neyləyirəm? Qızımla mənə iki otaq bəsdir.
Ceyran xala
Qızını da hər gün işə gedəndə gətirərsən mənim yanıma. Axşamlar ya sən, ya atası dalınca gələrsiniz. Şərtləşdik.
Qəmər
Atası? Yazıq qız atasının üzünü gördü ki?
Ceyran xala
Başın sağ olsun, qızım, nə olar, ölüm hamıya var. (Qəmər gülür) Niyə gülürsən?
Qəmər
Ölsəydi, ondan yaxşı idi. Mən ərdən yarımadım.
Ceyran xala (sözünü dəyişmək istəyir)
Qəm eləmə, qızım, qəm eləmə.
Qəmər
Bənövşənin nişanlısından razısınızmı, Ceyran xala?
Ceyran xala
Nə deyim? Əvvəllər mənim də, atasının da xoşuna gəlirdi. Axır vaxtlar bir az dəyişib. Yəqin yoldaşları yaxşı deyil. Dost-aşna adamı düzəldər də, korlayar da.
Qəmər
Bənövşə ağıllı qızdır, onu bir qaydaya salar.
Ceyran xala
Qızım, mənim əqidəmcə arvad-kişi gərək bir-biri üçün işıq olsun, bir-birinə dayaq olsun. Usta Qurbanın tikdiyi hər təzə ev məni sevindirirdi, mən öz ürəyimlə ona kömək eləyirdim, ondan çox həyəcan keçirirdim. Bu məhəbbətin, bu həyəcanın ona böyük xeyri olurdu, çünki görürdü ki, mənim ürəyim onun ürəyi ilə bir döyünür. Əgər kişi bu cür məhəbbətə layiq deyilsə, nahaq yerə özünü şam eləyib yandırma.
Qəmər
Camal özünü yaxşı aparmır?
Ceyran xala
Yox, Camal ləyaqətli oğlandır. Mən söz məsəli deyirəm. Həmişə onların barəsində fikir eləyirəm. Neyləyim, dünyada dövlətim, varım təkcə bir qızım var. Bir oğlum da var idi, əcəl əlimdən aldı... (Ağlamsınır)
Qəmər
Bənövşə sizinçün həm qızdır, həm də oğul, Ceyran xala. (Çölə baxır) Nə gözəl gecədir, Ay təzə gəlinlərə oxşayır. Ceyran xala, deyəsən gəlirlər, odur... Bənövşə, Camal... Yanlarında kim isə var, hə, o mühəndisdir.
Ceyran xala (çölə baxır)
Özüdür, yanlarındakı Yusifdir. Çox ağıllı uşaqdır. (Birdən həyəcana düşür) Ay Qəmər, birdən çatışmaram ha, sən onları qarşıla, sonra Bənövşəni də götür, gəl mənə kömək elə.
Ceyran xala gedir. Bir azdan Bənövşə, Camal, Yusif içəri girirlər. Camal son dərəcə kefsizdir. Bənövşə həyəcanlı görünür.
Bənövşə
Qəmər can, səni tək qoyub getdim, darıxmadın ki?
Qəmər
Heç, Ceyran xala ilə bir yerdə darıxmaq olar? Nişanlın niyə kefsizdir? Çəkmələrini dəyişmədi?
Bənövşə
Yox, ayağı tamam yadından çıxıb. Ürəyi sıxılır. Doğrudan, Qəmər, sən doktorsan, tənqidin bir dərmanı yoxdur verəsən Camal içsin?
Camal
Mənə yox, tənqid eləyənlərə dərman vermək lazımdır. Elə dərman olsun ki, mən də durub tribuna qabağında nərildəyəndə özlərindən çıxmasınlar.
Yusif
Tənqidə qarşı təhqir eşitmək, əlbəttə, bir az ağırdır.
Camal
Niyə? Sən deyəndə tənqid olur, mən deyəndə təhqir?
Yusif
Mən deyəni hamı təsdiq elədi, sən deyənə hamı etiraz elədi. Çünki əsl iş yoxdur.
Camal
Deməli, iş görmürük, oyun oynayırıq?
Yusif
Bəli, qabaqlarda bizdə də iş vardı, ona görə də çığır-bağır yox idi. İndi isə çığır-bağır var, ona görə ki, iş yoxdur.
Camal
Deməli, heç bir iş yoxdur?
Yusif
Yoxdur.
Camal
Bir dəli şeytan deyir... (Hirslə ona yaxınlaşır. Deməyə söz tapmayıb dayanır. Birdən əyilib ayağını tutur) Vay-vay, evin yıxılsın, Mindilli!
Yusif
Həqiqətən də sənin evini yıxan mindillilərdir...
Camal
Bizim Mindilli... Çox vicdanlı... (Ayaqqabıları çıxarıb atır) Of, elə bil dünyaya təzədən gəldim.
Bənövşə
Dur, evdə dəyiş. (Qəmərə) Bunlarla mən idarədə neyləyəcəyəm, bilmirəm.
Camal
Gedək, Yusiflə söhbətimiz qalsın sonraya.
Çıxırlar, səhnədə Qəmərlə Yusif qalır.
Yusif (onun arxasınca)
Eybi yoxdur. Sonrakı söhbətimiz daha ciddi olacaq.
Qəmər (ona yaxınlaşır)
Nə yaman davakar olmusunuz, Yusif?
Yusif
Neyləyim, Qəmər can, mübarizəsiz olmur.
Qəmər
Heç olmasa, nişanlısının yanında onu pert eləməyin, bu günlər toyları olacaq.
Yusif
Toyları nə qədər tez olsa, o qədər yaxşıdır. Sonradan Bənövşənin başı tikinti işlərinə qarışacaq. Ona çox məsul iş tapşırılıb.
Qəmər
Bənövşəyə? Nə iş?
Yusif
Bənövşə bizim rəisimiz təyin olundu.
Qəmər
Belə deyin... Nə vaxt təyin olundu?
Yusif
Yığıncaqdan sonra bizi saxladılar. Raykom katibi ilə trest müdiri Bənövşə ilə söhbət apardılar. Mən çox şadam. Bənövşə bacarıqlı, ağıllı qızdır. Moskvada, çoxmərtəbəli evlərin tikintisində təcrübə görüb. Əgər yaxşı diqqət eləsə, qəsdən gözünü yummasa, mənim dediklərimin hamısını o da görəcək. Yox, əgər, özünü bir nişanlı qız, ya təzəgəlin kimi aparsa, onda yenidən dava çəkməli olacağıq. Bilirəm, yenə deyəcəksiniz ki, davakaram. Neyləyim, işləmək istəyirəm. Əsl mənada iş görmək istəyirəm.
Qəmər
Siz elə o vaxt da tikməyə, qurmağa həvəsli olduğunuzdan mənə danışardınız. Yadınızdadırmı, söz vermişdiniz ki, mühəndis olan kimi gözəl bir xəstəxana tikəcəksiniz?
Yusif
Yadımdadır. Siz də söz vermişdiniz ki, o xəstəxanada həkim işləyəcəksiniz və əvvəlcə məni müalicə edəcəksiniz. Mən vədimə əməl elədim.
Qəmər
Necə?
Yusif
Sizin indi işləyəcəyiniz xəstəxananı mən tikmişəm.
Qəmər
Onda gərək mən də sözümü yerinə yetirəm, birinci sizi müalicə eləyəm.
Yusif
Elə isə mən müalicəyə hazırlaşım? (Gülüşürlər) İşə nə vaxtdan başlayacaqsınız?
Qəmər
Əmrimi alan kimi qızımı gedib gətirəcəyəm, sonra...
Yusif
Qızınız neçə yaşındadır?
Qəmər
Dörd. Elə şeytan, elə şirindil qızdır ki... Yəqin hər gün yolumu gözləyir. Mən ona həm ata olmuşam, həm də ana.
Yusif
Mən onun atasının kim olduğunu bilmirəm. Ancaq onu bilirəm ki, sizin kimi qadını atıb gedən adam çox dəyərsiz, ləyaqətsiz adamdır.
Qəmər
Ondan danışmağa dəyməz... Gəlin içəri. Ceyran xala ilə bir yerdə elə xörəklər hazırlamışıq ki...
Yusif
Yox, Qəmər, bir də Camala rast gəlsəm, qanıqaralıq olacaq.
Bənövşə gəlir, onlar özlərini itirirlər.
Qəmər
Bənövşə, mühəndis yoldaş getmək istəyir.
Bənövşə
Hara? Yusif, nə üçün gedirsiniz?
Yusif
Axşam növbəsində işim var, qala bilməyəcəyəm. Bir də indicə Qəmər xanıma da danışırdım...
Bənövşə
Anam sizi də çağırıb, gəlməsəniz inciyər, onda işinizi qurtarandan sonra, xahiş eləyirəm, gəlin.
Qəmər
Mən də xahiş eləyirəm.
Yusif
Siz deyəndən sonra etiraz eləmək olmaz! (Getmək istəyir, birdən dayanır, cibindən kağız çıxarır) Bu, təftiş aktının surətidir. Camal baxmamışdan qol çəkdi. Siz oxuyun, maraqlıdır. Sağ olun... Sağ olun, Qəmər xanım... (Gedir)
Qəmər
Bilirsən nə üçün getdi? Camalla üzləşmək istəmir.
Bənövşə
Camal məsələsi ciddidir.
Qəmər
Deyirlər, məsul vəzifəyə təyin olunmusan, Bənövşə xanım! Təbrik eləmək olar?
Bənövşə
Həftədə bir dəfə qəbul günüm olacaq, gəlib növbəyə yazılarsan, sonra.
Qəmər
Bəlkə məni tanışlıqla qabağa salasan?
Bənövşə
Üz vurma... Bacarmaram.
Gülüşürlər.
Qəmər
Gözümün qabağına gətirirəm, yazıq Camalın başına nə oyun açacaqsan. Deyəsən, aranızda müharibə başlayır?
Bənövşə
Yox, müharibə qabaqdan başlanıb. Mən ən qızğın vaxtına gəlib düşmüşəm. (Yavaşdan) Özü də, deyəsən, o biri cəbhə haqlıdır. Mən öz nişanlımla əməlli-başlı qılınc davasına çıxmalı olacağam.
Qəmər
Dava niyə? Qaydasında başa sal. Arvad kişiyə yaxın yoldaş olmalıdır.
Bənövşə
Mən hələ nişanlı qızam.
Qəmər
Daha yaxşı. Nişanlı qızın hökmü daha çox olur.
Bənövşə
Hökmü də çox olur, minnəti də... Üzük... Nişan... Əlbəttə, bunlar hamısı şərtidir, xoşbəxt olmaq üçün əsas deyil. Sevginin get-gedə dərinləşməsi və möhkəmlənməsi üçün bu bir parça metalın heç bir rolu yoxdur.
Qəmər
Sən ağ eləmə. Məncə, onda elə dərin sevgi var ki... O cür də olmalıdır, səni sevməmək mümkün deyil.
Bənövşə
O da ləyaqətli oğlandır. Mən instituta təzə girəndə axırıncı kursda idi. Bütün məktəb başına and içirdi. Ağıllı, bilikli, dərin düşüncəli... Birinci illər mənə o qədər kömək eləyirdi... Bilirsən, nə gözəl günlər keçirirdik? Bir-birimizə söz vermişdik ki, ikimiz də ali məktəb qurtarmayınca evlənməyəcəyik. O vaxtdan görməmişdim, yalnız məktublaşırdıq... İndi...
Kitabxana.az · https://kitabxana.az/works/sabit-rehman-nisanli-qiz-ikinci-perde
← → düymələri ilə keçid, R — təsadüfi şeir
Müəllifin digər əsərləri
Dördüncü şəkilCeyran xalanın otaqlarından biri. Yan otaqda qonaqlıqdır. Gülüş və danışıq səsləri gəlir. Sonra qonaqlar Qasımı əhatə edərək bu biri otağa keçirlər.*
Dördüncü pərdəBeşinci şəkilTikinti idarəsi. Birinci pərdənin dekorasiyası. Böyük səliqə hiss olunur.*
Beşinci pərdəAltıncı şəkilYeni tikilmiş evin qabağındakı meydan. Bu evin birinci mərtəbəsindən şkaflar daşınır. Uzaqdan alqış, musiqi səsi gəlir. Evin qurtarması münasibətilə tikinti işçiləri arasında çağırılmış mitinq artıq qurtarmışdır. Camaat yavaş-yavaş dağılır, Mirzə Salman səhnəyə gəlir, şkafların daşınmasına baxır. Bənövşə ilə Yusif gəlirlər.*
Toy5 pərdə, 8 şəkildə*İştirak edənlər
Başqa şairlərin şeirləri
Ah-ü-zar çəkməkdən, qan ağlamaqdan,Dərdimi yetirdin səksənə könül,
UzaqSahiba, bir nəfərəm dövlətü izzətdən uzaq,Düşmüşəm şəhrdən avarə, vilayətdən uzaq.
Yandırdın MəniYanasan yanasan yandırdın məniSən də mənim tək yanasan könül
MürəbbəQanamıq məni, doğrusın deyim,Məni yüz min dərdə salan yar budur