Bizim nigar dediyimiz nigarımız bu deyil!Sevimli dilbərimiz, nazlı yarımız bu deyil!

Biz indi də çəkirik intizarını o gülün,Həqiqi çəkdiyimiz intizarımız bu deyil!

Bizim baharımız ancaq gülüzlülərlə keçib,Bu nazənin ki, görürsüz, baharımız bu deyil!

O gül ki, biz sevirik, bil, onunla fəxr edirik,Sizin təsəvvür ilə iftixarımız bu deyil.

Kəməndi-ahə yaxın düşmədi ol ahunigəh,Yəqinim oldu, sevimli şikarımız bu deyil.

Bizim gözəl bitirib nazü qəmzə məktəbini,O məktəbi bitirən işvəkarımız bu deyil!

Mən öz ümidimi pərvərdigara bağlamışam,İnanma Vahidə, pərvərdigarımız bu deyil!

← → düymələri ilə keçid, R — təsadüfi şeir

Təsadüfi şeir

Müəllifin digər əsərləri

Başqa şairlərin şeirləri · Eşq