Üçüncü pərdə
Səhifə 1 / 2
Qorxmazovun kabineti. Dəmirov başının altına kiçik bir yastıq qoyub uzanmışdır. Dəmirov əsnəyir, gərnəşir.
Dəmirov (yuxulu)
Nə, danışan kimdir? Cecurnadır! (Hərəkətsiz) (Yenə zəng) Necə, bakalları qaldıraq padxalimlərin sağlığına? Axmaq... Burda padxalim nə gəzir... (Hərəkətsiz).
Yenə zəng vurulur. Fatma gəlib divardakı saata baxır və Dəmirovu silkələyərək zorla ayıldır.
Fatma
A kişi, bəsdir xoruldadın, dur ayağa!
Dəmirov (diksinir)
Necə, prikazım gəldi?
Fatma
Bir qazın yox, iki qazın gəldi... Umsunma, şişərsən, qalx ayağa!
Dəmirov
Arvad, bu dəqiqə yuxuda görürdüm ki, məni Qorxmazovun yerinə itələyiblər. (Stol arxasında oturur.) Bax gör yaraşır, hə?..
Fatma
Eh... cavan ömrümü gör kimlə çürütdüm. Ata, anama nə deyim.
Dəmirov
Yenə şikayət? Məndən artığına gedəcəkdin? Sən bir gör ərin kimin yanında işləyir!
Fatma
Uşaq-uşaq danışma!
Dəmirov
Yaxşı yadıma saldın, uşaq necədir?
Fatma
Nigaran qalma, yaxşıdır. Kürəkənimiz səfərdən gələnə kimi saxlarıq.
Dəmirov
Uşaq deyil, çörək ağacıdır, çörək ağacı... Uşağın əsil atası tapılsaydı daha dərdimiz olmazdı.
Fatma
Allah Qorxmazova ömür versin ki, özgənin uşağına bu qədər can yandırır.
Dəmirov
Hə, hə, görürsən necə kişidir. Sən isə həmişə onun dalınca deyinirsən. (Səbir gətirir, asqırır.)
Fatma
Ürəyimizi bulandırma... Üz-gözündən kifirlik yağır. Tez get əl-üzünü yu...
Dəmirov
O da baş üstə! (Getmək istəyir.)
Fatma
Kişi günorta bazara sən gedəcəksən.
Dəmirov
Nə deyirəm ki. (Gedir.)
Gülara (gəlir)
Salam, Fatma xala!
Fatma
Salam qızım, salam!
Gülara
Qorxmazov hələ gəlməyib?
Fatma
Xeyr qızım, niyə belə bikefsən?
Gülara
Heç xala... Atelya modamızın körpəsi necədir?
Fatma
Uşaqdan nigaran qalma. Ona öz doğma balamız kimi baxırıq. Ancaq bir az...
Gülara
Başa düşürəm... (Ona pul verir.) Al. Ancaq ondan muğayat ol, körpədə günah yoxdur. Günah bizdədir ki, bu cinayəti işləyib, sonra ört-basdır etməkçin məsum körpələri əldən-ələ salırıq.
Fatma
Cavanlıqdır qızım, bir işdir olub da... Qızım, bəs o körpənin əsil atası kimdir? Məndən gizlətmə... de.
Gülara
Deməyə çox çətinlik çəkirəm, Fatma xala. Kimin üstünə atasan ki...
Fatma
Bıy, başıma xeyir... allah günahınızdan keçsin qızım, o dünyada nə cavab verəcəksiniz?
Gülara
Mən niyə? Qoy təcrübəsiz qızları yoldan eləyən vicdansızlar cavab versin.
Fatma
Haqlısan, görəsən o dələduz daha kimləri bədbəxt eləyəcək? Qoy bu sizə ömürlük dərs olsun.
Gülara
Bu ağıllı sözdür. Sağ ol, Fatma xala. (Gedir.)
Fatma
Yazıq qız, tutduğu əməldən yaman peşman olub. (Fatma stolu təmizləyir. Papiros kötüklərini toplayır. Sonra divara söykədilmiş şəkli çevirir. Təmizləyir.) Qorxmazov bu idarəyə gələni aləmi zibilləyib. Bunu da yaman toz basıb. (Şəklə tüpürür və silir. Qorxmazov gəlir, heyrətlə Fatmaya baxır.) Tfu, tfu...
Qorxmazov
Adə, düşməni ayrı yerdə niyə axtarıram. Budur, hazır durub qabağımda. Fatma, mənim üzümə tüpürürsən?
Fatma
Bıy, salaməleyküm! Üzündəki çirki təmizləmək istəyirdim.
Qorxmazov
Xeyr, kələyin baş tutmaz. De görüm səni kim öyrədib?
Fatma
Eh, boş-boş danışma.
Qorxmazov
Necə?
Fatma
Daha bəsdir. Ərim bir yandan, sən bir yandan canımı boğazıma yığdınız... Səhərdən axşamacan işləmək bir yana dursun, üstümüzə bir uşaq da atdınız.
Qorxmazov
Yaxşı, yaxşı... uşağın halı necədir?
Fatma
Yaman şıltaqdır.
Qorxmazov
Yəqin atası qırışmala çəkib.
Fatma
Necə, atası tapılıb?
Qorxmazov (diksinir)
Hələ yox.
Fatma
Atası əclafda insaf, vicdan olsaydı, öz gül kimi uşağına sahib çıxıb onu yad əllərə tapşırmazdı.
Qorxmazov
Bəli, bəli...
Fatma
Vallah, Qorxmazov qardaş, atası rastıma gəlsəydi, tutardım onun yaxasından, bax belə... (Qorxmazovun yaxasından yapışır.) Üzünə bir parça tüpürüb deyərdim ki: ey dələduz! (Tüpürür, Qorxmazov dadlı-dadlı getdikcə Fatma onu təqib edir.) Ay binamus! Ay əclaf!
Qorxmazov
Buraxsana yaxamı, onun atasından mənə nə.
Fatma
Bu sözləri sənə yox ki, uşağın əsil atasına deyirəm də.
Qorxmazov
Heş ona da demə... Ədəblə danışmaq kulturadır, ədəbsiz danışmaq xaltura, Fatma xala!
Fatma
Əlbəttə quldur-muldur belə iş görə bilər, kül o biqeyrət atanın başına ki...
Qorxmazov
Sus, atasının yox, anası Gülaranı söymək lazımdır, Gülaranı. Ana da öz uşağından boyun qaçırar? Zalımın qızı, bəlkə bu uşaq böyüyüb zorba bir incinar olacaq, doktor olacaq...
Fatma
Dərzi olacaq...
Qorxmazov
Yox, yox atası buna razı olmaz.
Fatma
Qoy olmasın, olmasın... Hə, onu deyirəm ki, az qalmışdı yadımdan çıxsın.... Dünən Dünya xanım bizə gəlmişdi.
Qorxmazov
Sizə gəlmişdi? (Kənara) Evim yıxıldı.
Fatma
Bəli, körpənin göz-qaşına, burun-qulağına çox diqqətlə baxdı.
Qorxmazov
Yoxsa burun-qulaq doktoru olub? Fatma xala, səndən çox xoşum gəldi. (Pul verir.) Al bu pulu... Uşağa yaxşı qulluq eləyin.
Fatma
Görüm əlin kimi ürəyin də açıq olsun. Bayaq Gülarada uşaqçın bir az xərclik verdi.
Qorxmazov
Aha, uşağı aldı boynuna?
Fatma
Alan kimi oldu... ancaq atasını demədi ki, demədi. Yaxşı, Qorxmazov qardaş, baş-gözünüz niyə belə gömgöydür? Olmaya yıxılıb eləmisiniz?
Qorxmazov
Xeyr, Fatma xala, bunlar karnaval frontunun meyvəsidir.
Fatma
Yaxşı, mən getdim işimə. (Gedir.)
Qorxmazov (gəzişir)
Yaxşı Gülara... nə qədər ki, bu uşaq məsələsi var, sən mənim əlimdəsən,əlimdə! Öl desəm öləcəksən, qal desəm qalacaqsan... Məni sev desəm sevəcəksən... (Rəhilə içəri girir.) Aha... Axır ki, gəldin, görürsən hörmətini? Demişəm səni mənim yanıma bez daklad buraxsınlar.
Rəhilə
Mən balamı istəyirəm, balamı!
Qorxmazov
Şərtini dünən demişəm. Cəmisi bir dəqiqəlik əziyyəti var.
Rəhilə
Vicdanım iftira atmağı qəbul etmir. Balamı qaytarın mənə...
Qorxmazov
Aha... balamı... Dediyim şərtdən başqa bir yolu yoxdur. Onu da sənə xəbər verim ki, Dünya ilə bu gün-sabah üzülüşəcəyəm.
Rəhilə
Onun daha mənə dəxli yoxdur.
Qorxmazov
Çox dəxli var. Telefonda sənə dediyim şərtə razısan, ya yox?
Rəhilə
Yox, yox, qaytarın mənim balamı özümə.
Qorxmazov
Aha, qoy sənə düzünü deyim. Balan Nadirdədir, Nadirdə. Verdim ona oğulluğa... bu dəqiqə... (Zəngi basır.)
Rəhilə
Bu nə işdir mən düşdüm.
Dəmirov gəlir.
Qorxmazov
Tez Nadiri çağır gəlsin... Sonra o biri işçilərimə də xəbər elə yanıma gəlsinlər... (Dəmirov gedir.)
Rəhilə
Görəcək günlərim varmış.
Qorxmazov (qışqırır)
Necə, necə? Sən mənim kadrolarımı ləkələyirsən?
Nadir (gəlir)
Mənə aid qulluq!
Rəhilə (onun üstünə atılır)
Nadir, Nadir...
Nadir
Məndən nə istəyirsiniz?
Rəhilə
Balamı.
Nadir
Nə bala?
Rəhilə
Günahların hamısı məndədir.
Bu dəmdə Gülara, Dilavər, Bayramalı, Dəmirov gəlir.
Nadir
Bu nə komediyadır?
Rəhilə
Ayaqlarına düşürəm, ver mənim balamı.
Qorxmazov
Ay qız... mənim kabinetimi zaqsa döndərmə deyirəm sənə!
Rəhilə (Qorxmazova)
De mənim balamı qaytarsın özümə.
Nadir
Nə bala, canım?
Rəhilə
Yıxılıram ayaqlarına. Balamı qaytar, məni bədbəxt eləmə.
Nadir
Xanım, bu iftira üçün sizi məsuliyyətə çəkərəm. Mən sizi birinci dəfədir ki, görürəm.
Dilavər
Çün piş əz vaxt bərayi məlumat...
Gülara
Nadir, bu bədbəxti niyə təhqir edirsiniz?
Nadir
Yox, mən dəli olacağam!
Rəhilə
Balamı niyə mənə qaytarmırsan axı?..
Qorxmazov
Yoldaşlar, görürsünüz bu həngaməni? Biri otağıma uçaq qoyur, o biri gəlib kadroma, qarğaturistimə iftira atır. Rədd olun mənim kabinetimdən... Hanı bu telefon? (Zəng vurur.) Salam. Mənəm, Qorxmazov... Sən öl, məni rahat işləməyə qoymurlar. Axşam gəlirəm sizə, öpürəm. (Hamı təəccüb edir.) Rədd olun başımdan, qoyun işləyək, planımızı dolduraq. Avaralar! (Hamı gedərkən Rəhiləyə) Qızım, sən bir dəqiqə dayan. Səninlə işim var. Hə, gördün ki, heç bir qorxulu iş olmadı. Balan əvvəl Nadirgildə idi. İndi isə bax bu adresdədir. (Qorxmazov kağız yazıb ona verir.) Al, axşam gedib bu adresdən uşağını alıb apararsan. (Rəhilə kağızı alıb hönkürərək çıxır.) Bu da belə...
Dəmirov (gəlir)
Salam, indi necəsən?
Qorxmazov
Bir də o qızı bura buraxmazsan. Axşam o sizə gələcək, ver uşağını aparsın, təqsir Gülarada yox, Nadirdə imiş...
Dəmirov
Siz buyuran düz olar.
Qorxmazov
Adə Dəmirov, dostlar bilir ki, sabah nə günüdür və ayın neçəsidir?!
Dəmirov
Sabah bazar günü, özü də ayın 13-dür.
Qorxmazov
Yaman nəhs gündür, yaman, ayın on üçü, yəni nə adə?
Dəmirov
Anadan olan gününüz...
Kitabxana.az · https://kitabxana.az/works/suleyman-rustem-geldi-geder-ucuncu-perde
← → düymələri ilə keçid, R — təsadüfi şeir
Müəllifin digər əsərləri
Bu sözüm əfsanə yox, yalnız həqiqətdir, oğul,Millətə namusla xidmət, bir səadətdir, oğul...
Qızım ƏzizəyəEvimizə gələndə məhəbbət gətir, qızım...Öz hüsnünə bənzəyən təravət gətir, qızım!
OlmasaGülməz şeir deyən yeni sövdası olmasa,Dinməz dilindən hər sözün əlası olmasa.
Suala cavabDostlarım soruşur: “Neçə yaşın var?”Deyirəm: “Nə bilim, itibdir hesab”
Başqa şairlərin şeirləri
Yağ, ey yağış, yağ!Sulansın çöl, bağ.
DöndərdinOğrun-oğrun baxan gözəl,Bağrımı qana döndərdin.
Sən də, ey şair, əcəb dəmlər keçirdin əvvəlaSən də, ey şair, əcəb dəmlər keçirdin əvvəla,Mey içib meyxanənin babində çəkdin əssola.
Ey mənim laləzər çiçəkli bağçamEy mənim laləzər çiçəkli bağçam,Gülüstan qoynunda fəvvarə vuram,