Səhifə 5 / 5 · 80%

Zalxa

Bunun dilinə-diyircəyinə bir bax. Ağaclar baş tərpədəndə, söyüd deyər, mən də, mən də...

Musa

Əstəğfürullah, işə düşmədik. Ay arvad, nə girləmisən məni? Əl çəksənə, nə vermisən, ala bilmirsən?

Zalxa

Belə sənin başına mən bir oyun açaram ki, çəkic vurmağı yaddan çıxardarsan. De görüm, saqqal hanı?

Kərəmov, Salmanov, Mirzə Hüseyn qayıdırlar.

Kərəmov

Bu nə yığıncaqdır?

Zalxa

Aha, Kərəmov, səhərdən səni axtarırdım. Mən, necə bir heyət üzvü, səndən tələb eləyirəm. Gəl haqq-hesab ver, görüm, o qəzetdə yazılan nə əhvalatdır?

Kərəmov

Nə əhvalat olacaq? Görmürsən, aslanı yaralayıblar? Bu kimdir?

Zalxa

Bunu tanımırsan? Dəmirçi Musadır da.

Kərəmov (çığırır)

Salmanov, protokol yaz. Salmanov, təcili! Adə, dəmirçi Musa, demək iki min beş yüz manatı almısan, indi üzünü qırxdırıb, təğyiri-libas eləyib, qaçmaq istəyirsən?

Musa

Kərəmov! Bu saat səninlə söhbət eləməyə mənim həvəsim yoxdur.

Kərəmov

Olmaz da, pulları yemisən, üstündən də su içmisən. İndi dama girəndə ağlın başına gələr.

Musa

Nə puldur, mən başa düşmürəm.

Kərəmov

Bilməzsən, əlbəttə. İmzan var, imzan, qol çəkmisən.

Musa

Çəkil gözlərimin səkisindən, mən pul-zad almamışam.

Kərəmov

Necə? Mənə çəkil deyirsən? Ay camaat, eşitdiniz? Ay yoldaşlar, adə hey... (Haray salır. Surxay, Ziynət və bir neçə kolxozçu gəlirlər) Bura gəlin. Səni mən bu saat prokurorun yanına göndərməsəm, adımı Kərəmov yox, İtov qoyaram.

Surxay

Yoldaş Kərəmov, bir bizi başa salın, görək nə əhvalatdır?

Kərəmov

Saqqallı vaxtında məndən gizlin iki min beş yüz manat pul alıb, indi saqqalını qırxdırıb, aldığı pulları danır. Bu cür işə Kərəmov dözər?

Surxay

Musa dayı, saqqal getdi?

Ziynət

Axı, hanı burada Musa dayı? Mən görmürəm. Aha, təbrik eləyirik, ay Musa dayı. Siz təkərlər üçün iki min beş yüz manat pul almısınız?

Musa

Ziynət, quzum, mən sənin verdiyin zəhmətə haqq istəmərəm, mən pul almamışam.

Mirzə Hüseyn

Kişi utanmır, gör necə yalan danışır...

Kərəmov

Bu saat, bax, bu camaatın qabağında cavab ver. Kolxoz pulu sənin üçün semiçkadır, bəyəm? (Musaya yaxınlaşır) Vallah, cırımcırım eləyəcəyəm. Aslanı yaralayıblar.

Musa

Bağla söz körüyünün ağzını. Aslanı yaralayıblar. Aslana bax... Mən çox sənin kimi aslanları zindanın üstünə qoyub tülküyə döndərmişəm. Düzdür, təkərlər üçün zəhmət haqqı təklif elədilər, mən rədd elədim. İndi bəs hansı iki min beş yüz manatdan söhbət salmısınız?

Mirzə Hüseyn

Almısan, altından da imza atmısan. Fırıldağa salıb danmaq istəyir hə...

Musa

Çəkil kənara, məlun, sən mənə pul vermək istəyəndə, mən onu rədd etmədim?

Surxay

Aha, məsələ yavaş-yavaş aydın olur.

Kərəmov

Mənim hesablarımı qəsdən dolaşdırmaq istəyir, inanmayın...

Mirzə Hüseyn

O fırıldaqlar baş tutmaz.

Kərəmov

Salmanov, protokol bağla.

Zalxa

Bağlama, dayan görüm. Biz bu kişini yaxşı tanıyırıq. (Musanı göstərir) Hələ bu kənddə onun ağzından yalan söz eşidən olmayıb, amma sən Mirzə Hüseyn yalançısan, oğrusan, iki min beş yüz manatı özün cibləmisən. Sən Salmanov da onunla əlbirsən, sən Kərəmov da onların quyruğusan. Yaxşı hesabdarımızı işdən çıxartdın, bunları hardansa tapıb gətirdin.

Ziynət

Sağ ol, Zalxa xala, düz deyirsən, bu işi yoxlamaq lazımdır.

Kərəmov

Sizin namuslu adamları ləkələməyə haqqınız yoxdur. Mən Mirzə Hüseynin düzgünlüyünə başımı girov qoyaram.

Zalxa

Qiymətli şeyi girov qoyarlar, sənin başın çox ucuzdur.

Kərəmov

Yaxşı, bu məsələlərin hamısını iclasda ayırd eləyərik. İclasda mən göstərərəm ki, görək təğyiri-libas eləyib qaçmaq hansı maddəyə düşür?

Zalxa

Kişi saqqalını qırxdırıb, özünü biabır eləmədi?

Musa (Zalxaya)

Sükut! Bağla söz körüyünün ağzını.

Ziynət

Musa dayı!

Musa

Buyur, Ziynət can, əmrin nədir?

Ziynət

Siz nahaq Zalxa xala ilə bu cür rəftar eləyirsiniz. Qadınlarla o cür danışmaq olmaz.

Musa (yavaşdan)

Surxay, məni başa sal, o nə demək istəyir?

Surxay

Deyir ki, qadınlara hörmət elə, incə ol.

Musa

Elə isə mən bu gündən bütün qadınlara sülh elan edirəm.

Kərəmov

Biz sülhü sənə başa salarıq. Gəlin gedək, uşaqlar, ağ üz ilə, qara üz iclasda məlum olar.

Ziynət

Məlum olar, biz də gedək.

Pərdə

← → düymələri ilə keçid, R — təsadüfi şeir

Təsadüfi şeir

Müəllifin digər əsərləri

Başqa şairlərin şeirləri